ONE Championship
កីឡាជាតិ
ជាតិ
ចាន់ រតនា និយាយអំពីទំនាក់ទំនងជិតស្និទ្ធជាមួយតារាគុនចម្រុះ Phoe Thaw
×
ដោយ៖ ស៊ីធី
ម្ចាស់ក្លិបប្រដាល់សិល្បៈ ចាន់ រតនា បានបង្ហើបប្រាប់ថាខ្លួនមានទំនាក់ទំនងយ៉ាងជិតស្និទ្ធជាមួយតារាគុនចម្រុះដ៏លេចធ្លោ Phoe “Bushido” Thaw របស់ក្លិប Myaing Ka LayA Phyu Yaung Thway របស់មីយ៉ាន់ម៉ា។ ការលើកឡើងបែបនេះ បន្ទាប់ពី Phoe Thaw បានមកលេង និងសួរសុខទុក្ខ ចាន់ រតនា កាលពីពាក់កណ្ដាល ខែមីនា ឆ្នាំ២០១៩។
អ្នកលេងគុនចម្រុះកម្ពុជា និងជាគ្រូបង្វឹកផងបានបញ្ជាក់យ៉ាងដូច្នេះថា៖«ខ្ញុំបានស្គាល់ Phoe Thaw ប្រហែល ៣ឆ្នាំ ហើយ...ហើយគាត់មកលេងខ្ញុំញឹកញាប់ ពួកយើងរាប់អានគ្នាក្នុងនាមជាកីឡាករគុនចម្រុះ។ ពេលខ្លះ ពេលគាត់ឡើងវ៉ៃ ខ្ញុំធ្លាប់ទៅហាត់ជាមួយគ្នានៅក្លិបគាត់ និង ឲ្យទឹកគាត់ពេលគាត់ឡើងវ៉ៃ ៣ ទៅ៤ ដងដែរ និងធ្លាប់ហ្វឹកហាត់ត្រៀមវ៉ៃជាមួយគ្នា។»
ចំណែក Phoe Thaw បានរៀបរាប់នាពេលលេងស្រុកខ្មែរថា កម្ពុជាស្រដៀងមីយ៉ាន់ម៉ាណាស់ហើយ អាហារនៅទីនេះមិនខុសគ្នាខ្លាំងពីអាហារនៅស្រុកកំណើតរបស់គេឡើយ ទាំងវប្បធម៌និងប្រជាជនគឺប្រហាក់ប្រហែលគ្នា។ ពេលមកលេងនៅកម្ពុជា Phoe Thaw តែងតែមិនបំភ្លេច ចាន់ រតនា។ កីឡាករប្រដាល់មីយ៉ានម៉ាដដែលនេះ បានចាត់ទុក កម្ពុជាជាផ្ទះទី២របស់គេ និង ចង់ពង្រីកទំនាក់ទំនងបន្ថែមទៀតក្នុងពិភពគុនចម្រុះ។ មិនត្រឹមតែមកលម្ហែកាយក្រោយឈ្នះកីឡាករ ឥណ្ឌូណេស៊ី Yohan នាដើមខែ មីនា ប៉ុន្តែ Phoe Thaw បានបង្កើតភាពរីករាយ និង ភាពស្និទ្ធស្នាល ដោយបង្ហាត់សិស្សរួមគ្នានៅ ក្លិបប្រដាល់សិល្បៈរបស់ ចាន់ រតនា ទៀតផងអំឡុងពេលការស្នាក់នៅលម្ហែកាយនេះ។
តារាប្រចាំសង្វៀន ONE Championship ទាំងពីរមិនត្រឹមតែបង្ហាត់សិស្សនៅក្លិបសិល្បៈប៉ុណ្ណោះទេ ថែមទាំងធ្វើសកម្មភាពនានារួមគ្នា និង ការជជែកគ្នាយ៉ាងច្រើនដើម្បីលៃលករួមចំណែកធ្វើឲ្យគុនចម្រុះរីកចម្រើនទៅមុខឥតឈប់ឈរក្នុងដំណើរមកលេងនៅកម្ពុជាលើកទី៤។
