រថយន្តទំនើប៩ម៉ូដែលរបស់ក្រុមហ៊ុន Lamborghinis, Ferarris, Bentleys ក៏ដូចជា Mercedes បានក្លាយជាយានជាទីស្រឡាញ់របស់កីឡាករបាល់ទាត់លំដាប់ពិភពលោកមួយចំនួន។ ក្នុងបទសម្ភាសជាមួយ SunSports លោក Richard Clark នៃក្រុមហ៊ុន Premier Sports Solutions បានបង្ហាញពីម៉ូដែលចំនួនទំនើបចំនួន៩ដែលលោកបានលក់ដោយផ្ទាល់ដៃទៅឲ្យកីឡាករលំដាប់ពិភពលោក។
Cristiano Ronaldo, Raheem Sterling និង Phi Jones ស្ថិតក្នុងចំណោមអតិថិជនកំពូលជាច្រើនទៀតរបស់លោក Clark ប៉ុន្តែអ្នកជំនាញរថយន្តរូបនេះ មានមិនបានបញ្ជាក់ពីកាលបរិច្ឆេទនៃការទិញដូរនោះឡើយ ខណៈកីឡាករខ្លះបន្តប្រើប្រាស់ ហើយអ្នកខ្លះទៀតបានប្តូរម៉ូដែលថ្មីទៅហើយ។
ក្រៅពីរថយន្តទំនើបៗ លោក Clark បានលក់រថយន្តជាច្រើនគ្រឿងទៀតទៅឲ្យកីឡាករលំដាប់ពិភពលោក ក្នុងនោះ មានដូចជា Jack Wilshere, Danny Rose, Ashley Young, Kyle Walker និង Olivier Giroud ជាដើម។
ចាប់ផ្តើមបើកអាជីវកម្មនៅឆ្នាំ២០០៥ លោក Clark មានទំនាក់ទំនងយ៉ាងជិតស្និទ្ធជាមួយលោក Harry Redknapp ដែលជាអតីតគ្រូបង្វឹកក្លិប AFC Bournemouth, West Ham United, Portsmouth, Southampton, Tottenham Hotspur, Queens Park Rangers និង Birmingham City។ លោកបានចាប់ផ្តើមភ្ជាប់ទំនាក់ទំនងជាមួយកីឡាករកំពូល បន្ទាប់លក់រថយន្តដំបូងឲ្យ Jamie ដែលជាកូនប្រុសរបស់លោក Redknapp ហើយក៏ទទួលបានម៉ូយកំពូលៗជាបន្តបន្ទាប់តាមរយៈការណែនាំតៗគ្នា។
រថយន្តស៊េរីទំនើបទាំងនោះរួមមាន៖
១. Lamborghini Aventador៖ តម្លៃចាប់ពីជិត៣៤ម៉ឺនដុល្លារ និងល្បឿនអតិបរិមា ៣៥០គីឡូម៉ែត្រក្នុង១ម៉ោង។ កីឡាករដែលប្រើប្រាស់រថយន្តនេះរួមមាន Cristiano Ronaldo (Juventus), Samir Nasri (West Ham), Sergio Aguero (Manchester City)។
២. Ferrari 488៖ តម្លៃចាប់ពីជិត២៧ម៉ឺនដុល្លារអាមេរិក ល្បឿនអតិបរិមា៣៤០គីឡូម៉ែត្រក្នុង១ម៉ោង។ កីឡាករដែលប្រើប្រាស់រថយន្តនេះ រួមមាន Alexandre Lacazette (Arsenal), Cristiano Ronaldo (Juventus)។
៣. Bentley GT៖ តម្លៃចាប់ពីជាង២០ម៉ឺនដុល្លារអាមេរិក ល្បឿនអតិបរិមា ៣៣៣គីឡូម៉ែត្រក្នុង១ម៉ោង។ កីឡាករដែលប្រើប្រាស់រថយន្តនេះ មាន Alexis Sanchez (Manchester United), Romelu Lukaku (Manchester United)។
៤. Mercedes G63៖ តម្លៃចាប់ពីជាង១៨ម៉ឺនដុល្លារ ល្បឿនអតិបរិមា ២៤០គីឡូម៉ែត្រក្នុង១ម៉ោង។ កីឡាករដែលប្រើប្រាស់រថយន្តនេះ មាន Raheem Sterling (Manchester City), Andreas Pereira (Manchester United), Kevin De Bruyne (Manchester City), Mesut Ozil (Arsenal)។
៥. Bentley Bentayga៖ តម្លៃចាប់ពីជិត១៨ម៉ឺនដុល្លារអាមេរិក ល្បឿនអតិបរិមា២៧៥គីឡូម៉ែត្រក្នុង១ម៉ោង។ កីឡាករដែលប្រើប្រាស់រថយន្តនេះ មាន Phil Jones (Manchester United), Raheem Sterling (Manchester City)។
៦. Mercedes S63 AMG Coupe៖ តម្លៃចាប់ពីជិត១៧ម៉ឺនដុល្លារអាមេរិក ល្បឿនអតិបរិមា២៥០គីឡូម៉ែត្រក្នុង១ម៉ោង។ កីឡាករដែលប្រើប្រាស់រថយន្តនេះ រួមមាន Trent Alexander-Arnold (Liverpool), Hector Bellerin (Arsenal)។
៧. Audi R8៖ តម្លៃចាប់ពីជិត១៥ម៉ឺនដុល្លារអាមេរិក ល្បឿនអតិបរិមា៣២៨គីឡូម៉ែត្រក្នុង១ម៉ោង។ កីឡាករដែលប្រើប្រាស់រថយន្តនេះ រួមមាន Neymar (PSG), Theo Walcott (Everton), Steven Ireland (អតីត Manchester City)។
៨. Range Rover Sport SVR៖ តម្លៃចាប់ពីជាង១៣ម៉ឺនដុល្លារអាមេរិក ល្បឿនអតិបរិមា ២៨០គីឡូម៉ែត្រក្នុង១ម៉ោង។ កីឡាករដែលប្រើប្រាស់រថយន្តនេះ រួមមាន Jesse Lingard (Manchester United), Luke Shaw (Manchester United), John Terry (អតីត Chelsea), Phil Jones (Manchester United)។
៩. Range Rover Vogue៖ តម្លៃចាប់ពីជិត១១ម៉ឺនដុល្លារអាមេរិក ល្បឿនអតិបរិមា២២០គីឡូម៉ែត្រក្នុង១ម៉ោង។ កីឡាករដែលប្រើប្រាស់រថយន្តនេះ រួមមាន Antonio Valencia (Manchester United), Eric Dier (Tottenham Hotspur), Wayne Rooney (D.C United)៕