ជាតិ
សេដ្ឋកិច្ច
ក្រសួងសេដ្ឋកិច្ចបកស្រាយថា កម្ពុជាជំពាក់បរទេសតែ ៧ពាន់លានដុល្លារប៉ុណ្ណោះ លោក អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ (រូបពីក្រសួង)
× ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ ច្រានចោលការផ្សាយព័ត៌មានថា កម្ពុជាជំពាក់បំណុលបរទេស ១ម៉ឺនលានដុល្លារ។ ក្រសួងបញ្ជាក់ថានេះជាការបកស្រាយខុសបច្ចេកទេស ដែលការពិត សព្វថ្ងៃកម្ពុជាជាប់បំណុលក្រៅប្រទេសតែ ៧ពាន់លានដុល្លារប៉ុណ្ណោះ។ នេះបើតាមសេចក្ដីប្រកាសព័ត៌មានរបស់ក្រសួងនៅថ្ងៃទី២ខែមេសា។
ក្រសួងសេដ្ឋកិច្ចពន្យល់ថា តួលេខជាង ១ម៉ឺនលានដុល្លារអាមេរិកនោះ គឺជាតួលេខនៃការខ្ចីឥណទានសម្បទានដែលរដ្ឋាភិបាលបានចុះកិច្ចព្រមព្រៀងជាមួយដៃគូអភិវឌ្ឍន៍ គិតចាប់ឆ្នាំ១៩៩៣ រហូតមកដល់ដំណាច់ឆ្នាំ២០១៨ ពោលគឺពុំមែនជាតួលេខសន្និធិបំណុលបរទេស ដែលកម្ពុជាជំពាក់ជាក់ស្ដែងនោះទេ។
ក្រសួងបញ្ជាក់ទៀតថា កម្ពុជាជំពាក់បំណុលក្រៅប្រទេស គិតត្រឹមឆ្នាំ២០១៨ មានចំនួន ៧ពាន់លានដុល្លារអាមេរិកប៉ុណ្ណោះ។
ក្រសួងបន្ថែមថា បើគ្រាន់តែចុះកិច្ចព្រមព្រៀងខ្ចីឥណទានពីក្រៅប្រទេស ពុំមានន័យថា កម្ពុជាជំពាក់បំណុលបរទេសនោះទេ គឺលុះត្រាតែយើងបានដកសាច់ប្រាក់មកប្រើប្រាស់។ ហើយក្រៅពីនេះ រដ្ឋាភិបាលក៏មានការបង្វែរសាច់ប្រាក់ដែលមិនបានប្រើប្រាស់មួយចំនួន និងសងប្រាក់ដើមជាបណ្ដើរៗទៅដៃគូវិញផងដែរ។
ក្រសួងអះអាងថា តាមបទដ្ឋានបច្ចេកទេសអន្តរជាតិ ស្ថានភាពបំណុលសាធារណៈក្រៅប្រទេសរបស់កម្ពុជាមាន ចីរភាព និងហានិភ័យកម្រិតទាប ដោយទំហំបំណុលសរុបមានត្រឹម ២១,៤ភាគរយ ធៀបនឹងទំហំផលិតផលក្នុងស្រុកសរុប (GDP) ។ ក្រសួងគូសបញ្ជាក់ថា តាមបច្ចេកទេស កម្ពុជាអាចជាប់បំណុលដល់ទៅ ៤០ភាគរយនៃទំហំ GDP ឯណោះ៕
© រក្សាសិទ្ធិដោយ thmeythmey.com