មន្ត្រីជាន់ខ្ពស់ក្រសួងការបរទេសអាមេរិកប្រកាសថា អាមេរិកបានចូលរួមផ្តល់ថវិកាប្រមាណ១៤០លានដុល្លារ ដើម្បីគាំទ្រកម្ពុជាក្នុងប្រតិបត្តិការបោសសម្អាតមីន និងយុទ្ធភណ្ឌមិនទាន់ផ្ទុះដែលបន្សល់ទុកពីសម័យសង្គ្រមចន្លោះពីឆ្នាំ ១៩៩៣ដល់ឆ្នាំ ២០១៨។ អាមេរិកវាយតម្លៃថា កម្ពុជាមានលទ្ធភាពបច្ចេកទេសត្រឹមត្រូវដើម្បីសម្រេចបាន «កម្ពុជាគ្មានមីនត្រឹមឆ្នាំ ២០២៥» ប៉ុន្តែស្របពេលជាមួយគ្នានោះកម្ពុជាត្រូវការការជួយជ្រោមជ្រែងផ្នែកហិរញ្ញវត្ថុពីប្រទេសជាមិត្តដើម្បីអាចសម្រេចគោលដៅនេះបានជោគជ័យ។
ក្នុងសន្និសីទសារព័ត៌មានតាមទូរសព្ទស្តីពីរបាយការណ៍ស្តីពីកម្មវិធីគាំទ្រការបោសម្អាតគ្រឿងផ្ទុះ «Walk The Earth in Safety» នៅព្រឹកថ្ងៃព្រហស្បតិ៍ទី ៤ ខែមេសា លោក Jerry Guilbert ប្រធានកម្មវិធីនៃការិយាល័យដោះនិងកម្ចាត់គ្រឿងផ្ទុះនៃក្រសួងការបរទេសអាមេរិក បានបញ្ជាក់ថា អាមេរិកកំពុងធ្វើការជាមួយភាគីជាច្រើនដើម្បីជួយគាំទ្រប្រតិបត្តិការដោះមីននៅកម្ពុជាជាច្រើនឆ្នាំកន្លងមក ហើយថវិកាជាង ១៤០ លានដុល្លារ។
«យើងផ្តល់ជំនួយដល់កម្ពុជាដើម្បីជួយឲ្យប្រទេសនេះដោះស្រាយបញ្ហាជាមួយមីននិងគ្រាប់មិនទាន់ផ្ទុះដែលជាមរតកសង្គ្រាម និងគ្រឿងផ្ទុះដែលសេសសល់ពីជម្លោះវៀតណាម។ យើងកំពុងធ្វើការងារយ៉ាងជិតស្និទ្ធជាមួយមជ្ឈមណ្ឌលកម្ចាត់មីនកម្ពុជា និងអង្គការក្រៅរដ្ឋាភិបាលអន្តរជាតិផ្សេងទៀតនៅកម្ពុជា។ គិតពីឆ្នាំ ១៩៩៣ ដល់ឆ្នាំ ២០១៨ អាមេរិកចំណាយលុយអស់ប្រហែល ១៤០លានដុល្លារហើយលើគម្រោងនេះ»។
តាមពិតទៅកម្ពុជាត្រូវបានគេចាត់ទុកជាប្រទេសមួយដែលពោរពេញដោយគ្រាប់មីន និងគ្រឿងផ្ទុះច្រើនជាងគេ ដោយសារប្រទេសនេះឆ្លងកាត់សង្គ្រាមរ៉ាំរ៉ៃអស់រាប់ទសវត្សរ៍មុននឹងស្គាល់សន្តិភាពពេញលេញនៅក្នុងឆ្នាំ ១៩៩៨។ មីននិងគ្រាប់មិនទាន់ផ្ទុះជាពិសេសគ្រាប់បែកចង្កោម បន្សល់ទុកពីការទម្លាក់គ្រាប់បែករបស់អាមេរិកក្នុងសង្គ្រាមវៀតណាមដែរ។
