អន្តរជាតិ
លោកស្រី ស៊ូជី៖ «ការគិតថាមានតែអ្នករៀនចប់សាកលវិទ្យាល័យជាអ្នកចេះដឹងគឺហួសសម័យហើយ»
× លោកស្រីទីប្រឹក្សារដ្ឋមីយ៉ាន់ម៉ា អ៊ុងសាន ស៊ូជី បានលើកទឹកចិត្តឲ្យប្រជាជនងាកមកចាប់អារម្មណ៍លើវគ្គបណ្តុះបណ្តាលជំនាញ និងវិជ្ជាជីវៈ ដោយលោកស្រីជឿជាក់ថា ការអប់រំបែបខ្លីនេះ អាចធ្វើឲ្យពួកគេ ងាយនឹងទទួលបានការងារធ្វើ ជាជាងនិស្សិតមួយចំនួន ដែលបញ្ចប់ការសិក្សានៅសាកលវិទ្យាល័យ។
ឆ្លៀតឱកាស នៃដំណើរបំពេញទស្សនកិច្ចទៅកាន់តំបន់ Ayeyarwady នៅថ្ងៃ៣ មេសា លោកស្រីទីប្រឹក្សារដ្ឋ អ៊ុងសាន ស៊ូជី បានជួបសំណេះសំណាលជាមួយនឹងកម្មករសំណង់ ដែលជាអ្នកសាងសង់ស្ពានឆ្លងទន្លេនៅក្នុងតំបន់នោះ ហើយលោកស្រី ក៏បានផ្ញើសារជំរុញលើកទឹកចិត្តដល់ពួកគេឲ្យមើលឃើញពីគុណតម្លៃនៃការងាររបស់ខ្លួន។
តាមការចុះផ្សាយរបស់សារព័ត៌មានមីយ៉ាន់ម៉ា Myanmar នាកម្មវិធីនេះ លោកស្រី ស៊ូជី មិនបានបង្អាប់ ឬមើលស្រាល អ្នកទទួលបានសញ្ញាបត្រខ្ពស់នៅសាកលវិទ្យាល័យឡើយ ក៏ប៉ុន្តែលោកស្រី បានផ្តល់អនុសាសន៍ ដល់ពលរដ្ឋ ដែលមិនមានឱកាសទទួលបានការអប់រំខ្ពស់ ឲ្យស្គាល់ពីលក្ខណៈពិសេសជំនាញវិជ្ជាជីវៈ។
លោកស្រី បានគូសបញ្ជាក់ខ្លីថា ផ្នត់គំនិត ដែលថា «មានតែអ្នកបញ្ចប់ការសិក្សាពីសាកលវិទ្យាល័យនោះទេ គឺជាអ្នកមានការអប់រំ» ហួសសម័យហើយ។
ថ្លែងបែបនេះរួចហើយ លោកស្រីអ៊ុងសាន ស៊ូជី បានក្រើនរម្លឹកដល់កម្មករត្រូវធានាផ្តល់កូនរបស់ពួកគេពីការទទួលការអប់រំមួយសមរម្យ ហើយក្រោយពួកគេ ពេញវ័យ គួរបញ្ជូនពួកគេទៅកាន់សាលាបណ្តុះបណ្តាលវិជ្ជាជីវៈ។ លោកស្រី បន្តថា គុណប្រយោជន៍នៃការអប់រំបែបវិជ្ជាជីវៈ គឺជាពួកគេ អាចទទួលបានការងារនៅពេលបញ្ចប់ការសិក្សាវគ្គខ្លីនោះតែម្តង។
លោកស្រី បានអះអាងថា បច្ចុប្បន្នប្រទេសអភិវឌ្ឍ កំពុងតែផ្តោតខ្លាំងទៅលើការអប់រំជំនាញវិជ្ជាជីវៈខ្លីបែបនេះ។ លោកស្រី បានប្រៀបការអប់រំបណ្តុះបណ្តាលវិជ្ជាជីវៈ និងការអប់រំនៅសកលវិទ្យាល័យយ៉ាងដូច្នេះថា៖«ទោះបីជាអ្នកជានិស្សិតបញ្ចប់ការសិក្សាពីសាកលវិទ្យាល័យក៏ដោយ វា នឹងគ្មានន័យឡើយ ប្រសិនបើអ្នក មិនអាចរកការងារមួយបានធ្វើនោះ»។
គួរជម្រាបថា បន្ថែមពីការអនុវត្តគោលនយោបាយលើកទឹកលើការបណ្តុះបណ្តាលជំនាញនិងវិជ្ជាជីវៈរបស់រដ្ឋាភិបាលលោកស្រី នៅចុងឆ្នាំ២០១៨កន្លងទៅ លោកស្រី អ៊ុងសាន ស៊ូជី បានទិញដីជាច្រើន ដែលជាផ្នែកមួយនៃមូលនិធិសម្រាប់រម្លឹកគុណម្តាយរបស់លោកស្រី ដើម្បីសាងសង់សាលាដែលជាកន្លែងបណ្តុះបណ្តាលជំនាញ និងវិជ្ជាជីវៈផងដែរ៕
Tag:
មីយ៉ាន់ម៉ា
អាស៊ាន
© រក្សាសិទ្ធិដោយ thmeythmey.com