ជាតិ
សង្រ្កាន្តឆ្នាំថ្មី
«សង្ក្រាន្តព្រៃវែង» មានការប្រឡងបវរវ័យចំណាស់ ការសម្តែងរឿងទុំទាវ និងតាំងពិព័រណ៍ផ្ទះបុរាណ
× ភ្នំពេញ៖ សហភាពសហព័ន្ធយុវជនកម្ពុជា (ស.ស.យ.ក) ខេត្តព្រៃវែង នឹងរៀបចំព្រឹត្តិការណ៍ «សង្ក្រាន្តព្រៃវែង» រយៈពេល៤ថ្ងៃ ចាប់ពីថ្ងៃទី១៣-១៦ ខែមេសា នៅសួនច្បារសម្តេច ជា ស៊ីម។ ព្រឹត្តិការណ៍នេះ នឹងមានកម្មវិធីប្រឡងបរវ័យចំណាស់ ស្រីស្អាត ប្រុសស្អាត ការសម្តែងរឿងទុំទាវ រឿងម៉ាក់ថឺង ការតាំងពិព័រណ៍ផ្ទះបុរាណខ្មែរ និងការតាំងបង្ហាញវត្ថុយក្ស។
ប្រធានប្រតិបត្តិស.ស.យ.ក ខេត្តព្រៃវែង កញ្ញា ខៀវ ធាវី បានលើកឡើងថា គោលបំណងនៃការរៀបចំព្រឹត្តិការណ៍នេះឡើង គឺដើម្បីឲ្យពលរដ្ឋខ្មែរ និងភ្ញៀវអន្តរជាតិ បានយល់ដឹងកាន់តែច្បាស់ពីប្រពៃណីទំនៀមទម្លាប់ វប្បធម៌ និងអរិយធម៌ខ្មែរដ៏រុងរឿង ដែលមានពីបុរាណកាលមក ហើយក៏ដើម្បីអបអរសាទរពិធីបុណ្យចូលឆ្នាំខ្មែរផងដែរ។
បើតាមកញ្ញា ខៀវ ធាវី កម្មវិធីសំខាន់ៗក្នុងព្រឹត្តិការណ៍ «សង្ក្រាន្តព្រៃវែង» នឹងមានការជ្រើសរើសបវរវ័យចំណាស់ដែលមានអាយុចន្លោះ៦០ បវរកញ្ញាស្រីស្អាត ប្រុសស្អាត ប្រឡងចម្រៀង ការតាំងបង្ហាញវត្ថុយក្ស ដូចជា កណ្តៀវច្រូតស្រូវយក្ស អង្រុតត្រីយក្ស ទូកដែលមានប្រវែងវែងជាងគេប្រចាំខេត្តព្រៃវែង និងការតាំងពិព័រណ៍រូបជ្រូកយក្ស ព្រមទាំងរូបសត្វតំណាងឆ្នាំទាំង១២ សម្រាប់ទុកឲ្យពលរដ្ឋខ្មែរបានថតរូបផងដែរ។ លើសពីនេះ ក៏មានការលេងល្បែងប្រជាប្រិយខ្មែរ រាំកម្សាន្តបែបប្រពៃណីនៅតំបន់ភូមិយើង និងមានការស្រង់ព្រះ ដើម្បីសុំសេចក្តីសុខនៅវត្តតាំងស៊ីវម៉ីផងដែរ។
សម្រាប់ព្រឹត្តិការណ៍ «សង្ក្រាន្តព្រៃវែង» ឆ្នាំនេះ កញ្ញា ខៀវ ធាវី រំពឹងថា នឹងមានភ្ញៀវទេសចរជាតិ និងអន្តរជាតិប្រមាណ២៥ម៉ឺននាក់ មកចូលរួមកម្សាន្តនៅក្នុងព្រឹត្តិការណ៍នេះ។ កញ្ញា ជឿជាក់ដូច្នេះ ដោយសារឆ្នាំនេះ ខេត្តសៀមរាបមិនមានអង្គរសង្រា្កន្តឡើយ ទើបជាហេតុនាំឲ្យពលរដ្ឋខ្មែរអាចអញ្ជើញមកទស្សនាកាន់តែកើនឡើងជាងឆ្នាំមុន៕
Tag:
ចូលឆ្នាំ
សង្ក្រាន្ត
ព្រៃវែង
© រក្សាសិទ្ធិដោយ thmeythmey.com