អន្តរជាតិ
មហាធៀ ប្រកាសដកខ្លួនចេញពីតុលាការព្រហ្មទណ្ឌអន្តរជាតិវិញ ក្រោមហេតុផលប៉ះពាល់អធិបតេយ្យ រូបភាព៖ Strait Times
× រដ្ឋាភិបាលម៉ាឡេស៊ីរបស់លោកនាយករដ្ឋមន្ត្រី មហាធៀ មហាម៉ាត់ ប្រឈមនឹងស្ថានភាពប្រទាំងប្រទើស ដោយសារការនាំម៉ាឡេស៊ីចូលជាសមាជិករបស់តុលាការព្រហ្មទណ្ឌអន្តរជាតិ។ ភាពប្រទាំងប្រទើសនោះកើតឡើង ដោយសារបក្សនយោបាយមួយចំនួន បានជំទាស់មិនឲ្យម៉ាឡេស៊ីចូលជាភាគីរបស់តុលាការ ក្រោមហេតុផល ថា ម៉ាឡេស៊ី នឹងត្រូវបាត់បង់អធិបតេយ្យរបស់ខ្លួន។
លោកនាយករដ្ឋមន្ត្រីម៉ាឡេស៊ី មហាធៀ មហាម៉ាត់ នៅថ្ងៃ៥ មេសា បានប្រកាសដកខ្លួនចេញពីតុលាការព្រហ្មទណ្ឌអន្តរជាតិវិញ ខណៈដែលការផ្តល់សច្ចាប័ននៅក្នុងលក្ខន្តិកៈក្រុងរ៉ូមស្តីពីការតុលាការ ព្រហ្មទណ្ឌអន្តរជាតិរបស់ម៉ាឡេស៊ី នៅមិនទាន់បានចូលជាធរមាននៅឡើយនោះ។ នេះបើយោងតាមការចុះផ្សាយរបស់សារព័ត៌មានសិង្ហបុរី Strait Times ។
តាមប្រភពព័ត៌មានដដែលនោះ សេចក្តីប្រកាសរបស់លោកនាយករដ្ឋមន្ត្រី ធ្វើឡើងក្រោយតែមួយម៉ោងប៉ុណ្ណោះ បន្ទាប់ពីបក្សប្រឆាំងធំជាងគេរបស់ប្រទេស UMNO អះអាងថា ពួកគេ នឹងដាក់អនុស្សារណមួយទៅកាន់ក្សត្រ ដើម្បីបង្ហាញការតវ៉ាពីការចូលសមាជិកតុលាការព្រហ្មទណ្ឌអន្តរជាតិ ដោយភ្ជាប់ហេតុផលថា ការផ្តល់សច្ចាប័នលើលក្ខន្តិកៈនេះ នឹងប៉ះពាល់អធិបតេយ្យនៃការដឹកនាំរបស់ម៉ាឡេ។
ជុំវិញការប្រកាសដកនេះដែរ លោកនាយករដ្ឋមន្ត្រី Mahathir ដែលមានបទពិសោធន៍ដឹកនាំប្រទេសរាប់ទសវត្សរ៍ហើយនោះ បានគូសបញ្ជាក់ថា ការដកខ្លួនវិញនេះ មិនមែនព្រោះតែម៉ាឡេស៊ីប្រឆាំងតុលាការនោះទេ ក៏ប៉ុន្តែក៏ព្រោះតែ ការខ្វែងគំនិតនយោបាយ ក្រោមអំណេះអំណាងដើម្បីការពារអធិបតេយ្យជាតិ និងផលប្រយោជន៍ប្រជាជន។
សូមរម្លឹកផងដែរថា នៅថ្ងៃ៤ មីនាកន្លងទៅ រដ្ឋាភិបាលម៉ាឡេស៊ី បានតម្កល់លិខិតូបករណ៍ផ្តល់សច្ចាប័ននៅអគ្គលេខាធិការដ្ឋានរបស់អង្គការសហប្រជាជាតិដើម្បីក្លាយជាភាគីរបស់លក្ខន្តិកៈក្រុងរ៉ូមស្តីពីតុលាការ ព្រហ្មទណ្ឌអន្តរជាតិ ( ICC ) ក្នុងគោលដៅលើកកម្ពស់យុត្តិធម៌ និងនីតិរដ្ឋអន្តរជាតិ។ តាមរយៈការផ្តល់សច្ចាប័ននេះ ម៉ាឡេស៊ី នៅមិនទាន់ក្លាយជាភាគីពេញសិទ្ធិរបស់តុលាការព្រហ្មទណ្ឌអន្តរជាតិនៅឡើយនោះទេ។
តាមមាត្រា១២៦ នៃលក្ខន្តិកៈក្រុងរ៉ូមស្តីពីតុលាការព្រហ្មទណ្ឌអន្តរជាតិ នៅ៦០ ថ្ងៃបន្ទាប់ពីការតម្កល់លិខិតូបករណ៍ផ្តល់សច្ចាប័ន ពោលគឺនៅថ្ងៃ១ មិថុនា ឆ្នាំ២០១៩តទៅ ទើបម៉ាឡេស៊ីអាចក្លាយជាភាគីពេញសិទ្ធិ របស់តុលាការព្រហ្មទណ្ឌអន្តរជាតិជាផ្លូវការ។
មកទល់ពេលនេះ តុលាការព្រហ្មទណ្ឌអន្តរជាតិ មានសមាជិក ឬភាគី សរុបទាំងអស់ ១២២ ប្រទេស ។ បើនិយាយក្នុងក្របខណ្ឌអាស៊ានវិញ បន្ទាប់ពីការប្រកាស និងដាក់លិខិតតម្កល់បញ្ចប់សមាជិកភាពរបស់ហ្វីលីពីននោះ មានតែកម្ពុជាប៉ុណ្ណោះ ដែលជាភាគីនៃតុលាការអន្តរជាតិមួយនេះ៕
© រក្សាសិទ្ធិដោយ thmeythmey.com