ជាតិ
នយោបាយជាតិ
លោក នេត សាវឿន ទៅជួប FBI ហើយគ្រោងចុះអនុស្សរណៈជាមួយគ្នាលើកដំបូង រូបពីហ្វេសប៊ុករបស់លោក នេត សាវឿន
× នាយឧត្តមសេនីយ៍ នេត សាវឿន អគ្គស្នងការនគរបាលជាតិ បានដឹកនាំគណៈប្រតិភូ ចាកចេញពីកម្ពុជា នៅព្រឹកថ្ងៃទី៤ ខែមេសា ឆ្នាំ២០១៩នេះ ឆ្ពោះទៅកាន់សហរដ្ឋអាមេរិក តាមការអញ្ជើញរបស់ការិយាល័យស៊ើបអង្កេត FBI។
អគ្គស្នងការនគរបាលជាតិ បានស្រង់ប្រសាសន៍របស់ឧត្តមសេនីយ៍ឯក ឆាយ គឹមខឿន អគ្គស្នងការរងនិងជាអ្នកនាំពាក្យអគ្គស្នងការនគរបាលជាតិ ទៅចុះផ្សាយថា គោលបំណងនៃដំណើរទស្សនកិច្ចរបស់នាយឧត្តមសេនីយ៍ នេត សាវឿន គឺដើម្បីផ្លាស់ប្តូរបទពិសោធ និងពង្រឹងកិច្ចសហប្រតិបត្តិការប្រយុទ្ធប្រឆាំងនឹងបទឧក្រិដ្ឋរួមគ្នា។
លោក បន្ថែមថា គោលបំណងមួយទៀត គឺដើម្បីចុះហត្ថលេខាលើអនុស្សរណ:យោគយល់គ្នា (MOU) បង្កើតក្រុមប្រតិបត្តិការរួមគ្នា ហៅកាត់ថា Task Force ដើម្បីប្រយុទ្ធប្រឆាំងការឆ្លងដែននិងបញ្ហាផ្សេងៗទៀត។ អ្នកនាំពាក្យ បញ្ជាក់ថា ក្នុងខ្លឹមសារនៃ MOU ក៏រួមមានការជួយបណ្តុះបណ្តាល និងបំពាក់សម្ភារបច្ចេកទេសមួយចំនួន ដែលបម្រើដល់កិច្ចសហប្រតិបត្តិការផងដែរ។
អគ្គស្នងការនគរបាលជាតិ បានសរសេរពីសម្តីរបស់លោក ឆាយ គឹមខឿន យ៉ាងដូច្នេះថា «អគ្គស្នងការនគរបាលជាតិ តែងមានទំនាក់ទំនងនិងកិច្ចសហការល្អជាមួយ FBI របស់អាមេរិក ប៉ុន្តែការចុះហត្ថលេខានេះ គឺជាលើកទីមួយ រវាងអគ្គស្នងការនគរបាលជាតិ និង FBI»។
ដំណើរទស្សនកិច្ចរបស់លោក នេត សាវឿន មានរយៈពេល៥ថ្ងៃ គឺចាប់ពីថ្ងៃទី៥ រហូតដល់ថ្ងៃទី១០ ខែ មេសា ឆ្នាំ២០១៩៕
© រក្សាសិទ្ធិដោយ thmeythmey.com