អន្តរជាតិ
អាមេរិក គ្រោងបញ្ជូននាវាដឹកយន្តហោះទីពីរទៅវៀតណាម
× សហរដ្ឋអាមេរិករំពឹងថា ខ្លួននឹងឈានដល់កិច្ចព្រមព្រៀងជាមួយវៀតណាមក្នុងការបញ្ជូននាវាដឹកយន្តហោះទៅកាន់ប្រទេសអាស៊ីអាគ្នេយ៍មួយនេះ។ អាមេរិក និងវៀតណាមដែលធ្លាប់ប្រយុទ្ធគ្នាក្នុងសង្គ្រាមវៀតណាមលើកទី២ ប្រែទៅជាជិតស្និទ្ធនឹងគ្នាកាន់តែខ្លាំងនៅប៉ុន្មានឆ្នាំចុងក្រោយនេះ។ បើលេចជារូបរាង វាជាលើកទីពីរដែលនាវាដឹកយន្តហោះអាមេរិកចូលចតកំពង់ផែវៀតណាមតាំងពីចប់សង្គ្រាមមក។ អាមេរិកថែមទាំងចង់ឲ្យមានការចូលចតបែបនេះជារៀងរាល់ឆ្នាំទៀតផង។
នាវាដឹកយន្តហោះ USS Carl Vinson គឺជានាវាដឹកយន្តហោះទីមួយរបស់អាមេរិកដែលចូលចតកំពង់ផែរបស់វៀតណាម អតីតគូសត្រូវស្លាប់រស់របស់អាមេរិកក្នុងសង្គ្រាមវៀតណាម។ វត្តមាននាវាដឹកយន្តហោះនេះ ជាសញ្ញាបង្ហាញឲ្យឃើញពីភាពរឹងមាំក្នុងទំនាក់ទំនងអាមេរិក និងវៀតណាមដែលមានការបារម្ភដូចគ្នា គឺការងើបឡើងរបស់ចិន និងសកម្មភាពរបស់មហាយក្សមួយនេះនៅសមុទ្រចិនខាងត្បូងដែលវៀតណាមជាភាគីទាមទារមួយ។
ឧបការីក្រសួងការពារជាតិអាមេរិក Randall Schriver នៅថ្ងៃទី៣ ខែមេសា បង្ហាញក្ដីសង្ឃឹមថា អាមេរិក និងវៀតណាមនឹងឯកភាពគ្នាដល់ដំណើរទស្សនកិច្ចរបស់នាវាដឹកយន្តហោះអាមេរិកនៅវៀតណាមនៅក្នុងឆ្នាំ២០១៩ នេះ។ មិនមែនតែឆ្នាំ២០១៩ ឡើយ លោក Schriver ដែលទទួលបន្ទុកតំបន់ឥណ្ឌូ-ប៉ាស៊ីហ្វិក បង្ហើបដែរថា អាមេរិកចង់ឃើញការចូលចតបែបនេះ ក្លាយជាទម្លាប់ប្រចាំតែម្ដង ដើម្បីជាសញ្ញានៃទំនាក់ទំនងចាស់ទុំ និងយុទ្ធសាស្ត្រ។
បើតាមការផ្សាយរបស់ទីភ្នាក់ងារព័ត៌មាន Reuters មន្ត្រីជាន់ខ្ពស់មន្ទីរបញ្ចកោណដដែលក៏រំពឹងថា អាមេរិកនឹងមាននាវាល្បាតមួយក្រុមទៀតសម្រាប់លក់ឲ្យវៀតណាមដើម្បីឲ្យរដ្ឋអាស៊ីអាគ្នេយ៍មួយនេះមានសមត្ថភាពខ្លាំងផ្នែកកិច្ចការសមុទ្រ។ កាលពីថ្ងៃទី១ ខែមេសា អាមេរិកទើបតែប្រគល់នាវាល្បាតចំនួន៦គ្រឿងមានតម្លៃសរុប១២លានដុល្លារទៅឲ្យកងឆ្មាំការពារឆ្នេរវៀតណាម។ នេះជាលទ្ធផលនៃជំនួបរវាងប្រធានាធិបតីអាមេរិក និងមេដឹកនាំវៀតណាមនាពេលកន្លងមក។
តាំងពីអាមេរិកដកថយនៅឆ្នាំ១៩៧៥ ទំនាក់ទំនងរវាងសត្រូវទាំងពីរធ្លាប់តែល្អក់កករព្រោះវៀតណាមប្រកាន់របបដឹកនាំកុម្មុយនីស្តដែលផ្ទុយពីទស្សនៈអាមេរិក។ ប៉ុន្តែបញ្ហាជាមួយចិន ធ្វើឲ្យប្រទេសទាំងពីរត្របាញ់ចូលគ្នាកាន់តែរឹងមាំ។ ការភ័យបារម្ភជាចម្បង គឺសកម្មភាពវាតទីរបស់ចិននៅសមុទ្រចិនខាងត្បូង។ ដ្បិតមានសមត្ថភាពទាបជាង វៀតណាមមិនអាចធ្វើអ្វីចិនបានឡើយ ហើយបានត្រឹមស្រែកឲ្យចិនបញ្ឈប់សកម្មភាពប៉ុណ្ណោះ។
អាមេរិកឯណេះ ទោះមិនមែនជាភាគីពាក់ព័ន្ធក្នុងសំណុំរឿងសមុទ្រចិនខាងត្បូងអ្វីក៏ដោយ បានយកសេរីភាពនាវាចរណ៍ដើម្បីការពារការបញ្ជូនាវាចម្បាំងរបស់ខ្លួនចូលដែនទឹកដ៏សំខាន់មួយនេះ ដែលជាផ្លូវដឹកជញ្ជូនទំនិញតម្លៃច្រើនជាង៣ទ្រីលានដុល្លាររៀងរាល់ឆ្នាំ។ សកម្មភាពរបស់អាមេរិក ធ្វើឲ្យចិនក្ដៅស្លឹកត្រចៀកយ៉ាងខ្លាំង ព្រោះជារឿយៗនាវាចម្បាំងអាមេរិកចូលកៀកដែនកោះដែលខ្លួនកំពង់ត្រួតត្រាទៀតផង៕
Tag:
អាមេរិក
វៀតណាម
ចិន
សមុទ្រចិនខាងត្បូង
© រក្សាសិទ្ធិដោយ thmeythmey.com