សៀមរាប៖ ភ្នំអេវើរេស (Everest) ជាភ្នំដែលខ្ពស់ជាងគេបំផុតលើពិភពលោក។ កន្លងមក កម្រមានយុវជនខ្មែរ ហ៊ានឡើងភ្នំនេះណាស់ ដ្បិតថាមានហានិភ័យខ្ពស់។ លោក ម៉ី សុធាវុធ អាចចាត់ទុកថាជាពលរដ្ឋខ្មែរទី៣ហើយ ដែលសាកល្បងឡើងលើប្រជុំភ្នំអេវើរេស។ លោក សុធាវុធ គូសបញ្ជាក់ថា ការធ្វើសមាធិ និងលំហាត់ផ្នែកស្មារតី ជួយឱ្យលោកឡើងរហូតដល់កម្ពស់ ៥,៣៨០ម៉ែត្រ លើកម្ពស់សរុប ៨,៨៤៨ម៉ែត្រ។
តើពេលព្យាយាមឡើងភ្នំខ្ពស់ជាងគេក្នុងពិភពលោកនេះ លោក ម៉ី សុធាវុធប្រឈមហានិភ័យអ្វីខ្លះ? សូមស្ដាប់បទយកការណ៍ដែលរៀបចំដោយ អ្នកនាង អ៊ីសា រ៉ហានី៖
ភ្នំអេវើរេស មានកម្ពស់ ៨,៨៤៨ម៉ែត្រ ស្ថិតនៅបន្ទាត់ព្រំដែនប្រទេសនេប៉ាល់ និងចិន ត្រូវបានគេចាត់ទុកថាជាភ្នំដែលខ្ពស់ជាងគេលើពិភពលោក។ ដោយសារមានកម្ពស់ខ្ពស់ និងត្រជាក់ខ្លាំង ធ្វើឱ្យអ្នកទៅដល់ជំរុំភ្នំនេះ អាចប្រឈមនឹងហានិភ័យច្រើន ដូចជាការវាយប្រហារពីសុញ្ញអាកាស ដែលខុសពីតំបន់ដែលគេរស់នៅជាដើម។
លោក ម៉ី សុធាវុធ គឺជាជនជាតិខ្មែរមួយរូប ដែលសម្រេចបំណងឡើងភ្នំអេវើរេស ដែលលោកចង់ជំនះ ស្វែងយល់ពីកម្លាំងធម្មជាតិ និងបង្ហាញសមត្ថភាពផ្ទាល់ខ្លួនរបស់លោកឱ្យដល់ពិភពលោកបានឃើញ។ ដ្បិតថា កម្រមានកូនខ្មែរបានទៅដល់ភ្នំមួយនេះ ក៏ដូចជាចង់លុបពាក្យថាតំបន់ភ្នំអេវើរេស មានគ្រោះថ្នាក់នោះ ធ្វើឱ្យលោក សុធាវុធ សម្រេចឡើងភ្នំមួយនេះ។
លោក សុធាវុធ បានឱ្យដឹងថា ឆន្ទះដែលធ្វើឱ្យលោកឡើងភ្នំអេវើរេស គឺលោកបានទទួលព័ត៌មានជាច្រើន ពីភ្នំមួយនេះ ថាជាកន្លែងដែលគ្រោះថ្នាក់មួយ ពិសេសគឺព័ត៌មានអំពីយុវជនខ្មែរមួយរូបរស់នៅខេត្តសៀមរាប ដែលគ្រោះថ្នាក់ និងស្លាប់នៅភ្នំនេះ កាលពីឆ្នាំ២០១២។ ផ្ទុយទៅវិញ សម្រាប់លោក សុធាវុធ ភ្នំអេវើរេស ជាតំបន់អច្ឆរិយៈ ឱ្យតែបានរៀបចំខ្លួនឱ្យច្បាស់លាស់ នោះគេនឹងអាចឡើងវាបាន។ មួយចំណុចទៀតនោះ គឺលោកចង់បង្ហាញក្នុងនាមជាអ្នកចូលចិត្តសមាធិ យូហ្គា និងការព្យាបាលដោយកម្លាំងធម្មជាតិ ចង់យកកម្លាំងទាំងនោះធ្វើការនៅពេលដែលប្រឈមទៅនឹងការវាយប្រហារពីសុញ្ញអាកាសនៅតំបន់នោះ។
