ជាតិ
សង្គមជាតិ
ក្រសួងទេសចរណ៍ បានដាក់ចេញទិសដៅ៤ចំណុច ដើម្បីលើស្ទួយវិស័យទេសចរណ៍ រូបភាពពីក្រសួងព័ត៌មាន
× ក្រសួងទេសចរណ៍ បានសម្រេចយកផែនការយុទ្ធសាស្ត្រនិងទិសដៅអនុវត្ត៤ចំណុច ចាប់ពីត្រីមាសទី២ រហូតដល់ចប់ឆ្នាំ២០១៩នេះ ដើម្បីពង្រឹងគុណភាពទេសចរណ៍ បង្កើនប្រសិទ្ធភាពការងារ លុបបំបាត់ការលក់ផលិតផលក្លែងក្លាយ។ សេចក្ដីសម្រេចនេះ គឺធ្វើឡើងក្នុងសន្និបាតបូកសរុបការងារទេសចរណ៍ត្រីមាសទី១ (ខែមករាដល់ខែមីនា ឆ្នាំ២០១៩) កាលពីថ្ងៃទី២-៣ ខែមេសា ឆ្នាំ២០១៩។
បើតាមការចុះផ្សាយលើទំព័រហ្វេសប៊ុករបស់ក្រសួងទេសចរណ៍ យុទ្ធសាស្ត្រនិងទិសដៅអនុវត្តទាំងនោះ រួមមាន បង្កើតផលិតផលទេសចរណ៍ថ្មីប្រកបដោយការច្នៃប្រឌិត នៅតាមតំបន់គោលដៅទេសចរណ៍អាទិភាព តាមរយៈការទាក់ទាញការវិនិយោគលើវិស័យទេសចរណ៍ និងការអនុវត្តយន្តការ៤Ps, ពង្រឹងគុណភាពផលិតផលនិងសេវាកម្មទេសចរណ៍ សេវាមួយស្តង់ដាមួយ និងអភិវឌ្ឍធនធានមនុស្ស តាមទស្សនទានបុគ្គលិកម្នាក់ ជំនាញមួយ, ពង្រឹងការឃោសនាផ្សព្វផ្សាយទេសចរណ៍កម្ពុជាទាំងក្នុងនិងក្រៅប្រទេស, និង ពង្រឹងការគ្រប់គ្រងទេសចរណ៍តាមប្រព័ន្ធ Online ( Smart Tourism)។
រូបភាពពីក្រសួងព័ត៌មាន
សេចក្ដីសម្រេចនេះ បានធ្វើឡើង ក្រោយពីកិច្ចពិភាក្សាក្នុងអង្គប្រជុំពិនិត្យពីបញ្ហាប្រឈម និងចំណុចសេសសល់ផ្សេងៗក្នុងវិស័យទេសចរណ៍។ ការពិនិត្យនេះ ឃើញមានកត្តាធនធានមនុស្ស, ការអភិវឌ្ឍផលិតកម្មទេសចរណ៍និងគុណភាពសេវាកម្មទេសចរណ៍, ការឃោសនាផ្សព្វផ្សាយ, ការសហការចូលរួមរបស់ផ្នែកឯកជន, ការគ្រប់គ្រងឧស្សាហកម្មទេសចរណ៍ គឺនៅមានកម្រិត។ ទន្ទឹមនឹងនេះ កិច្ចពិភាក្សា បានលើកពីការលុបបំបាត់ទំនិញវត្ថុអនុស្សាវរីយ៍ក្លែងក្លាយដល់ភ្ញៀវទេសចរផងដែរ៕
© រក្សាសិទ្ធិដោយ thmeythmey.com