មកដល់បច្ចុប្បន្ននេះ អាមេរិកជាប្រទេសដែលបន្តផ្តល់ហិរញ្ញវត្ថុច្រើនជាងគេលើលោកដើម្បីគាំទ្រដល់ប្រតិបត្តិការបោសសម្អាតគ្រាប់មិនទាន់ផ្ទុះនៅក្នុងប្រទេសច្រើនជាង ១០០។ ចាប់ពីឆ្នាំ ១៩៩៣មក អាមេរិកចំណាយថវិកាអស់លើ ៣,៤ ពាន់លានដុល្លារអាមេរិកទូទាំងពិភពលោក។
អ្វីដែលគួរឲ្យកត់សម្គាល់ អាមេរិកចំណាយរហូតដល់ ៥២៨ លានដុល្លារឯណោះសម្រាប់អាស៊ីបូព៌ា និងប៉ាស៊ីហ្វិកទាំងមូល ក្នុងកម្ពុជាជាប្រទេសទីពីរបន្ទាប់ពីឡាវដែលទទួលជំនួយហិរញ្ញវត្ថុច្រើនជាងគេលើគម្រោងបោសសម្អាតសំណល់គ្រឿងផ្ទុះសម័យសង្គ្រាមនេះ។ ឡាវបានទទួល ៣៩,០៨ភាគរយ, កម្ពុជាទទួលបាន ២៧,៣២ភាគរយ ខណៈវៀតណាមបានទទួល ២៥,៦៩ ភាគរយ។
ក្នុងរយៈពេលជាងពីរទសវត្សរ៍មកនេះកម្ពុជាបានបោះជំហានទៅមុខគួរឲ្យកត់សម្គាត់ក្នុងការបោសសម្អាតមីននៅទូទាំង និងកាត់បន្ថយចំនួនអ្នកស្លាប់ និងរបួសដែលបណ្តាមកពីគ្រាប់មិនទាន់ផ្ទុះ។ គិតត្រឹមឆ្នាំ ២០១៨ កម្ពុជាបោសសម្អាតមីននិងគ្រឿងផ្ទុះចេញពីផ្ទៃដីប្រហែល ១៧០០ គីឡូម៉ែត្រការ៉េ ខណៈដែលមានការវាយតម្លៃថា ផ្ទៃដីដែលមានគ្រឿងផ្ទុះសរុបមានប្រហែល ៣៧០០ គីឡូម៉ែត្រការ៉េ។
ចំណែកទិន្នន័យជនរងគ្រោះវិញ បើតាមរបាយការណ៍របស់មជ្ឈមណ្ឌលកម្ចាត់មីនកម្ពុជា ឬស៊ីម៉ាក់ ពីឆ្នាំ ១៩៩៧ ដល់ខែសីហាឆ្នាំ ២០១៨ ចំនួនអ្នករងរបួស ឬស្លាប់សរុបដោយសារគ្រាប់មីននិងយុទ្ធភ័ណ្ឌមិនទាន់ផ្ទុះមានរហូតដល់ ៦៧៧០៥នាក់។ មកដល់បច្ចុប្បន្ន គេវាយតម្លៃថា ជាមធ្យមប្រជាជនកម្ពុជាប្រហែល ១០០នាក់ស្លាប់និងរងរបួសក្នុងមួយឆ្នាំដោយសារបញ្ហានេះដែរ។
តាមពិតទៅ របាយការណ៍របស់អាមេរិកឆ្នាំ ២០១៩ នេះចេញផ្សាយប៉ុន្មានថ្ងៃប៉ុណ្ណោះ ក្រោយមជ្ឈមណ្ឌលកម្ចាត់មីនកម្ពុជាទទួលថវិកា២លានដុល្លារពីអាមេរិកដើម្បីទ្រទ្រង់ប្រតិបត្តិការសម្អាតសំណល់ជាតិផ្ទុះពីសង្គ្រាម។ បើតាមលោក ហេង រតនា ដែលជាអគ្គនាយកមជ្ឈមណ្ឌលកម្ចាត់មីនកម្ពុជា ថវិកានេះអាចជួយកម្ពុជាដោះមីន និងគ្រាប់មិនទាន់ផ្ទុះលើផ្ទៃដីប្រហែល ២៦ គីឡូម៉ែត្រការ៉េឯណោះ។
កម្ពុជាគ្មានមីនត្រឹមឆ្នាំ ២០២៥
