ជាតិ
នយោបាយជាតិ
UN ប្ដេជ្ញាសហការជាមួយកម្ពុជា ទាំងក្របខណ្ឌអាស៊ាន និងទ្វេភាគី
× ភ្នំពេញ៖ គណៈកម្មការសេដ្ឋកិច្ច និងសង្គម របស់អង្គការសហប្រជាជាតិ ប្រចាំតំបន់អាស៊ីនិងប៉ាស៊ីហ្វិក (UN-ESCAP) ប្ដេជ្ញាសហការជាមួយកម្ពុជា ដើម្បីជំរុញគោលដៅអភិវឌ្ឍន៍ប្រកបដោយចីរភាព ។ លោកស្រី អាមីដា សាល់សៃ អាលីហ្សាបាណា (Armida Salsiah Alisjahbana) លេខាប្រតិបត្តិ UN-ESCAP បានថ្លែងបែបនេះ ទៅកាន់សម្ដេចនាយករដ្ឋមន្ត្រី ហ៊ុន សែន។
តាមរយៈហ្វេសប៊ុកសម្ដេច ហ៊ុន សែន ដែលបានស្រង់សម្ដីលេខាប្រតិបត្តិនៃគណៈកម្មការសេដ្ឋកិច្ចនិងសង្គមរបស់អង្គការសហប្រជាជាតិរូបនេះ មករៀបរាប់ថា ស្ថាប័នមួយនេះ បានទទួលស្គាល់ពីវឌ្ឍនភាព និងការអភិវឌ្ឍរបស់កម្ពុជាបច្ចុប្បន្ននេះ។ ជាពិសេសតួនាទីរបស់កម្ពុជា ក្នុងការចូលរួមទំនាក់ទំនងរវាងកម្ពុជា និង UN-ESCAP , កម្ពុជា-អាស៊ាន និង UN-ESCAP ។
ដោយមើលឃើញពីការចូលរួមរបស់កម្ពុជាបែបនេះ លោកស្រី អាមីដា សាល់សៃ បានអះអាងថា ស្ថាប័នUN-ESCAP ពេញចិត្តនឹងបន្តសហការជាមួយកម្ពុជាទៀត ទាំងក្នុងក្របខ័ណ្ឌអាស៊ាននិងទ្វេភាគី ដើម្បីធ្វើយ៉ាងណារួមគ្នាជំរុញ គោលដៅអភិវឌ្ឍន៍ ដោយចីរភាពរបស់អង្គការសហប្រជាជាតិ។
ឆ្លើយតបការលើកឡើងរបស់លេខាប្រតិបត្តិ UN-ESCAP នេះ សម្ដេចនាយករដ្ឋមន្ត្រី ហ៊ុន សែន បាននិយាយថា កម្ពុជាបានយកចិត្តទុកដាក់បំផុត ជាមួយនឹងអង្គការសហប្រជាជាតិ ដោយមិនត្រឹមតែជំរុញការអភិវឌ្ឍ និងកំណត់គោលដៅអភិវឌ្ឍន៍ ប្រកបដោយចីរភាពនោះទេ តែកម្ពុជាក៏បានចូលរួមចំណែកថែរក្សាសន្តិភាព ក្រោមឆ័ត្រអង្គការសហប្រជាជាតិផងដែរ។
«ជាការពិតណាស់ មិនមានប្រទេសច្រើនទេ ដែលបង្កើតគណៈកម្មការជាតិ សម្រាប់ធ្វើការសម្របសម្រួលជាមួយនឹង UN-ESCAP ។ហើយមិនត្រឹមតែប៉ុណ្ណោះនោះទេ កម្ពុជាបានសហការយ៉ាងល្អជាទីបំផុតជាមួយនឹងភ្នាក់ងារ UN ទាំងអស់ នៅកម្ពុជា។ ជាអាទិ៍ជារៀងរាល់ឆ្នាំ តែងតែមានកិច្ចប្រជុំរវាងភ្នាក់ងារ UN ទាំងអស់ ជាមួយនឹងនាយករដ្ឋមន្ត្រី ទោះបីពេលនេះ មិនមែនជាកិច្ចប្រជុំនោះទេ តែត្រូវបានលើកកម្ពស់ ដូចជាវេទិកាតែម្ដង»។ នេះជាការអះអាងរបស់ប្រមុខរដ្ឋាភិបាល។
កម្ពុជា បានបង្កើតគណៈកម្មការសេដ្ឋកិច្ច និងសង្គម របស់អង្គការសហប្រជាជាតិ ប្រចាំតំបន់អាស៊ីនិងប៉ាស៊ីហ្វិក តាំងពីឆ្នាំ២០០៨ ដោយបានសម្របសម្រួល និងជំរុញការងារយ៉ាងជិតស្និត រវាងអង្គការ UN-ESCAP និងរដ្ឋាភិបាលកម្ពុជា៕
© រក្សាសិទ្ធិដោយ thmeythmey.com