ជាតិ
សង្គមជាតិ
ក្រោយសង៧ម៉ឺនដុល្លារ កញ្ញា យិន ម៉ាណា រួចទោសរដ្ឋប្បវេណី តែនៅជាប់ទោសព្រហ្មទណ្ឌ
× លោក យិន ហ្គិច ឪពុករបស់កញ្ញា យិន ម៉ាណា ដែលបានបើករថយន្តបុកកញ្ញា ឌុំ រីដា និស្សិតឆ្នាំទី៤ ឲ្យស្លាប់ភ្លាមៗនៅកន្លែងកើតហេតុ បានសុំសម្រុះសម្រួលជាមួយអ្នកស្រី ផាត់ ពៅ ម្តាយរបស់កញ្ញា ឌុំ រីដា ហើយក៏ឈានដល់ព្រមព្រៀងគ្នា ដោយលោក យិន ហ្គិច បានសងសំណង៧ម៉ឺនដុល្លារ ហើយអ្នកស្រី ផាត់ ពៅ ក៏សុខចិត្តទទួលយក។ ការសម្រុះសម្រួលគ្នានេះ គឺធ្វើឡើងនៅចំពោះមុខមេធាវីទាំងសងខាង នៅឯទីស្តីការគណៈរដ្ឋមន្ត្រី កាលពីថ្ងៃទី៣ ខែមេសា ឆ្នាំ២០១៩។
អ្នកស្រី មួង ធនលាភី មេធាវីរបស់គ្រួសារកញ្ញា ឌុំ រីដា ប្រាប់សារព័ត៌មានថ្មីៗ តាមទូរសព្ទថា កូនក្តីរបស់អ្នកស្រី ព្រមទទួលយកសំណងនេះដោយសុទ្ធចិត្ត ដោយគ្មានការបង្ខិតបង្ខំឡើយ។ អ្នកស្រី និយាយថា «ដោយសារមានការព្រមព្រៀងគ្នា ខ្ញុំយល់ថា ការសងសំណងនេះ គឺជាយុត្តិធម៌សម្រាប់កូនក្តីរបស់ខ្ញុំ»។
មុនទទួលបានសំណង៧ម៉ឺនដុល្លារ ម្តាយរបស់កញ្ញា ឌុំ រីដា ប្តឹងទារសំណង២០ម៉ឺនដុល្លារ។
អ្នកស្រីមេធាវី បកស្រាយថា ក្រោយសងសំណងហើយ កញ្ញា យិន ម៉ាណា បានរួចផុតពីការទទួលខុសត្រូវផ្នែករដ្ឋប្បវេណី តែនៅជាប់ទោសនិងការទទួលខុសត្រូវផ្នែកព្រហ្មទណ្ឌ។ អ្នកស្រី ពន្យល់ពីផ្លូវច្បាប់យ៉ាងដូច្នេះថា «ខាងកូនក្តីរបស់ខ្ញុំ គឺចប់ហើយ តែខាងព្រហ្មទណ្ឌនៅទេ ព្រោះខាងព្រហ្មទណ្ឌ គឺព្រះរាជអាជ្ញា ជាអ្នកចោទប្រកាន់»។
កញ្ញា យិន ឃុនម៉ី ហៅ យិន ម៉ាណា បានបើករថយន្តបុកកញ្ញា ឌុំ រីដា កាលពីថ្ងៃទី២៦ ខែមីនា ឆ្នាំ២០១៩ ក្នុងខណ្ឌទួលគោក រាជធានីភ្នំពេញ។ គ្រួសារកញ្ញា យិន ម៉ាណា ក៏បានឲ្យគេយកថវិកា៥ពាន់ដុល្លារ ទៅចូលបុណ្យសពកញ្ញា ឌុំ រីដា ផងដែរ។
បច្ចុប្បន្ន កញ្ញា យិន ម៉ាណា កំពុងជាប់ឃុំបណ្តោះអាសន្ន នៅពន្ធនាគាររាជធានីភ្នំពេញ (PJ ) ក្រោមបទចោទ «បើកបរធ្វេសប្រហែស ដែលបណ្តាលឲ្យអ្នកដទៃស្លាប់»។
លោកស្រី មួង ធនលាភី និង លោក សុខ អួង គឺជាមេធាវីស្ម័គ្រចិត្តរបស់ក្រុមមេធាវីរបស់សម្តេច ហ៊ុន សែន ដែលត្រូវបានបញ្ជូនទៅការពារក្តីឲ្យគ្រួសារកញ្ញា ឌុំ រីដា៕
Tag:
ចរាចរណ៍
ឌុំ រីដា
យិន ម៉ាណា
© រក្សាសិទ្ធិដោយ thmeythmey.com