អន្តរជាតិ
UN ថ្កោលទោសយោធាមីយ៉ាន់ម៉ា ដែលបាញ់ប្រហារពីយន្តហោះសំដៅលើជនស៊ីវិល
× ភ្នាក់ងារជំនាញអង្គការសហប្រជាជាតិ បានថ្កោលទោស និងសម្តែងការសោកសៅខ្លាំងចំពោះហេតុការណ៍ នៃការបាញ់ប្រហារគ្នារវាងកងកម្លាំងរដ្ឋាភិបាលមីយ៉ាន់ម៉ា ជាមួយនឹងឧទ្ទាមប្រដាប់អាវុធ ដែលបានបណ្តាលឲ្យប៉ះពាល់ដល់អាយុជីវិតប្រជាជនស៊ីវិលទៀត។ ភ្នាក់ងារជំនាញ បានមើលឃើញ សកម្មភាពរំលោភនេះ ថា អាចធ្លាក់ចូលទៅក្នុងបទឧក្រិដ្ឋកម្មសង្គ្រាមផងដែរ។
ពីទីក្រុងហ្សឺណែវនៅចំពោះមុខអ្នកសារព័ត៌មាននៅថ្ងៃ៥ មេសា អ្នកនាំពាក្យការិយាល័យសិទ្ធិមនុស្សអង្គការសហប្រជាជាតិ លោកស្រី Ravina Shamdasani បានព្រមានពីស្ថានភាពនៃការប៉ះទង្គិចគ្នានៅមីយ៉ាន់ម៉ា ដែលមានពាក់ព័ន្ធជាមួយនឹងយោធាផង ថាអាចធ្លាក់ទៅក្នុងបទឧក្រិដ្ឋកម្មសង្គ្រាម ខណៈដែលមីយ៉ាន់ម៉ា ក៏កំពុងតែស្ថិតក្រោមការតាមដានរបស់តុលាការព្រហ្មទណ្ឌអន្តរជាតិស្រាប់ផងនោះ។
ការព្រមានរបស់អ្នកនាំពាក្យរូបនេះ ធ្វើឡើងបន្ទាប់ពីការិយាល័យសិទ្ធិមនុស្សរបស់អង្គការសហប្រជាជាតិ បានទទួលបានរបាយការណ៍ថ្មីបន្ថែមស្តីពីមីយ៉ាន់ម៉ា។ តាមការចុះផ្សាយរបស់មជ្ឈមណ្ឌលព័ត៌មានអង្គការសហប្រជាជាតិ របាយការណ៍ដែលភ្នាក់ងារជំនាញ ទទួលបាននោះ គឺការប៉ះទង្គិចគ្នានៅថ្ងៃទី៣ មេសាកន្លងទៅ រវាងកងកម្លាំងទាហានរដ្ឋាភិបាល និងទាហានឯករាជ្យ Arakan ។
តាមប្រភពព័ត៌មានដដែលនោះ តាមរយៈការប៉ះទង្គិចនេះ កងយោធាមីយ៉ាន់ម៉ា បានប្រើប្រាស់យន្តហោះ ដើម្បីបើកការវាយប្រហារ ទៅនឹងក្រុមទាហានឯករាជ្យ និងថែមទាំងបានសំដៅទៅលើជនស៊ីវិលដែលជាជនជាតិភាគតិចឥស្លាមរ៉ូហ៊ីងយ៉ា ហើយបានបណ្តាលឲ្យជនជាតិរ៉ូហ៊ីងយ៉ា ៧នាក់ស្លាប់ និងច្រើននាក់ផ្សេងទៀតរងរបួស។
ខណៈសម្តែងពីការព្រួយបារម្ភពីការបន្តមានអ្នកស្លាប់ដោយសារការមិននាំខ្លួនអ្នកប្រព្រឹត្តខុសមកទទួលខុសត្រូវចំពោះមុខច្បាប់ ការិយាល័យសិទ្ធិមនុស្សរបស់អង្គការសហប្រជាជាតិ បានទទូចឲ្យ យោធាមីយ៉ាន់ម៉ា និងក្រុមទាហានឯករាជ្យ បញ្ឈប់ការបាញ់ប្រហារគ្នាជាបន្ទាប់ និងត្រូវធានាថា ជនស៊ីវិល ពិតជាត្រូវបានទទួលបានការការពារយ៉ាងពិតប្រាកដ។
គួរជម្រាបថា រាល់ពេលនៃការប៉ះទង្គិចគ្នារវាងទាហានរដ្ឋាភិបាលមីយ៉ាន់ម៉ា និងទាហានឯករាជ្យ ឬទាហានព្រៃ ដែលត្រូវបានបង្កើតក្នុងគោលដៅតទល់ជាមួយនឹងការរើសអើងពីរដ្ឋាភិបាលមីយ៉ាន់ម៉ា និងជាចលនាសុំផ្តាច់ខ្លួនសេដ្ឋកិច្ចផងនោះ អ្នកដែលទទួលរងផលប៉ះពាល់ខ្លះបំផុត គឺជាជនជាតិភាគតិចឥស្លាម រ៉ូហ៊ីងយ៉ា តែម្តង។
នៅចុងឆ្នាំ២០១៧កន្លងទៅ ដោយសារតែការប៉ះទង្គិចស្រដៀងគ្នានេះ មានជនជាតិរ៉ូហ៊ីងយ៉ា ជាងកន្លះលាននាក់ បានភៀសខ្លួនទៅកាន់ប្រទេសជិតខាង និងខ្លះទៀតឈានដល់ប្រទេសទីបីជាមួយនឹងការភ័យខ្លាច។ មកទល់ពេលនេះ ពួកគេ នៅមិនទាន់ទទួលបានដំណោះស្រាយពីរដ្ឋាភិបាលមីយ៉ាន់ម៉ាឡើយ ខណៈស្ថានភាពរស់នៅនៅក្នុងជំរំបណ្តោះអាសន្ន ក៏កាន់តែអាក្រក់ទៅៗ៕
© រក្សាសិទ្ធិដោយ thmeythmey.com