អន្តរជាតិ
វិបត្តិបម្រែបម្រួលអាកាសធាតុ ធ្វើឲ្យកុមារបង់ក្លាដែសរាប់លាននាក់ត្រូវជួបហានិភ័យ
រូបភាព៖ UN
×![]()
ភ្នាក់ងារជំនាញអង្គការសហប្រជាជាតិ UNICEF បានចេញរបាយការណ៍មួយដោយបង្ហាញពីការព្រួយបារម្ភពីស្ថានភាពរបស់កុមារនៅក្នុងប្រទេសបង់ក្លាដែសជាង ១៩ លាននាក់ ដែលត្រូវប្រឈមនឹងហានិភ័យ ដោយសារតែទឹកជំនន់ជោគជាំ, ព្យុះ និងមហន្តរាយពាក់ព័ន្ធបរិស្ថានផ្សេងទៀតដែលជាកត្តាបណ្តាលមកពីបម្រែបម្រួលអាកាសធាតុ។ 
តាមរបាយការណ៍សិក្សារបស់ UNICEF ចុះផ្សាយនៅថ្ងៃ៥ មេសា បច្ចុប្បន្ន កុមារប្រមាណ ១២ លាន នៃកុមារ ១៩,៤ លាននាក់ ដែលពួកគេភាគច្រើនរស់នៅតាមបណ្តោយដងទន្លេ សមុទ្រ និងតំបន់ទំនាប បានរងផលប៉ះពាល់ដោយសារតែបម្រែបម្រួលអាកាសធាតុ ខណៈដែលហេដ្ឋាសម្ព័ន្ធក្នុងតំបន់រស់នៅនោះ ក៏មានលក្ខណៈមិនទាន់រឹងមាំ។
របាយការណ៍នោះ បានអះអាងថា គ្រោះទឹកជំនន់ និងការកើនឡើងនៃកម្ពស់ទឹកសមុទ្រ កើតឡើងស្ទើរតែរាល់ឆ្នាំ ហើយសុទ្ធតែធ្ងន់ធ្ងរទៀត ដែលគ្រោះមហន្តរាយធម្មជាតិនេះ មិនត្រឹមតែបំផ្លាញតម្រូវការមូលដ្ឋានដូចជាទឹក, ការអនាម័យ និង សម្ភារថែទាំសុខភាពជាដើមនោះទេ តែថែមទាំងបង្ខំឲ្យពួកគេ ត្រូវបាតបង់ និងចាកចេញពីផ្ទះសម្បែងទៀតផង។
ដោយសារតែហេតុបង្កនេះ ធ្វើឲ្យកុមារទាំងនោះ ត្រូវប្រឈមនឹងការបាត់បង់ការអប់រំ ដោយខ្លះ ត្រូវរុញច្រានឲ្យធ្លាក់ខ្លួនទៅក្នុងពលកម្មកុមារ និងខ្លះទៀត ត្រូវបង្ខំចិត្តរៀបការទាំងនៅក្មេង និងធ្លាក់ក្នុងការងារពេស្យា ដ្បិតក្រុមគ្រួសាររបស់ពួកគេ លែងមានលទ្ធភាពអាចមើលថែពួកគេបានទៀត។
អ្វីដែលគួរឲ្យសម្គាល់ផងនោះ តាមរបាយការណ៍ ដែលមានចំណងជើងថា « បម្រែបម្រួលអាកាសធាតុ ឆក់យកអនាគតកុមារនៅបង់ក្លាដែស » ដដែលនោះ ក៏រាប់បញ្ចូលកុមារ ដែលជាជនភៀសខ្លួនជនជាតិភាគតិចរ៉ូហ៊ីងយ៉ា មកពីមីយ៉ាន់ម៉ា ដែលកំពុងតែរស់នៅក្នុងជំរំបណ្តោះអាសន្នក្នុងប្រទេសបង់ក្លាដែសផងដែរ។
គួរជម្រាបផងដែរថា បញ្ហាបម្រែបម្រួលអាកាសធាតុ គឺជាក្តីបារម្ភរួមសកល ដែលទាមទារឲ្យមានការចាប់អារម្មណ៍ខ្ពស់ និងបង្ហាញពីការទទួលខុសត្រូវពីគ្រប់ភាគីទាំងអស់ ជាពិសេសនោះមេដឹកនាំពិភពលោកតែម្តង។ ដោយសារតែបញ្ហានេះ មានប្រទេសមួយចំនួន ត្រូវលិចលង់ ខណៈផ្សេងទៀត ត្រូវជួបនឹងគ្រោះរាំងស្ងួត៕
Tag:
បង់ក្លាដែស
បម្រែបម្រួលអាកាសធាតុ
© រក្សាសិទ្ធិដោយ thmeythmey.com
