គ្រូណាហ្គា៖ បញ្ហាផ្លូវអារម្មណ៍កីឡាករ ជាមូលហេតុនាំឲ្យចាញ់ក្រុមសិង្ហបុរី

កីឡាជាតិ

ជាតិ

គ្រូណាហ្គា៖ បញ្ហាផ្លូវអារម្មណ៍កីឡាករ ជាមូលហេតុនាំឲ្យចាញ់ក្រុមសិង្ហបុរី

03, Apr 2019 , 2:02 pm

រូបភាព

កីឡាករណាហ្គាវើល(ខៀវ)ប្រជែងដណ្តើមបាល់ជាមួយកីឡាករ Tampines Rover នាជំនួបនៅពហុកីឡដ្ឋានជាតិ

ដោយ:

ក្រុមជើងឯកលីគកំពូលកម្ពុជាឆ្នាំ២០១៨ ណាហ្គាវើលបានរងបរាជ័យ ៥-១ ក្រោមថ្វីជើងក្រុម Tampines Rovers របស់សិង្ហបុរី នាជំនួបលើកទី៣ក្នុងពូល F នៃព្រឹត្តិការណ៍ AFC Cup 2019 កាលពីថ្ងៃទី២ ខែមេសា នៅពហុកីឡដ្ឋានជាតិ។ លោក មាស ចាន់ណា ហាក់បង្ហាញការអន់ចិត្តលើទម្រង់លេងរបស់កូនក្រុម ហើយលោកចាត់ទុកការបរាជ័យនេះ ដោយសារកីឡាករខ្វះការប្រមូលអារម្មណ៍ក្នុងការប្រកួត។

លោក មាស ចាន់ណា គ្រូបង្វឹកក្រុមណាហ្គាវើលហាក់ដាក់បន្ទុកលើស្មារតីរបស់កីឡាករ ជាមូលហេតុនាំឲ្យក្រុមណាហ្គាវើលរងបរាជ័យយ៉ាងធ្ងន់ធ្ងរនៅលើទឹកដីខ្លួន។ សម្រាប់លោក ចាន់ណា កីឡាករមួយចំនួន ដែលមិនបានសិក្សាអប់រំផ្នែកចិត្តសាស្ត្រ គឺជាហេតុធ្វើឲ្យកីឡាករឆាប់មានអារម្មណ៍មួរម៉ៅ ក្រោយរកគ្រាប់បាល់ជូនក្រុមមិនបាន។ លោកជឿជាក់ថា បើកីឡាករយល់ដឹងផ្នែកចិត្តសាស្ត្រកីឡា នឹងធ្វើឲ្យពួកគេអាចប្រមូលអារម្មណ៍តាំងពីដើមរហូតដល់ចប់ ទោះបីមានរឿងអ្វីមិនល្អកើតឡើងក៏ដោយ។

លោកសង្កេតឃើញថា កីឡាករណាហ្គាវើលធ្វើបានល្អនៅតង់ទី១ ក្រោយពួកគេនៅមានការប្រមូលអារម្មណ៍បានល្អ។ ប៉ុន្តែចូលដល់ទង់ទី២ពួកគេបានបង្កកំហុសជាច្រើន ដែលជាហេតុធ្វើឲ្យគូប្រកួតមានឱកាសជាច្រើនក្នុងការរកគ្រាប់បាល់។ ហើយកំហុសទាំងនេះ អាចបណ្តាលមកពីការធ្លាក់ទឹកចិត្ត និងខ្វះការប្រមូលអារម្មណ៍។

ក្រុមកីឡាករ Tampines Rovers អបអរជាមួយគ្រាប់បាល់ ដែលពួកសម្រេចបានលើក្រុមណាហ្គាវើលនៅពហុកីឡដ្ឋានជាតិ

«ខ្ញុំគិតថា នៅតង់ទី១យើងធ្វើបានល្អមែនទែន! យើងបានគ្រប់គ្រងបាល់ច្រើនជាង Tampines Rovers ស្ទើរតែគូប្រកួតគ្មានឱកាសរកគ្រាប់បាល់។ ប៉ុន្តែជាអកុសលចូលដល់តង់ទី២ គឺយើងមានបញ្ហាខ្លាំងមែនទែនក្រោយគូប្រកួតអាចរកគ្រាប់បាល់ដោយការប្រចាំគ្នារបស់កីឡាករយើង។ ពាក់ព័ន្ធបញ្ហានេះសំខាន់ គឺលើការប្រមូលអារម្មណ៍របស់កីឡាករ។ កីឡាករយើងពេលក្ដៅតិចតួច ហត់តិចតួច ចាប់ផ្ដើមធ្លាក់ការប្រមូលអារម្មណ៍ ដែលបង្កឲ្យគូប្រកួតអាចរកគ្រាប់បាល់»។ នេះជាការលើកឡើងរបស់លោក មាស ចាន់ណា នាសន្និសីទសារព័ត៌មានក្រោយការប្រកួត។

ក្រុមណាហ្គាវើលដែលបាននាំមុខគូប្រកួត ១-០ នៅត្រឹមនាទីទី២៤ បានចាញ់ក្រុម Tampiones Rovers របស់សិង្ហបុរីក្នុងលទ្ធផល ៥-១ សម្រាប់ការប្រកួតលើកទី៣ក្នុងពូល F នៃពានរង្វាន់ទ្វីបអាស៊ីលំដាប់ទី២ AFC Cup 2019 កាលពីរសៀលថ្ងៃទី២ ខែមេសា ឆ្នាំ២០១៩ នៅពហុកីឡដ្ឋានជាតិ។

ការបរាជ័យនេះនាំឲ្យណាហ្គាវើលបន្តឈរលេខរៀងទី៣ ដោយរក្សា៣ពិន្ទុដដែល ខណៈក្រុម Tampines Rovers ឡើងឈរកំពូលតារាងដោយមាន៧ពិន្ទុ ក្រោយក្រុម Hanoi FC ប្រកួតចាញ់ក្រុម Yangon United ក្នុងលទ្ធផល ១-០ នៅលើទឹកដីខ្លួន។ សម្រាប់ជំនួបបន្ទាប់ក្រុមណាហ្គាវើលត្រូវធ្វើដំណើរទៅទឹកដីសិង្ហបុរី ដើម្បីប្រកួតជើងទី២ជាមួយ Tampines Rovers នៅថ្ងៃទី១៧ ខែមេសា ឆ្នាំ២០១៩៕