ជាតិ
រដ្ឋបាលរាជធានីភ្នំពេញ បង្ហាញទីតាំងជិះរថយន្តក្រុងទៅតាមខេត្តដោយឥតគិតថ្លៃ ក្នុងថ្ងៃចូលឆ្នាំ
× ភ្នំពេញ៖ ក្នុងឱកាសពិធីបុណ្យចូលឆ្នាំខ្មែរខាងមុខនេះ រដ្ឋាភិបាលបានរៀបចំរថយន្តក្រុងចំនួន១២០គ្រឿង សម្រាប់ដឹកជញ្ជូនប្រជាពលរដ្ឋដែលធ្វើដំណើរទៅស្រុកកំណើត ដោយឥតគិតថ្លៃ ចាប់ពីថ្ងៃទី ១២-១៨ ខែមេសា ទាំងទៅ-មកតាមបណ្ដាខេត្តក្រុង និងចេញដំណើរនៅម៉ោង៥:៣០នាទីព្រឹក។ នេះបើតាមសេចក្ដីជូនដំណឹងរបស់រដ្ឋបាលរាជធានីភ្នំពេញ។
ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋ ក្នុងឱកាសបុណ្យចូលឆ្នាំខ្មែរ រដ្ឋបាលរាជធានីភ្នំពេញ បានរៀបចំទីតាំងចេញដំណើរទៅតាមផ្លូវជាតិនីមួយរួមមាន៖ ផ្លូវជាតិលេខ១ មានរថយន្ត១០គ្រឿង ចេញដំណើរពីផ្លូវ៦០ម៉ែត្រ ទល់មុខក្រុមហ៊ុនម៉ែកស៊ីដែស ឆ្ពោះទៅទីរួមខេត្តព្រៃវែង និងស្វាយរៀង។ សម្រាប់ផ្លូវជាតិលេខ២ មានរថយន្ត៥គ្រឿង ចេញដំណើរ ពីផ្លូវ៦០ម៉ែត្រ ទល់មុខក្រុមហ៊ុនម៉ែកស៊ីដែស ឆ្ពោះទៅចំណតរង្វង់មូលអូរចំបក។
បើតាមរដ្ឋបាលរាជធានីភ្នំពេញដដែល សម្រាប់ផ្លូវជាតិលេខ៣ មានរថយន្ត១០គ្រឿង ចេញដំណើរពីផ្សារសិនជូរីផ្លាហ្សា ឆ្ពោះទៅចំណតសាលាបឋមសិក្សាដំណាក់ចង្អើរ និងទីរួមខេត្តកំពត។ រីឯផ្លូវជាតិលេខ៤ មានរថយន្ត១០គ្រឿង ចេញដំណើរពីផ្សារសិនជូរីផ្លាហ្សា ឆ្ពោះទៅចំណតនៅផ្សារកំពង់ស្ពឺ និងវិមានឯករាជ្យខេត្តព្រះសីហនុ។
សម្រាប់ផ្លូវជាតិលេខ៥ មានរថយន្ត៤៥គ្រឿង ចេញដំណើរពីសួនឫស្សីកែវ ឆ្ពោះទៅចំណតនៅផ្សារលើ (ខេត្តកំពង់ឆ្នាំង), បុរីភូប៉ុយ(ខេត្តពោធិ៍សាត់), ផ្សារប៉ុមប៉ុយ (ខេត្តបាត់ដំបង) និងក្រុងសេរីសោភ័ណ្ឌ (ខេត្តបន្ទាយមានជ័យ)។ ផ្លូវជាតិលេខ៦វិញ មានរថយន្ត២០គ្រឿង ចេញដំណើរពីរង្វង់មូលទេពមប្ជាជ្រោយចង្វារ ឆ្ពោះទៅចំណតតនៅភោជនីយដ្ឋានស្ទឹងសែន (ខេត្តកំពង់ធំ) និងផ្លូវ៦០ម៉ែត្រ (ខេត្តសៀមរាប)។
ផ្លូវជាតិលេខ៦.៧ មានរថយន្ត១០គ្រឿង ចេញដំណើរពីមុខរាជាយស្ម័យយាន ឆ្ពោះទៅចំណតរថយន្តខេត្ត និងផ្សារសួង និងផ្លូវជាតិលេខ៦.៨ មានរថយន្ត១០គ្រឿង ចេញដំណើរពីមុខរាជាស្ម័យយាន ឆ្ពោះទៅចំណតនៅមន្ទីរវប្បធម៌ និងវិចិត្រសិល្បៈ (ខេត្តក្រចេះ) និងចំណតរថយន្តខេត្តស្ទឹងត្រែង៕
Tag:
ឡានក្រុង
ចូលឆ្នាំខ្មែរ
© រក្សាសិទ្ធិដោយ thmeythmey.com