មកដល់បច្ចុប្បន្នកម្ពុជាមានមហិច្ឆតាសម្រេចឲ្យបាននូវគោលដៅកម្ពុជាគ្មានមីនត្រឹមឆ្នាំ ២០២៥ ក្រោមផែនការយុទ្ធសាស្ត្រជាតិ (ឆ្នាំ ២០១៨ ដល់ឆ្នាំ ២០២៥)។ ដើម្បីសម្រេចគោលដៅនេះកម្ពុជា កម្ពុជាត្រូវការជំនួយប្រហែល ៤០០លានដុល្លារ។
របាយការណ៍ Walk The Earth in Safety កត់សម្គាល់ថា កម្ពុជាមានឧបករណ៍បច្ចេកទេសត្រឹមត្រូវហើយដើម្បីសម្រេចបានបាននូវគោលដៅដ៏មានមហិច្ឆតានេះ ប៉ុន្តែបញ្ហានៅត្រង់ថា ការប្រឹងប្រែងក្នុងការសម្រេចគោលដោរបស់កម្ពុជាអាចនឹងរងផលប៉ះពាល់ បើសិនជាវិភាគទានហិរញ្ញវត្ថុពីសហគមន៍អន្តរជាតិមានការថយចុះដោយប្រការណាមួយនោះ។
ពេលសាកសួរថា តើអាមេរិកនឹងបន្តប្តេជ្ញាចិត្តជួយគាំទ្រកម្ពុជាសម្រេចគោលដៅកម្ពុជាគ្មានមីនត្រឹមឆ្នាំ ២០២៥ ឬយ៉ាងណា មន្ត្រីជាន់ខ្ពស់អាមេរិកលោក Jerry Guilbert បានបញ្ជាក់ថា អាមេរិកកំពុងធ្វើការងារច្រើនរួចហើយដើម្បីជួយកម្ពុជាបោសសម្អាតមីន និងយុទ្ធភ័ណ្ឌមិនទាន់ផ្ទុះដែលសេសសល់។ លោកបន្តថា អ្វីដែលសំខាន់គឺ អាមេរិកបានគាំទ្រគម្រោងជាច្រើនមានការកសាងសមត្ថភាព បណ្តុះបណ្តាលប្រជាពលរដ្ឋកម្ពុជាពីបញ្ហាគ្រោះថ្នាក់នៃគ្រាប់មីន និងកំពុងសហការជាមួយកងទ័ពជើងគោកកម្ពុជាថែមទៀតលើការបំផ្លាញ និងធានាសន្តិសុខ និងគ្រប់គ្រងស្តុកទុកគ្រាប់រំសេវថែមទៀត។
យ៉ាងណាមិញ មន្ត្រីរូបនេះបានសង្កត់ធ្ងន់ថា ដំណើរការបោសសម្អាតមីននិងគ្រាប់មិនទាន់ផ្ទុះជារឿងលំបាក និងជាដំណើរការយូរអង្វែង ហើយក៏ត្រូវការការប្រែងប្រែងរយៈពេលយូរអង្វែងដូចគ្នា។
កាលពីខែឧសភាឆ្នាំ ២០១៨ នាយកភា្នក់ងារកម្មវិធីអភិវឌ្ឍន៍សហប្រជាជាតិ (UNDP) កម្ពុជាលោក Nick Beresford បានបង្ហាញការគាំទ្រចំពោះគោលដៅទី ១៨ របស់កម្ពុជាក្នុងគោលដៅអភិវឌ្ឍប្រកបដោយចីរភាព( SDGs) ដែលសំដៅដល់ការធ្វើយ៉ាងណាកែប្រែកម្ពុជាជាប្រទេសគ្មានមីនត្រឹមឆ្នាំ ២០២៥។ លោកបានគូសបញ្ជាក់ថា គោលដៅកម្ពុជាពិតជាមានមហិច្ឆតាខ្ពស់ ប៉ុន្តែលោកជឿជាក់ថា វាជាគោលដៅដែលអាចសម្រេចទៅរួច៕