លោក ឌូទើតេ ប្រាប់ឲ្យចិនឈប់លូកលាន់កោះមួយរបស់ហ្វីលីពីននៅសមុទ្រចិនខាងត្បូង

អន្តរជាតិ

លោក ឌូទើតេ ប្រាប់ឲ្យចិនឈប់លូកលាន់កោះមួយរបស់ហ្វីលីពីននៅសមុទ្រចិនខាងត្បូង

05, Apr 2019 , 2:31 pm

រូបភាព

ដោយ: តន ចាន់រិទ្ធារ៉ា

ប្រធានាធិបតីហ្វីលីពីន រ៉ូឌ្រីហ្គោ ឌូទើតេ នៅថ្ងៃទី៤ ខែមេសា បានប្រាប់ឲ្យចិនបញ្ឈប់សកម្មភាពនៅក្បែរកោះមួយដែលហ្វីលីពីនត្រួតត្រាក្នុងសមុទ្រចិនខាងត្បូង។ លោក ឌូទើតេ ដែលប្រកាន់នយោបាយទន់ភ្លន់ដាក់ចិនក្នុងសំណុំរឿងរសើបមួយនេះ និយាយបែបព្រមានថា បើចិនហ៊ានប៉ះពាល់កោះ Thitu របស់ហ្វីលីពីន បញ្ហាធំនឹងកើតមានមិនខាន។ លោកនិយាយបែបនេះ បន្ទាប់ពីកប៉ាល់ចិនរាប់រយគ្រឿងធ្វើដំណើរទៅកៀកកោះមួយនេះ ខណៈយោធាហ្វីលីពីនយល់ថា ជាទូកយោធាផង។

ដ្បិតប្រកាន់ខ្ជាន់នយោបាយការទូតសន្តិភាព និងទទួលស្គាល់ពីសមត្ថភាពយោធាមែនពិត លោក រ៉ូឌ្រីហ្គោ ឌូទើតេ ប្រធានាធិបតីហ្វីលីពីន ប្រកាន់ជំហរមិនរាថយឡើយ បើចិនហ៊ានប៉ះពាល់ដែនកោះរបស់ខ្លួននៅសមុទ្រចិនខាងត្បូងនោះ។ នៅថ្ងៃទី៤ ខែមេសា លោក ឌូទើតេ បានប្រាប់ឲ្យចិនដកដៃចេញពីកោះ Thitu ដែលជាកម្មសិទ្ធិរបស់ហ្វីលីពីន។ មិនមែនជាពាក្យព្រមានឡើយ តែលោក ឌូទើតេ ចាត់ទុកសម្ដីរបស់លោកជាពាក្យរំឭកទៅកាន់មិត្តម្នាក់។

ការលើកឡើងរបស់លោក ឌូទើត ធ្វើឡើងបន្ទាប់ពីមានវត្តមានទូកនេសាទ និងកប៉ាល់នៃកងឆ្មាំការពារឆ្នេររបស់ចិនជាច្រើនគ្រឿងនៅក្បែរ Thitu ក្នុងសមុទ្រចិនខាងត្បូង ជាទីដែលចិនទាមទារកម្មសិទ្ធិសឹងទាំងស្រុងទៅហើយ។ ក្រសួងការបរទេសហ្វីលីពីន ក៏បានចេញប្រតិកម្មភ្លាមៗទៅនឹងសកម្មភាពរបស់ចិន ហើយចាត់ទុកទង្វើបែបនោះជារឿងខុសច្បាប់។

តាំងពីក្លាយជាប្រធានាធិបតីហ្វីលីពីនមក លោក ឌូទើតេ មិនសូវនិយាយរិះគន់ចិនខ្លាំងឡើយពាក់ព័ន្ធបញ្ហាសមុទ្រចិនខាងត្បូងនេះ ហើយលោកព្យាយាមទាក់ទាញការវិនិយោគកាន់តែច្រើនពីមហាអំណាចអាស៊ីមួយនេះ។ យ៉ាងណាមិញ ក្នុងករណីចិនហ៊ានប៉ះពាល់ Thitu លោក ឌូទើតេ លើកឡើងថា វាជារឿងផ្សេង ហើយលោកនឹងបញ្ជាឲ្យយោធាត្រៀមប្រយុទ្ធ។ លោកបន្តថា លោកមិនអង្វរអ្វីឡើយ តែគ្រាន់តែចង់ប្រាប់ឲ្យចិនដកថយវិញព្រោះហ្វីលីពីនក៏មានទាហានលើកោះនោះដែរ។

វាហាក់ដូចជាប្លែកបន្តិចដែលលោក ឌូទើតេ និយាយខ្លាំងៗបែបនេះ ព្រោះកន្លងមកលោកទទួលស្គាល់ជាស្រេចថា សមត្ថភាពកងទ័ពហ្វីលីពីនមិនដល់ចិនឡើយ ហើយសង្គ្រាមជាមួយចិន ប្រៀបដូចជាការធ្វើអត្តឃាតខ្លួនដូច្នោះដែរ។ ថ្មីៗនេះ លោក ឌូទើតេ ថែមទាំងនិយាយត្រង់ៗថា បើច្បាំងជាមួយចិន មីស៊ីលចិននឹងទៅដល់រដ្ឋធានីម៉ានីលតែ៧នាទីប៉ុណ្ណោះ។ ហេតុនេះហើយទើបប្រធានាធិបតីរូបនេះមិនសូវនិយាយរឿងសង្គ្រាមជាមួយចិនប៉ុន្មានឡើយ។

ជុំវិញបញ្ហាថ្មីៗនេះ ខាងក្រុងប៉េកាំងឯណោះវិញ មិនយល់ឃើញថា ស្ថានភាពតានតឹងខ្លាំងឡើយ។ ក្នុងសន្និសីទសារព័ត៌មានថ្ងៃទី៤ ខែមេសា លោក Geng Shuang អ្នកនាំពាក្យក្រសួងការបរទេសចិន លើកឡើងថា ភាគីទាំងពីរបានផ្លាស់ប្ដូរយោបល់ដោយស្មោះត្រង់បំផុតលើបញ្ហានេះ តែលោកមិនបាននិយាយដល់ការតវ៉ារបស់ហ្វីលីពីនឡើយ៕