ពិតណាស់ថា ការឈានទៅដល់តំបន់ភ្នំអេវើរេស គឺត្រូវមានការត្រៀមខ្លួនជាមុន។ ដោយសារមានបទពិសោធន៍ផ្នែកកីឡាជាច្រើន ធ្វើឱ្យលោក សុធាវុធ ត្រៀមខ្លួនត្រឹមតែ២សប្ដាហ៍ប៉ុណ្ណោះ មុនលោកសម្រេចទៅតំបន់នោះ។ បើអ្នកមិនសូវលេងកីឡា លោកផ្តល់ដំបូន្មាន គួរត្រៀមខ្លួនឱ្យបាន២ខែ ដោយត្រូវតាមដានទាំងសុខភាព សម្ពាធ និងកម្រិតឈាមក្នុងខ្លួនជាប្រចាំ ដើម្បីឱ្យស្របទៅតាមបរិយាកាសនៅតំបន់នោះ។
ដ្បិតថា បានត្រៀមខ្លួនក្នុងការទៅតំបន់នោះក៏ពិតមែន តែក្រុមហ៊ុនមួយចំនួនបានណែនាំឱ្យលោក សុធាវុធ ទិញកញ្ចប់ធានារ៉ាប់រងសុខភាពផងដែរ។ លោក សុធាវុធ ប្រាប់ថា លោកមិនបានផ្តោតអារម្មណ៍ចំពោះបញ្ហាទាំងនោះទេ ព្រោះវាកាន់តែធ្វើឱ្យលោកមានអារម្មណ៍ភ័យ និងរងសម្ពាធកាន់តែធ្ងន់។ ជាមួយគ្នានេះ លោកក៏មានជំនឿចិត្តលើខ្លួនឯងថា ពិតជាអាចធ្វើបាន និងអាចមានជីវិតត្រឡប់មកវិញ។ «ខ្ញុំជឿជាក់លើខ្លួនឯង ខ្ញុំអាចធ្វើបាន ទោះបីមានបញ្ហាខ្លះៗ ការផ្លាស់ប្ដូរបរិយាកាសប្រាកដមែន...ខ្ញុំអាចមានជីវិតមកវិញ»។ នេះជាការបញ្ជាក់របស់លោក សុធាវុធ។
លោក សុធាវុធ ដែលមានវ័យ ៤៥ឆ្នាំ បានបញ្ជាក់ថា ការសមាធិ ពិតជាសំខាន់ណាស់ នៅពេលដែលឈានដល់បរិយាកាសមួយ ដែលវាខុសពីធម្មតា និងខុសប្រក្រតី។ លោកថា អំណាចនៃការសមាធិ ជួយឱ្យខ្លួនលោករស់នៅក្នុងបរិយាកាសនោះបាន។ លោកបានចំណាយពេល ១៤ថ្ងៃ ដើម្បីឡើងភ្នំអេវើរេស គឺចាប់ពីថ្ងៃទី១៣ ដល់ថ្ងៃទី២៥ ខែមីនា ឆ្នាំ២០១៩ ដោយឡើងទៅម្នាក់ឯង និងមានមគ្គុទ្ទេសក៍មួយរូប។ លោកប្រើពេលពី៤ ទៅ៦ម៉ោងក្នុងមួយថ្ងៃ ក្នុងការឡើងភ្នំដែលមានជម្រាលចោទខ្លាំងនេះ។