លើសពីនេះទៅទៀត ចាន់ រតនា បានគូសបញ្ជាក់ទៀតថា តារាគុនចម្រុះរបស់ក្លិប Myaing Ka LayA Phyu Yaung Thway បានព្រមព្រៀងជួយក្លិបសិល្បៈ របស់ រតនា តាមតែអាចធ្វើទៅបានតាមលទ្ធភាពដូចជាសម្ភារៈហ្វឹកហាត់ និងការងារ។ ទោះមិនទាន់មានការផ្លាស់ប្ដូរសិស្សទៅហ្វឹកហាត់រវាងក្លិបទាំងពីរ ប៉ុន្តែ Phoe Tham សន្យាជ្រោមជ្រែងក្លិបសិល្បៈទៅតាមលទ្ធភាពផ្ទាល់ខ្លួន និង រក្សាទំនាក់ទំនងឲ្យកាន់តែល្អប្រសើរ បន្ទាប់ពីក្លិបនេះត្រូវបានបង្កើតឡើងជិត ២ ឆ្នាំក្នុងន័យបណ្ដុះបណ្ដាលគុនចម្រុះ។ ហើយបើសិនចាន់ រតនា ទៅលេងឬ ហ្វឹកហាត់ នៅមីយ៉ាន់ម៉ា គឺ ត្រូវស្វាគមន៍ដូចបងប្អូន ដូចដែល រតនា ធ្វើដាក់ Phoe Thaw នៅកម្ពុជាអីចឹងដែរ។
តារាគុនចម្រុះទាំងពីរ ឡើងសង្វៀនលំដាប់ពិភពលោក One Championship ប្រហាក់ប្រហែលគ្នា ពោល រតនា វ៉ៃបាន ៧ដង ខណៈដែ Phoe Thaw វ៉ៃបាន ៨ ដង។ ចាន់ រតនា ឡើងសង្វៀន One ចំនួន ៧ ដង ដោយឈ្នះចំនួន ៤ និង ចាញ់ចំនួន ៣ ដង។ រតនា ឡើងប្រកួតលើកដំបូងជាអន្តរជាតិ នៅសង្វៀន One តែម្ដងពេលរៀបចំនៅព្រះរាជាណាចក្រកម្ពុជាកាលឆ្នាំ ២០១៤។ រតនា ធ្វើឲ្យខ្ពស់មុខមាត់ និង ទទួលបានការចាប់អារម្មណ៍ជាសាកលដោយវ៉ៃកីឡាករគុនចម្រុះ ABRO Fernandez របស់ឥណ្ឌូណេស៊ី ឲ្យចុះចាញ់ត្រឹមទឹកទី២ កាល ខែ ធ្នូ ឆ្នាំ ២០១៨ កន្លងទៅនៅប្រទេសម៉ាឡេស៊ី នាការប្រកួតចុងក្រោយរបស់ខ្លួន។
រីឯ Phoe Thaw ជាតារាប្រចាំសង្វៀន One Championship ដូចគ្នា ដោឡើងប្រកួតបានចំនួន ៨ ដង ដែលក្នុងនោះឈ្នះ ៧ ដង និង ចាញ់តែម្ដងគត់។ កីឡាករកម្ពុជា ដែល Phoe Thaw ធ្លាប់វ៉ៃជាមួយនិងយកឈ្នះគឺ សរ សី ហើយ កីឡាកររបស់មីយ៉ាន់ម៉ា រូបនេះប្រើពេលត្រឹម ១ ទឹកប៉ុណ្ណោះដើម្បីផ្ដួលកីឡាករតំណាងឲ្យកម្ពុជា។ ក្នុងការប្រកួតចុងក្រោយមុនមកលម្ហែកាយនៅ ព្រះរាជាណាចក្រកម្ពុជា តារាជើងចាស់ Phoe Thaw វ័យ៣៤ឆ្នាំ បានទទួលជ័យជម្នះលើកទី៧ក្នុងអាជីពគុនចម្រុះរបស់ខ្លួននៅពីមុខទស្សនិកជន យ៉ាងច្រើនកុះករ ពេលផ្ដួលកីឡាករឥណ្ឌូនេស៊ី Yohan “The Ice Man” Mulia Legowo ក្នុងទឹកទី១នៅ ONE: REIGN OF VALOR នាទីក្រុងយ៉ាំងហ្គោន៕
Tag:
ONE Championship
ចាន់ រតនា
Phoe Thaw
© រក្សាសិទ្ធិដោយ thmeythmey.com