ភ្នំពេញ៖ «វិធីសាស្ត្របង្រៀន» ជាសៀវភៅប្រភេទមួយថ្មី ដែលមានវិធីសាស្ត្រ និងយុទ្ធសាស្ត្រថ្មីៗ សម្រាប់គ្រូបង្រៀនគ្រប់កម្រិត ក្នុងការបង្ហាត់បង្រៀនសិស្សនៅតាមសាលារៀន ដើម្បីបំពេញបន្ថែមនូវកម្រិតស្តង់ដារសិក្សាក្នុងវិស័យអប់រំកម្ពុជា។ លោក ប្រាក់ ពៅ ជាគ្រូម្នាក់ ក្នុងចំណោមគ្រូទាំងបីនាក់ មកពីវិទ្យាស្ថានជាតិអប់រំ (NIE) ដែលរួមគ្នារៀបរៀងសៀវភៅនេះឡើង បាននិយាយថា គន្លឹះនិងវិធីសាស្ត្រថ្មីៗនៅក្នុងសៀវភៅនេះ លោកគ្រូ-អ្នកគ្រូ យកទៅបង្រៀន នឹងបង្កើនគំនិតដល់សិស្សានុសិស្សឲ្យកាន់តែទូលាយក្នុងការវែកញែករកហេតុផល មានគំនិតសួរដេញដោលក្នុងការសិក្សាតាមបែបស្តង់ដារប្រទេសអភិវឌ្ឍ។
សៀវភៅកម្រាស់ជាង៣០០ទំព័រ ដែលមាន៥ជំពូក បានរំលេចនូវគន្លឹះនិងវិធីសាស្ត្របង្រៀនថ្មីៗ ដូចជាការអភិវឌ្ឍសមត្ថភាពបន្ថែមរបស់គ្រូបង្រៀន និងវិធីសាស្ត្របង្រៀនតាមបែបស្ថាបនានិយមជាដើម។ ក្នុងបទសម្ភាសជាមួយសារព័ត៌មានថ្មីៗ លោក ប្រាក់ ពៅ បានអះអាងថា សៀវភៅ «វិធីសាស្ត្របង្រៀន» បានផ្តោតសំខាន់លើអ្វីថ្មីៗដែលពាក់ព័ន្ធទៅនឹងការបង្រៀនសិស្ស ដើម្បីឲ្យសិស្សមានភាពក្លាហាន ក្នុងការបញ្ចេញគំនិតយោបល់ក្នុងថ្នាក់រៀន ក៏ដូចនៅក្នុងវេទិកាសាធារណៈផ្សេងៗនៅក្នុងសង្គម។ លើសពីនេះ ក៏ជំរុញ និងលើកចិត្តសិស្សឲ្យចេះវាយតម្លៃ ចេះវិភាគ និងចេះបង្កើតគំនិតអ្វីថ្មីៗជាដើម ដើម្បីជៀសផុតពីអ្វីដែលសិស្សចេះតែនៅក្នុងថ្នាក់រៀនតាមអ្វីដែលទន្ទេញចាំតែមាត់ គឺជាអ្វីដែលគ្រូគ្រប់រូបមិនត្រូវការ។ បើតាម លោក ប្រាក់ ពៅ សៀវភៅនេះ បានបញ្ចូលវិធីសាស្ត្របង្រៀនតាមបែបកម្មវិធីសិក្សារបស់ប្រទេសជប៉ុន និងសិង្ហបុរី។
លោក ប្រាក់ ពៅ បានបន្តថា តាមរយៈសៀវភៅ «វិធីសាស្ត្របង្រៀន» គ្រូៗគ្រប់កម្រិតនឹងទទួលបានបច្ចេកទេសបង្រៀនថ្មីៗដល់សិស្ស ដូចជាវិធីសាស្ត្រសង្កេត វិធីរាយការណ៍ វិធីឲ្យសិស្សចេះសិក្សាដោយខ្លួនឯង បច្ចេកទេសក្នុងការដោះស្រាយសំណួរសិស្ស និងវិធីសាស្ត្រថ្មីៗជាច្រើនទៀត។ ក្រៅពីនេះ សៀវភៅនេះ ក៏ល្អសម្រាប់គ្រូដែលទើបនឹងចូលមកបង្រៀន ឲ្យចេះក្នុងការគ្រប់គ្រងថ្នាក់រៀនឲ្យដំណើរការបានល្អ នៅពេលមានសិស្សមិនស្តាប់បង្គាប់ និងការរំខានក្នុងម៉ោងកំពុងសិក្សាជាដើម។
ពីឆ្វេងទៅស្តាំ៖ លោកគ្រូ ឃិន វណ្ឌី លោកគ្រូ បាន កក្កដា និង លោកគ្រូ ប្រាក់ ពៅ ដែលជាអ្នករៀបរៀងសៀវភៅ «វិធីសាស្ត្របង្រៀន»
លោក ប្រាក់ ពៅ បានបញ្ជាក់ដូច្នេះថា«លក្ខណៈពិសេសនៃសៀវភៅនេះ គឺបានបន្ថែមវិធីថ្មីៗ ល្អៗ ប្រហែល២០មេរៀន ដែលកម្មវិធីប្រព័ន្ធអប់រំក្នុងស្រុកយើងមិនទាន់បានអនុវត្ត ដោយទទួលបានសិទ្ធិអនុញ្ញាតបោះពុម្ពចែកចាយពីក្រសួងអប់រំ»។
បើតាមលោក ប្រាក់ ពៅ សៀវភៅនេះ មានមេរៀនសម្រាប់គ្រូបង្រៀនសិស្ស ដែលមិនយល់នូវអ្វីដែលហៅថា ការត្រិះរិះពិចារណានៅក្នុងមេរៀនរបស់គ្រូ, មេរៀនសម្រាប់បង្រៀនសិស្សដែលមិនបញ្ចេញនូវទស្សនវិស័យដ៏សំខាន់នៃការត្រិះរិះពិចារណាដើម្បីកែសម្រួល និងអន្តរកម្មកិច្ចការផ្ទាល់ខ្លួន, មេរៀនគ្រប់គ្រងសិស្សដែលមានឥរិយាបថឈ្លើយក្នុងថ្នាក់រៀន, មេរៀនសិស្សមិនបានបញ្ចប់កិច្ចការសាលា និងមេរៀនបញ្ជ្រាបការអប់រំប្រកបដោយនិរន្តរភាព ជាដើម។ អ្នករៀបរៀងរូបនេះ សង្កត់ធ្ងន់យ៉ាងដូច្នេះថា៖«មេរៀនជាច្រើនក្នុងសៀវភៅ នឹងផ្តល់ប្រយោជន៍ខ្ពស់សម្រាប់ជួយបំពេញសមត្ថភាពគ្រូបង្រៀនឲ្យមានស្តង់ដារក្នុងវិស័យអប់រំ។
លោក-អ្នក អាចទិញសៀវភៅនេះ នៅវិទ្យាស្ថានជាតិអប់រំ ឬក៏អាចទាក់ទងទៅលេខ ០១១ ២៤៦ ៦៦៨, ០៩២ ៨៨៨ ៥១២, ០១២ ៥០០ ០៤២ និង ០១២ ២៧៨ ៧៩៣៕