អន្តរជាតិ
ឌូទើតេ នៅតែមានសុទិដ្ឋិនិយមលើចិន ទោះមានចិនធ្វើសកម្មភាពបង្កហេតុនៅតំបន់ជម្លោះក៏ដោយ
× ទោះបីជាមានរបាយការណ៍ពាក់ព័ន្ធនឹងសកម្មភាពបំពានអធិបតេយ្យ របស់នាវាល្បាតចិននៅក្នុងតំបន់គ្រប់គ្រងខ្លួនយ៉ាងណាក្តី រដ្ឋបាលហ្វីលីពីន ដឹកនាំដោយលោកប្រធានាធិបតី រ៉ូឌ្រីហ្គោ ឌូទើតេ នៅតែមានសុទិដ្ឋិនិយមចំពោះការអនុវត្តគោលនយោបាយបរទេសរបស់ចិន។ ហ្វីលីពីន គិតថា សកម្មភាពឆ្គាំឆ្គងរបស់ចិន មិនសំដៅលើហ្វីលីពីនឡើយ។
ប្រធានាធិបតី រ៉ូឌ្រីហ្គោ ឌូទើតេ នៅថ្ងៃ៤ មេសា បានអះអាងទៅកាន់ប្រជាជនហ្វីលីពីន ថា លោក មិនអនុញ្ញាតឲ្យចិនគ្រប់គ្រងតំបន់ដែនកោះរបស់ហ្វីលីពីន Pag-asa Island ដែលជាកោះមួយនៅក្នុងសមុទ្រចិនខាងចិនខាងត្បូងឡើយ បន្ទាប់ពីមានការរាយការណ៍ថា ថ្មីៗនេះ មាននាវារបស់ចិន បានបង្ហាញវត្តមានជុំវិញទីនោះ។
តាមការចុះផ្សាយរបស់សារព័ត៌មានហ្វីលីពីន Inquirer Net លោកប្រធានាធិបតី បានផ្តាំផ្ញើទៅកាន់ប្រជាជនហ្វីលីពីនតាមរយៈសារព័ត៌មាន កុំឲ្យមានការព្រួយបារម្ភ ដោយលោក អះអាងថា លោក មិនបណ្តែតបណ្តោយឲ្យចិនចូលទៅកាប់កាន់បានឡើយ។ ក៏ប៉ុន្តែលោក ក៏បានអះអាងជាមួយនឹងការជឿជាក់ថា វត្តមានរបស់នាវាចិន មិនសំដៅលើហ្វីលីពីនឡើយ។
លោក សង្កត់ធ្ងន់ថា៖« សកម្មភាពរបស់ចិនបែបនេះ ទំនងជាពាក់ព័ន្ធនឹងល្បែងភូមិសាស្ត្រនយោបាយនោះទេ» ខណៈដែលអគ្គរដ្ឋទូតចិនប្រចាំហ្វីលីពីន លោក Zhao Jinhua បានចេញមុខបកស្រាយថា នាវារបស់ចិន ដែលធ្វើដំណើរការក្បែរកោះនោះ មិនមានបំពាក់អាវុធឡើយ ពោលគឺជានាវានេសាទនោះទេ។
ជុំវិញបញ្ហាដដែលនោះ លោកប្រធានាធិបតី ឌូទើតេ បានអះអាងទុកជាមុនផងដែរថា ប្រសិនបើពលរដ្ឋហ្វីលីពីន ត្រូវបានចាប់ខ្លួន ឬសម្លាប់នៅទីនោះមែន នោះហ្វីលីពីន នឹងត្រូវគិតគូរជាថ្មីថាតើគួរសម្រេចបែបណាដើម្បីឆ្លើយតបនឹងស្ថានភាពនេះ។ ត្រង់ចំណុចនេះដែរ លោកឌូទើតេ ជាថ្មីទៀត មិនប្រកាសសង្គ្រាមតទល់ជាមួយនឹងចិនឡើយ ដោយលោក បញ្ជាក់ថា ហ្វីលីពីន មិនអាចឈ្នះចិនបានទេ។
តាមលោកប្រធានាធិបតី ចិន អាចប្រើពេលត្រឹមតែ ៧ នាទីប៉ុណ្ណោះក្នុងការបាញ់គ្រាប់មីស៊ីលទៅដល់រដ្ឋធានីម៉ានីល ហើយហ្វីលីពីន នឹងត្រូវរងខ្ទេចខ្ទាំ ដែលចំណុចនេះ លោក អះអាងថា មិនហ៊ានសូម្បីតែស្រម៉ៃ។ សម្រាប់លោក ជម្រើសល្អបំផុត គឺបើមានបញ្ហា ត្រូវសម្រុះសម្រួលជាមួយនឹងភាគីចិន ដែលលោកតែងតែហៅថា ជាមិត្ត និងអ្នកជិតខាងដ៏ល្អរបស់ហ្វីលីពីន៕
Tag:
ហ្វីលីពីន
ចិន
សមុទ្រចិនខាងត្បូង
© រក្សាសិទ្ធិដោយ thmeythmey.com