ជាតិ
សេដ្ឋកិច្ច
កម្ពុជា កំពុងចរចាជាមួយ វៀតណាម ថៃ និងឡាវ បើកច្រកព្រំដែនបន្ថែម ដើម្បីបង្កើនទំហំពាណិជ្ជកម្ម
× ភ្នំពេញ៖ កម្ពុជា កំពុងចរចាជាមួយរដ្ឋាភិបាលវៀតណាម ថៃ និងឡាវ ដើម្បីពិភាក្សាលើបញ្ហាបើកច្រកព្រំដែនបន្ថែមទៀត ក្នុងទិសដៅពង្រីកទំហំពាណិជ្ជកម្មជាមួយប្រទេសជិតខាង។
ថ្លែងនៅក្នុងពិធីសម្ពោធដំណើរការប្រព័ន្ធផ្គត់ផ្គង់ទឹកស្អាតខេត្តកំពត នៅថ្ងៃទី២ មេសានេះ សម្ដេចនាយករដ្ឋមន្ត្រី ហ៊ុន សែន បានលើកពីគុណសម្បត្តិនៃការដឹកនាំមកនិយាយថា ការសម្រេចបានទំហំពាណិជ្ជកម្មកន្លងមក គឺកើតចេញពីចក្ខុវិស័យរបស់រដ្ឋភិបាលច្បាស់លាស់ក្នុងការដឹកនាំប្រទេស និងភ្ជាប់ទំនាក់ទំនងល្អជាមួយប្រទេសជិតខាង។ ដោយសារមើលឃើញសក្ដានុពលពាណិជ្ជកម្មជាមួយប្រទេសជិតខាងនេះ ទើបរដ្ឋាភិបាល រកផ្លូវចរចាបើកច្រកព្រំដែនបន្ថែមទៀត ដើម្បីបន្តកំណើនពាណិជ្ជកម្ម។
«សម្រាប់ជាមួយប្រទេសជិតខាងវិញ យើងបានប្រែក្លាយរួចមកហើយ និងកំពុងបន្តជំរុញតទៅទៀត នូវការធ្វើពាណិជ្ជកម្មជាមួយប្រទេសជិតខាង ព្រោះព្រំដែនរបស់យើងបានក្លាយជាកន្លែងសន្តិភាព មិត្តភាព សហប្រតិបត្តិការ និងការអភិវឌ្ឍរួចទៅហើយ…។ យើងកំពុងចរចាជាមួយនឹងឡាវ ថៃ និងវៀតណាម ដើម្បីបើកច្រកថ្មីៗបន្ថែមទៀត ជំរុញឲ្យមានទំនាក់ទំនងទ្វេភាគី ជាមួយប្រទេសជិតខាងរបស់យើង»។ នេះជាការបញ្ជាក់របស់សម្ដេច ហ៊ុន សែន។
សូមស្ដាប់សំឡេង៖
កាលពីឆ្នាំ២០១៨ ទំហំពាណិជ្ជកម្មរវាងកម្ពុជា និងវៀតណាម មានជាង៥ពាន់លានដុល្លារ។ ទំហំពាណិជ្ជកម្មកម្ពុជា និងថៃមានជាង៧ពាន់លានដុល្លារ ។ ចំណែកទំហំពាណិជ្ជកម្មរវាងកម្ពុជា និងឡាវមានចំនួន ២៤លានដុល្លារអាមេរិក និងទំហំពាណិជ្ជកម្មរវាងកម្ពុជា និងវៀតណាមមានជាង ៥ពាន់លានដុល្លារអាមេរិក។
របាយការណ៍នៃការនាំចេញ-នាំចូលរបស់កម្ពុជា បានបញ្ជាក់ថា ទំហំពាណិជ្ជកម្មកម្ពុជា ជាមួយបរទេសសរុបចំនួន ២៤,៩៨៥លានដុល្លារអាមេរិក នៅឆ្នាំ២០១៨។
ដោយក្នុងនោះការនាំចេញទំនិញរបស់កម្ពុជាទៅតាមបណ្ដាប្រទេសផ្សេងៗ គិតជាទឹកប្រាក់១១,២១៥លានដុល្លារ។ តួលេខនៃការនាំចេញនេះមានការកើនឡើង បើធៀបនឹងរយៈពេលដូចគ្នាឆ្នាំ២០១៧ មានត្រឹមតែ១០,៧៧៧លានដុល្លារ។ ដោយឡែក សម្រាប់ការនាំចូលរបស់កម្ពុជាវិញ គឺមានទំហំ១៣,៧៧១លានដុល្លារ កើនឡើងជាងឆ្នាំ២០១៧ ដែលមានត្រឹមតែ១៣,០១៩លានដុល្លារ។ នេះបើតាមក្រសួងពាណិជ្ជកម្ម ដែលចេញផ្សាយកាលពីថ្ងៃទី២៤ ខែធ្នូ ឆ្នាំ២០១៨៕
Tag:
ហ៊ុន សែន
វៀតណាម
ថៃ
ឡាវ
© រក្សាសិទ្ធិដោយ thmeythmey.com