វៀតណាមចេញដំណោះស្រាយថ្មី ក្រោយកំណើនសេដ្ឋកិច្ចដើមត្រីមាសទី១ ទាបជាងការរំពឹងទុក

អន្តរជាតិ

វៀតណាមចេញដំណោះស្រាយថ្មី ក្រោយកំណើនសេដ្ឋកិច្ចដើមត្រីមាសទី១ ទាបជាងការរំពឹងទុក

06, Apr 2019 , 3:59 pm

រូបភាព

ដោយ:

រដ្ឋាភិបាលក្រុងហាណូយ បានចេញលិខិតបង្គាប់បញ្ជាថ្មីមួយដើម្បីជាការដាស់តឿនផង និងអំពាវនាវផងដល់គ្រប់ភាគីពាក់ព័ន្ធវិស័យសាធារណៈ និងដៃគូឯកជនក្នុងការពិនិត្យឡើងវិញលើសកម្មភាពសេដ្ឋកិច្ច និងវិនិយោគ។ សេចក្តីបង្គាប់របស់ក្រុងហាណូយ ធ្វើឡើងជាមួយនឹងក្តីបារម្ភពីការមិនអាចសម្រេចបានទៅដល់គោលដៅនៃកំណើនសេដ្ឋកិច្ច ដ្បិតតួលេខកំណើនត្រីមាសទី១ ទាបខុសពីការរំពឹងទុក។

លោកនាយករដ្ឋមន្ត្រីវៀតណាម Nguyễn Xuân Phúc បានចេញលិខិតបង្គាប់មួយ ដោយ បានចង្អុលបង្ហាញពីដំណោះស្រាយដើម្បីឆ្លើយតបទៅនឹងបញ្ហាប្រឈម និងឧបសគ្គនៃការអភិឌ្ឍសេដ្ឋកិច្ចជាតិ ជាពិសេសលើផលិតកម្ម និងសកម្មភាពធុរកិច្ចនានាក្នុងរយៈពេលបីខែកន្លងមកនេះ។ នេះបើយោងតាមការចុះផ្សាយរបស់ភ្នាក់ងារព័ត៌មានវៀតណាម នៅថ្ងៃ៤ មេសា។

តាមប្រភពព័ត៌មានដដែលនោះ ក្នុងលិខិតបង្គាប់បញ្ជានេះ លោកនាយករដ្ឋមន្ត្រី បានគូសបញ្ជាក់ថា ផលិតក្នុងស្រុកសរុប (GDP) របស់វៀតណាមក្នុងត្រីមាសទី១ ឆ្នាំ២០១៩ សម្រេចបានក្នុងរង្វង់កំណើន ៦.៧៩ ភាគរយ ដែលកម្រិតនេះ លោកនាយករដ្ឋមន្ត្រី បញ្ជាក់ជាមួយនឹងការមិនពេញចិត្តថា ទាបជាងការព្យាករទុកទៅទៀត។

តាមលោកនាយករដ្ឋមន្ត្រី ការណ៍ដែលធ្វើឲ្យវៀតណាម មិនអាចសម្រេចបានគោលដៅកំណើនតាមការរំពឹងទុកក្នុងរង្វង់ ៦.៨ ភាគរយបាន ក៏ព្រោះតែការពង្រីកវិស័យរោងចក្រមានការថយចុះ, ការនាំចេញទំនិញវត្ថុធាតុដើមសំខាន់ៗមានការថយចុះ ការវិនិយោគលើគម្រោងសាធារណៈចម្បងៗ ក៏មិនទាន់ចាប់ផ្តើម ហើយកាន់តែស្មុគស្មាញទៀតនោះ សត្វពាហនៈ វៀតណាម ក៏ឆ្លងជំងឺផ្តាសាយជ្រូកទៀត ។

យ៉ាងណាមិញ ដើម្បីឆ្លើយតបទៅនឹងបញ្ហា និងធានាឲ្យបានគោលដៅកំណើន GDP ប្រចាំឆ្នាំក្នុងរង្វន់ ៦.៨ លោកនាយករដ្ឋមន្ត្រី បានស្នើឲ្យរដ្ឋមន្ត្រី មេដឹកនាំក្នុងតំបន់ និងសហគ្រាសសាធារណៈទាំងអស់ពង្រីក និងធ្វើឲ្យល្អប្រសើរលើបរិយាសវិនិយោគ និងធុរកិច្ច, កាត់បន្ថយលក្ខខណ្ឌធុរកិច្ច, កែទម្រង់នីតិវិធីរដ្ឋបាល និងកាត់បន្ថយភាពរអាក់រអួលនៃផលិតកម្ម និងធុរកិច្ចជាដើម។ ការគ្រប់គ្រងលើជំងឺសត្វពាហនៈឲ្យហ្មត់ចត់ ក៏ស្ថិតនៅក្នុងចំណុចបង្គាប់បញ្ជារបស់លោកនាយករដ្ឋមន្ត្រីផងដែរ៕