ក្រៅពីប្រឈមនឹងជម្រាលខ្ពស់ហើយនោះ នៅពេលឡើងដល់កម្ពស់ជិត ៤ពាន់ម៉ែត្រ លោក សុធាវុធ ចាប់ផ្តើមមានការវាយប្រហារពីបរិយាកាសកាន់តែខ្លាំង ដែលធ្វើឱ្យលោកមានអារម្មណ៍ហឹងត្រចៀក ចុកដើមទ្រូង និងពិបាកដកដង្ហើម។ លោកបានសម្រួលដង្ហើម ដោយធ្វើការសមាជិក ឬដកដង្ហើមវែងៗ ដើម្បីឱ្យលោកភ្ជាប់ទៅនឹងបរិយាកាលទៅទីតាំងនោះ។ «ពេលខ្ញុំមានអារម្មណ៍អស់កម្លាំងខ្លាំងមែនទែន ធ្វើឱ្យអារម្មណ៍យើងរវើរវាយ ដេកសុបិន នេះជាបញ្ហាគ្រោះថ្នាក់ដែលអ្នកខ្លះដេកស្លាប់ដោយមិនដឹងខ្លួន»។ លោក សុធាវុធ បានបន្ថែមលើករណីមួយនេះ។ ភ្លាមៗ ពេលកំពុងមានអារម្មណ៍បែបនោះ លោក សុធាវុធ បានទាញអារម្មណ៍របស់លោកមកវិញ និងដាស់សតិខ្លួនឯងឱ្យងាក និងព្យាយាមប្រាប់ខ្លួនឯងថា សតិមិនពាក់ព័ន្ធអ្វីនឹងរាងកាយទេ វាគ្រាន់តែធ្វើដំណើរមកមួយរយៈ ហើយបើយើងចាប់ផ្តើមបង្កើតគំនិតល្អនោះវានឹងល្អតាមនោះដែរ។
យ៉ាងណាក៏ដោយ លោក សុធាវុធ នៅព្យាយាមឡើងបន្តទៀត តែវាកាន់តែធ្វើឱ្យយល់ច្បាស់ថា លោកកំពុងវាយប្រហារកាន់តែខ្លាំង និងធ្វើឱ្យលោកមានអាការៈដូចជាពិបាកដកដង្ហើម និងចុងដៃមានពណ៌ស្វាយ។ លោកបន្តព្យាយាមសមាធិ និងបានឡើងដល់កម្ពស់៤៩១០ម៉ែត្រ និងចុងក្រោយលោកសម្រេចឱ្យឧទ្ធម្ភចក្រដឹកទៅកម្ពស់ ៥៣៦៥ តែពេលទៅដល់ លោកបានដើរដល់កម្ពស់ ៥៣៨០ម៉ែត្រ។ លោក សុធាវុធ ថាបានឈរនៅទីនោះ ប្រមាណ ២០នាទី មុននឹងសម្រេចចុះមកវិញ។ ដ្បិតមិនបានដល់កំពូលភ្នំអេវើរេសក៏ពិតមែន តែសម្រាប់នាយកមេម៉រ ស្ប៉ា នៃសណ្ឋាគារ មេម៉រផាឡេស រូបនេះ រីករាយជាខ្លាំងពេលទៅដល់ចំណុចជាង៥ពាន់ម៉ែត្រនោះ។
លោក ម៉ី សុធាវុធ បានមកដល់កម្ពុជាវិញនៅថ្ងៃទី២៧ ខែមីនា។ ក្នុងនាមជាអ្នកមានបទពិសោធន៍ឡើងភ្នំអេវើរេសមួយរូប លោកលើកទឹកចិត្តឱ្យយុវជនឡើងភ្នំដ៏ខ្ពស់មួយនេះ។ តែយ៉ាងណា លោកផ្តល់ដំបូន្មានខ្លះ មុននឹងសម្រេចចិត្តឡើងភ្នំមួយនោះ ដូចជាស្វែងយល់ពីភូមិសាស្ដ្រនៅតំបន់នោះ បន្ថយទម្ងន់ ហាត់កីឡា តាមដានសុខភាពជាប្រចាំ ពិសេសរៀនគ្រប់គ្រងសតិខ្លួនឯង ដូចជាការសមាធិដើម្បីឱ្យផ្ស៉ាំទៅនឹងបរិយាកាសនៅតំបន់ត្រជាក់នោះ៕