អន្តរជាតិ
ស៊ី ជិនភីង ក្រើនរម្លឹកឲ្យមន្ត្រីគ្រប់ថ្នាក់ខំអនុវត្តគោលនយោបាយបន្ថយភាពក្រីក្រឲ្យស្របតាមគោលដៅឆ្នាំ២០២០
× លោកប្រធានាធិបតីចិន ស៊ី ជិនពីង បានក្រើនរម្លឹកដល់មន្ត្រីក្រោមឱវាទរបស់ខ្លួនបន្តខិតខំប្រឹងប្រែងក្នុងការអនុវត្តគោលនយោបាយលើកស្ទួយជីវភាពប្រជាជន ដើម្បីធានាសម្រេចឲ្យបាននូវគោលដៅនៃកាត់បន្ថយភាពក្រីក្រនៅត្រឹមឆ្នាំ២០២០។
តាមរយៈកិច្ចប្រជុំថ្នាក់ជាតិរបស់បក្សកុម្មុយនីស្តចិននៅថ្ងៃ៣ មេសា លោកប្រធានាធិបតី ស៊ី ជិនពីង បានលើកឡើងពីសមិទ្ធផលគួរកត់សម្គាល់ នៃយុទ្ធនាការកាត់បន្ថយភាពក្រីក្រ ឬជាញឹកញាប់លោក ហៅថាសមរភូមិប្រឆាំងភាពក្រីក្រពីសង្គមចិន ពិសេសនៅតំបន់ជនបទ ក្នុងពេលប៉ុន្មានឆ្នាំចុងក្រោយនេះ។
តាមភ្នាក់ងារព័ត៌មានចិន Xinhua លោកប្រធានាធិបតី បានសង្កត់ធ្ងន់ថា កិច្ចប្រឹងប្រែងប្រយុទ្ធប្រឆាំងនឹងភាពក្រីក្ររបស់ចិនក្នុងរយៈពេលជាច្រើនឆ្នាំមកនេះ បានបង្កើតជាទំព័រថ្មីនៃប្រវត្តិសាស្ត្រនៃការកាត់បន្ថយភាពក្រីក្ររបស់មនុស្សជាតិ ហើយ លោក ក៏បានប្តេជ្ញាធានាសម្រេចឲ្យនូវគោលដៅនៃការកាត់បន្ថយភាពក្រីក្រឲ្យទាន់ពេល ខណៈពេលវេលាគោលដៅ នៅសល់ត្រឹមតែ២ឆ្នាំទៀតប៉ុណ្ណោះ។
លោក ស៊ី ជិនពីង ដែលជាអគ្គលេខាធិការរបស់បក្សកុម្មុយនីស្តចិនផងនោះ ក៏បានព្រមានពីកិច្ចការលំបាកមួយចំនួនក្នុងការអនុវត្តគោលនយោបាយ ដែលបង្កឲ្យភាពក្រីក្រីនៅតែដិតដាម និងអាក្រក់។ តែយ៉ាងណាក៏ លោក បានផ្តាំផ្ញើទៅកាន់ប្រជាជនក្រីក្រកុំមានការព្រួយបារម្ភពីតម្រូវការមួយចំនួនដូចជាអាហារ សម្លៀកបំពាក់ ការអប់រំ ការថែទាំវេជ្ជសាស្ត្រ និងសុវត្ថិភាពលំនៅដ្ឋានជាដើម។
ពីវេទិកានោះ លោកប្រធានាធិបតី បានស្នើដល់ទាំងសមាជិកបក្ស និងរដ្ឋាភិបាលគ្រប់លំដាប់ថ្នាក់ ប្រកៀកស្មាគ្នាក្នុងការទទួលខុសត្រូវនៅក្នុងសមរភូមិប្រឆាំងនឹងភាពក្រីក្រ។ លោក ក៏បានដាក់បញ្ជាឲ្យមន្ត្រីអនុវត្តជៀសវាងការប្រព្រឹត្តឥរិយាបថឆ្គាំឆ្គង និងពិសេសនោះឆ្លៀតឱកាសប្រព្រឹត្តអំពើពុករលួយ។
តាមការចុះផ្សាយរបស់ភ្នាក់ងារព័ត៌មានចិន Xinhua កន្លងទៅ ចាប់ពីឆ្នាំ ១៩៧៨ ដល់ឆ្នាំ២០១៦ មានប្រជាជនចិនជាង ៧៣០លាននាក់ហើយ បានរួចផុតពីភាពក្រីក្រី ។ ហើយតាមផែនការជាតិ ចិន បានដាក់គោលដៅក្នុងការសម្រេចកែប្រែសង្គមចិនឲ្យក្លាយជាសង្គមមួយដ៏រុងរឿងនៅត្រឹមឆ្នាំ២០២០ ដែលតម្រូវឲ្យរដ្ឋាភិបាល ត្រូវលុបបំបាត់ភាពក្រីក្រឲ្យអស់ពីសង្គមតែម្តង។ តាមផែនការនេះ រដ្ឋាភិបាលចិន ត្រូវជួយប្រជាជនយ៉ាងហោចណាស់មួយលាននាក់ឲ្យផុតពីភាពក្រីក្រក្នុងរយៈពេល១ខែ៕
© រក្សាសិទ្ធិដោយ thmeythmey.com