ជាតិ
រដ្ឋមន្ត្រីពាណិជ្ជកម្ម ស្នើឲ្យធនាគារចិន ទូទាត់ប្រាក់រៀលខ្មែរ តាមប្រព័ន្ធអេឡិចត្រូនិក ដើម្បីជំរុញធុរកិច្ចទ្វេភាគី
×![]()
ដោយ: ធឿន បញ្ញាឬទិ្ធ
ភ្នំពេញ៖ ក្រសួងពាណិជ្ជកម្ម ស្នើឲ្យធនាគារចិនប្រចាំកម្ពុជា គាំទ្រការប្រើប្រាស់ និងទូទាត់រូបិយប័ណ្ណខ្មែរ (ប្រាក់រៀល) តាមរយៈប្រព័ន្ធអេឡិចត្រូនិក ដើម្បីជំរុញដល់ពាណិជ្ជកម្ម និងពង្រឹងទំនាក់ទំនងសេដ្ឋកិច្ច នៃការវិនិយោគប្រទេសទាំងពីរ។ ការស្នើរបស់រដ្ឋមន្ត្រីពាណិជ្ជកម្មនេះ ធ្វើឡើងនៅក្នុងជំនួបលោក វ៉ាង ប៊ីង (WANG Bing) នាយកប្រតិបត្តិរងនៃធានាគារចិន ប្រចាំទីក្រុងហុងកុង កាលពីព្រឹកថ្ងៃអង្គារ៍ ទី០២ ខែមេសា។
លោក ប៉ាន សូរស័ក្តិ បានជំរុញឲ្យតំណាងធនាគារចិន ទទួលយកការទូទាត់ប្រាក់រៀល ឲ្យកាន់តែទូលំទូលាយ សម្រាប់សកម្មភាពធុរកិច្ច និងវិនិយោគទ្វេភាគី ។ ជាពិសេសការដោះដូរពាណិជ្ជកម្មតាមប្រព័ន្ធអេឡិចត្រូនិក ឬហៅថា E-Commerce ដោយប្រើប្រាស់បច្ចេកវិទ្យា E-Payment និង QR Code ដូចគ្នាជាមួយកម្មវិធីទូរស័ព្ទដៃ WeChat ឬ Alipay ជាដើម។
ក្រៅពីជំរុញឲ្យប្រតិភូធនាគារចិនទូទាត់ប្រាក់រៀលតាមប្រព័ន្ធអេឡិចត្រូនិកនេះ រដ្ឋមន្ត្រីពាណិជ្ជកម្ម ក៏ស្នើឲ្យលោក WANG Bing ពិនិត្យលទ្ធភាពវិនិយោគលើការសាងសង់ឡសម្ងួត (សៃឡូ) នៅតាមបណ្តាខេត្តសំខាន់ៗក្នុងប្រទេសកម្ពុជា ដើម្បីរក្សាទុកកសិផលក្នុងរយៈពេលយូរ និងផ្ដល់ឥណទានដល់ប្រជាកសិករ ជាពិសេសសហគ្រាសខ្នាតតូច និងមធ្យម ដើម្បីពង្រឹងការអភិវឌ្ឍខ្សែចង្វាក់តម្លៃផលិតផល ដែលមានសក្តានុពលនានា ហើយសំដៅលើការបង្កើតតម្លៃបន្ថែម និងធ្វើពិពិធកម្មការនាំចេញទៀតផង។
ទាក់ទងសំណើរបស់ក្រសួងពាណិជ្ជកម្មនេះ នាយកប្រតិបត្តិរងនៃធានាគារចិន លោក WANG Bing បានសន្យាជួយកៀងគរក្រុមហ៊ុនចិន ដែលមានជំនាញ និងបទពិសោធន៍គ្រប់គ្រាន់ ដើម្បីវិនិយោគលើវិស័យកសិ-ឧស្សាហកម្មនៅកម្ពុជានេះ។ ប៉ុន្តែចំពោះសំណើរលើការទូទាត់ប្រាក់រៀលតាមប្រព័ន្ធអេឡិចត្រូនិកនោះ លោក WANG Bing មិនទាន់ឆ្លើយតបអ្វីឡើយ។
បច្ចុប្បន្នធនាគារចិន នៅក្នុងប្រទេសកម្ពុជា ត្រូវបានរដ្ឋាភិបាលអនុញ្ញាតឲ្យប្រើប្រាស់ប្រាក់យ័ន តាមរយៈប្រព័ន្ធធនាគារ ដើម្បីសម្រួលការធ្វើពាណិជ្ជកម្ម វិនិយោគ និងទេសចរណ៍ ព្រមទាំងការបង្កើតការិយាល័យចិនមួយ (Chinese Desk) នៅក្រសួងពាណិជ្ជកម្ម ក្នុងការសម្រួលដល់ធុរជនចិនធ្វើប្រតិបត្តិការពាណិជ្ជកម្មទៀតផង។ នេះបើតាមហ្វេសប៊ុកក្រសួងពាណិជ្ជកម្ម។
អត្ថបទទាក់ទង
កន្លងមកធនាគារជាតិ ក៏បានជំរុញឲ្យប្រើប្រាស់ប្រាក់រៀលនៅក្នុងវិស័យពាណិជ្ជកម្មដែរ ប៉ុន្តែនៅមិនទាន់មានសន្ទុះខ្លាំងនៅឡើយ។ នោះក៏ព្រោះតែការប្រើប្រាស់ប្រាក់ដុល្លារក្នុងការវិនិយោគ ជាចរន្តសេដ្ឋកិច្ចពិភពលោក។ ប៉ុន្តែដើម្បីឲ្យប្រាក់រៀលកើនឡើងនោះ លុះត្រាតែមានការចូលរួមពីគ្រឹះស្ថានហិរញ្ញវត្ថុ និងវិស័យឯកជន ក្នុងការចរាចរណ៍ប្រាក់រៀលនេះ ។ ត្រង់ចំណុចនេះធនាគារជាតិ បានប្រកាសឲ្យធនាគារ និងវិស័យគ្រិះស្ថានមីក្រូហិរញ្ញវត្តុ ត្រូវផ្ដល់កម្ចីជាប្រាក់រៀលប្រមាណ១០ភាគរយ ក្នុងការដំណើរការផ្ដល់សេវាកម្ចីរបស់ខ្លួន។
ការសិក្សាស្រាវជ្រាវដុល្លាររូបនីយកម្មនៅតាមតំបន់នានាក្នុងឆ្នាំ២០១៧កន្លងមក បានរកឃើញថា ក្នុងរាជធានីភ្នំពេញមានការប្រើប្រាសលុយដុល្លារជាង៦០ ភាគរយ, ខេត្តសៀមរាបប្រើប្រាស់លុយដុល្លារមានជាង ៦០ ភាគរយ ហើយតំបន់ជនបទមានត្រឹមជាង២០ភាគរយប៉ុណ្ណោះ។ នេះបើយោងតាមអ្នកជំនាញធ្វើបទបង្ហាញស្តីពី លទ្ធផលអង្កេតបឋមនៃគម្រោងដំណាក់កាលទី២ លើការលើកកម្ពស់ការប្រើប្រាស់ប្រាក់រៀលនៅកម្ពុជាកាលពីថ្ងៃទី ១៩ ខែមីនា ៕
Tag:
ប៉ាន សូរសក្តិ
ពាណិជ្ជកម្ម
© រក្សាសិទ្ធិដោយ thmeythmey.com
