អាមេរិកប្រាប់តួកគីឲ្យងាកមកទិញខែលការពារ Patriot វិញ បើចង់បាន F-35

អន្តរជាតិ

អាមេរិកប្រាប់តួកគីឲ្យងាកមកទិញខែលការពារ Patriot វិញ បើចង់បាន F-35

03, Apr 2019 , 11:40 am

រូបភាព

ប្រព័ន្ធការពារអាមេរិក Patriot, យន្តហោះ F-35 និងប្រព័ន្ធការពាររុស្ស៊ី S-400

ដោយ: តន ចាន់រិទ្ធារ៉ា

ប្រៀបដូចជាកាប់បំពង់រង់ចាំទឹកភ្លៀង អាមេរិក នៅតែរំពឹងថា តួកគីនឹងបោះបង់គម្រោងទិញប្រព័ន្ធការពារមីស៊ីលរុស្ស៊ី S-400 ហើយបន្តគម្រោងទិញយន្តហោះ F-35 ដដែល។ ប្រមុខការពារជាតិអាមេរិក ផាទ្រីក សាណាហាន់ ថែមទាំងជឿជាក់ថា តួកគីនឹងទិញប្រព័ន្ធការពារ Patriot របស់អាមេរិកវិញទៀតផង។ សម្រាប់លោក សាណាហាន់ បើក្រុងអង់ការ៉ាទិញខែលការពារអាមេរិក នោះគម្រោងលក់ F-35 នៅតែអាចដំណើរការដូចមុន។

នៅថ្ងៃទី១ ខែមេសា អាមេរិកសម្រេចចិត្តផ្អាកកម្មវិធីរួមគ្នាជាមួយតួកគីជុំវិញការផ្គត់ផ្គង់យន្តហោះ F-35 ដែលតួកគីបម្រុងទិញពីអាមេរិក។ ការផ្អាកនេះ ជាការផ្ដល់មេរៀនដល់តួកគីដែលនៅតែចចេសទិញប្រព័ន្ធការពារ S-400 របស់រុស្ស៊ី ទោះជាអាមេរិកព្រមានជាច្រើនលើកក្ដី។ តួកគីមិនដែលស្ដាប់សម្ដីព្រមានរបស់អាមេរិកឡើយ ហើយបន្តគម្រោងទិញខែលការពារពីរុស្ស៊ីដែលអាមេរិកចាត់ទុកជាទឹកនិងភ្លើងជាមួយយន្តហោះ F-35 ។

យ៉ាងណាមិញ នៅថ្ងៃទី២ ខែមេសា អាមេរិកបានផ្ដល់ជម្រើសឲ្យតួកគីបើសមាជិកសម្ព័ន្ធយោធាណាតូមួយនេះនៅតែចង់បាន F-35 ។ រដ្ឋមន្ត្រីស្ដីទីក្រសួងការពារជាតិអាមេរិក ផាទ្រីក សាណាហាន់ បង្ហាញក្ដីរំពឹងថា តួកគីនឹងលុបចោលគម្រោងទិញសព្វាវុធពីរុស្ស៊ី ហើយងាកមកជ្រើសរើសប្រព័ន្ធការពារ Patriot របស់អាមេរិកវិញ។ បើតួកគីពិតជាធ្វើបែបនោះមែន គម្រោងទិញ-លក់យន្តហោះ F-35 នឹងនៅតែបន្តដដែល។

បើតាមទីភ្នាក់ងារព័ត៌មាន AFP ប្រមុខមន្ទីរបញ្ចកោណរូបនេះបានជជែកតាមទូរសព្ទជាមួយសមភាគីតួកគី Hulusi Akar ជុំវិញបញ្ហានេះ ហើយលោករំពឹងថា រឿងនេះនឹងមានច្រកចេញ។ ជាមួយគ្នានេះ លោក សាណាហាន់ ក៏ជឿជាក់ថា សំណើរបស់អាមេរិកដែលចង់ឲ្យតួកគីទិញ Patriot នោះ អាចជាដំណោះស្រាយ ព្រោះខែលការពារនេះមានប្រសិទ្ធភាពច្រើនយ៉ាង។ ត្រង់ចំណុចថា តួកគីទិញឬអត់នោះ លោកឆ្លើយថា បញ្ហានឹងត្រូវបានដោះស្រាយ ហើយតួកគីមានអាវុធការពារដ៏ល្អ។

ការផ្អាកការផ្គត់ផ្គង់យន្តហោះ F-35 ទៅឲ្យតួកគី ធ្វើឡើងក្រោយពេលអាមេរិកប្រាប់ដៃគូរបស់ខ្លួនរាប់សិបខែមកហើយពីគ្រោះថ្នាក់ដែលយន្តហោះអាមេរិកឈរជើងជាមួយខែលការពារមីស៊ីលរុស្ស៊ី។ គម្រោងរបស់តួកគី ធ្វើឲ្យសម្ព័ន្ធយោធាណាតូបារម្ភខ្លាំង ព្រោះរុស្ស៊ីអាចជ្រៀតចូលប្រព័ន្ធការពាររបស់លោកខាងលិចបាន។ ប្រមុខកងទ័ពអាមេរិក ឧត្តមសេនីយ៍ ចូសេហ្វ ដាន់ហ្វត ធ្លាប់និយាយថា F-35 និង S-400 មិនត្រូវគ្នាឡើយ។

តាមពិតទៅ វាជារឿងកម្រមួយដែលប្រទេសសមាជិកសម្ព័ន្ធយោធាណាតូមួយ ទិញសព្វាវុធពីរុស្ស៊ីដែលណាតូចាត់ទុកជាការគំរាមកំហែង ខណៈណាតូត្រូវបង្កើតក្នុងគោលបំណងធំជាងគេ គឺទប់ស្កាត់សហភាពសូវៀត។ ទោះរងការគំរាមពីអាមេរិក ហើយត្រូវបាត់បង់ F-35 ក្ដី តួកគីហាក់គ្មានបំណងបោះបង់គម្រោងទិញ S-400 ឡើយ ឯរឿងយន្តហោះវិញ តួកគីក៏មានជម្រើសផ្សេងដែរដូចជាការទិញយន្តហោះពីរុស្ស៊ីជាដើម៕