អន្តរជាតិ
ជប៉ុនកំណត់ម៉ោងការងារបន្ថែម ដើម្បីផ្លាស់ប្តូរទម្លាប់ធ្វើការជ្រុលហួសហេតុ
រូបថត៖ AFP
×![]()
រដ្ឋាភិបាលជប៉ុន បានចាប់ផ្តើមអនុវត្តច្បាប់ស្ដីពីកំណែទម្រង់ការងារថ្មីមួយ ដើម្បីកំណត់ម៉ោងការងារបន្ថែមនៅកន្លែងធ្វើការ។ គោលបំណងនៃច្បាប់ថ្មីនេះ គឺដើម្បីផ្លាស់ប្តូរវប្បធម៌ធ្វើការជ្រុលហួសហេតុរបស់ប្រជាជនជប៉ុន ដែលត្រូវចាត់ទុកជា មូលហេតុនៃវិបត្តិផ្លូវចិត្តធ្ងន់ធ្ងរ និងចុងក្រោយឈានដល់ការធ្វើអត្តឃាត។ 
ច្បាប់ការងារថ្មី ដែលបានចូលជាធរមានកាលពីថ្ងៃទី១ ខែមេសា នឹងកំណត់ម៉ោងការងារបន្ថែម (Overtime) មកត្រឹម១០០ម៉ោងក្នុងមួយខែ និង៧២០ម៉ោងក្នុងមួយឆ្នាំ។ យោងតាមការចុះផ្សាយរបស់ទីភ្នាក់ងារព័ត៌មាន Kyodo សម្រាប់កំណែទម្រង់ថ្មីនេះ រដ្ឋាភិបាលជប៉ុន សង្ឃឹមនឹងកាត់បន្ថយតួលេខនៃការស្លាប់ និងកើតជំងឺ ដែលបណ្តាលមកពីការធ្វើការជ្រុលម៉ោង។
បើតាមច្បាប់នេះ ក្រុមហ៊ុនណាដែលល្មើសនឹងគោលការណ៍កំណត់ អាចទទួលរងពិន័យជាប្រាក់ប្រមាណ៣ម៉ឺនយ៉េន ឬស្មើនឹង២៧០០ដុល្លារ។ យោងតាមប្រភពដដែល បច្ចុប្បន្ននេះ ការកំណត់ម៉ោងបន្ថែមនេះ នឹងត្រូវអនុវត្តតែទៅលើបណ្តាក្រុមហ៊ុនធំៗសិន។ ចំណែកឯ ក្រុមហ៊ុនខ្នាតតូចនិងមធ្យម នឹងពុំទាន់ក្លាយជាគោលដៅនៃកំណែទម្រង់នេះនៅឡើយទេ ពោលគឺរហូតដល់ខែមេសា ឆ្នាំ២០២០។
មែនទែនទៅ កំណែទម្រង់ថ្មីនេះ គឺជាសសរស្ដម្ភដ៏សំខាន់មួយនៃកំណែទម្រង់ច្បាប់ការងារ ដែលជំរុញដោយលោកនាយករដ្ឋមន្ត្រីជប៉ុន ស៊ិនហ្សូ អាបេ ក្នុងគោលដៅដោះស្រាយបញ្ហាកង្វះកម្លាំងពលកម្មដ៏ធ្ងន់ធ្ងរនៅក្នុងសង្គមជប៉ុន។ កាលពីចុងឆ្នាំ២០១៨កន្លងទៅ សភាជប៉ុនបានអនុម័តច្បាប់អន្តោប្រវេសន៍ថ្មី ដោយបើកចំហទ្វារកាន់តែធំដើម្បីទទួលពលករបរទេសទៅធ្វើការក្នុងប្រទេសខ្លួន ជាមួយការបង្កើតប្រព័ន្ធទិដ្ឋាការថ្មី។ ច្បាប់នេះ បានចូលជាធរមាននាថ្ងៃទី១ ខែមេសា ឆ្នាំ២០១៩។
សូមបញ្ជាក់ថា ក្នុងឆ្នាំ២០១៧ ក្រសួងសុខាភិបាលជប៉ុន បានទទួលស្គាល់ការស្លាប់ចំនួន ១៩០ករណី ដែលជាប់ពាក់ព័ន្ធនឹងសកម្មភាពធ្វើការជ្រុល ក្នុងនោះក៏មាន ការធ្វើអត្តឃាតផងដែរ។ ជាក់ស្តែង ហេតុការណ៍មួយដ៏គួរឲ្យរន្ធត់នោះ បានកើតឡើងកាលពីឆ្នាំ២០១៦កន្លងទៅ។ បុរសម្នាក់ដែលធ្វើការលើគម្រោងមួយសម្រាប់ភ្នាក់ងារអវកាសជប៉ុនឈ្មោះថា Jaxa បានបញ្ចប់ជីវិតខ្លួនឯង ព្រោះធ្វើការជ្រុលម៉ោងហួសហេតុពេក។
បុរសរូបនោះឈ្មោះថា Yukinobu Sato អាយុ ៣១ឆ្នាំនៅពេលនោះ មានតួនាទីជាអ្នកម៉ៅការលើគម្រោងផ្កាយរណបមួយឲ្យភ្នាក់ងារអវកាសខាងលើ។ ដោយសារគោលដៅការងារពុំដែលទាន់សម្រេចជោគជ័យ លោកត្រូវធ្វើការចំនួន ៧០ម៉ោងបន្ថែមក្នុងមួយខែដោយពុំទទួលបានកម្រៃ។ ចុងក្រោយ ដោយសារសម្ពោធការងារ និងភាពនឿយហត់ លោកបានផុងខ្លួនក្នុងវិបត្តិផ្លូវចិត្តធ្ងន់ធ្ងរ ហើយក៏បានសម្រេចធ្វើអត្តឃាតតែម្តង៕
Tag:
ជប៉ុន
កំណែទម្រង់ការងារ
© រក្សាសិទ្ធិដោយ thmeythmey.com
