ថ្នាំបង្កើនផ្លូវភេទជិត២ម៉ឺនគ្រាប់ ដែលភាគច្រើននាំចូលពីចិន ត្រូវបានសមត្ថកិច្ចរឹបអូស

ជាតិ

សង្គមជាតិ

ថ្នាំបង្កើនផ្លូវភេទជិត២ម៉ឺនគ្រាប់ ដែលភាគច្រើននាំចូលពីចិន ត្រូវបានសមត្ថកិច្ចរឹបអូស

09, Apr 2019 , 3:39 pm

រូបភាព

ដោយ: អ៊ូ សុខមាន (OU Sokmean)

ភ្នំពេញ៖ ថ្នាំសម្រើប ឬថ្នាំបង្កើនផ្លូវភេទខុសច្បាប់(បុរាណ-សម័យ)គ្រប់ប្រភេទ ប្រមាណ១៨,១៦០គ្រាប់ ត្រូវបានសមត្ថកិច្ចរឹបអូសបានពីហាងលក់ថ្នាំ៣កន្លែងនៅក្នុងរាជធានីភ្នំពេញ។ ក្រៅពីថ្នាំសម្រើបទាំងនេះ សមត្ថកិច្ចក៏បានរឹសអូសថ្នាំហួសកាលបរិច្ឆេទ និងថ្នាំចិនមិនចុះបញ្ជីការជាច្រើនទៀតផង ។

លោក មៀច សុផាន់ណា ប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ បាននិយាយថា ករណីថ្នាំបង្កើនផ្លូវភេទទាំងនេះ គឺជារឿងថ្មី និងលើកដំបូង ដូច្នេះអង្គភាពលោកកំពុងសិក្សាស្រាវជ្រាវលើឱសថទាំងនេះ ដើម្បីចង់ថាវាជាថ្នាំផលិតផលដែលអាចបង្កគ្រោះថ្នាក់ដល់អ្នកប្រើប្រាស់ ក្នុងរយៈពេលណាមួយសិន មុននឹងឈានដល់ការកំណត់សណ្ឋានទំហំទោសឱ្យបានត្រឹមត្រូវ។ បើតាមលោក សុផាន់ណា ថ្នាំដែលសមត្ថកិច្ចរឹបអូសបានទាំងនេះ ភាគច្រើននាំចូលពីប្រទេសចិន តាមយន្តហោះនិងច្រកព្រំដែននានា។

លោក មៀច សុផាន់ណា ប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ ក្នុងសន្នសីទសារព័ត៌មាន ស្តីពី ការរឹសអូសឱសថជំនួយផ្លូវភេទ បង្កើនភាពស្រើបស្រាល ខុសច្បាប់នៅថ្ងៃទី៩មេសា ឆ្នាំ២០១៩ នៅក្រសួងមហាផ្ទៃ

ឆ្លើយតបនឹងសំណួររបស់អ្នកសារព័ត៌មានក្នុងសន្និសីទសារព័ត៌មាន នាព្រឹកទី៩មេសានៅក្រសួងមហាផ្ទៃ លោក មៀច សុផាន់ណា បានបញ្ជាក់ដូច្នេះថា៖«ក្នុងច្បាប់របស់យើងបានចែករួចហើយ ការជួញដូរថ្នាំដែលប្រើប្រាស់ទៅប៉ះពាល់ដល់ប្រព័ន្ធប្រសាទមនុស្ស ក្នុងការបង្កើនភាពស្រើបស្រាលលើផ្លូវភេទ និងថ្នាំសម្រើប គឺមានទោសពី៥ទៅ១០ឆ្នាំ និងត្រូវពិន័យ៥០លានរៀល»។

បើតាមលោក មៀច សុផាន់ណា ថ្នាំនេះមានឥទ្ធិពលដូចថ្នាំញៀនដែរ គឺវាធ្វើឱ្យអ្នកប្រើប្រាស់ខូច ឬបាត់បង់ស្មារតី និងបំផ្លាញសង្គម។

ក្រៅពីប្រទេសចិន ថ្នាំសម្រើបផ្លូវភេទទាំងនេះ ក៏បាននាំចូលពីតៃវ៉ាន់ ហុងកុង និងអាមេរិកជាដើម។ ថ្នាំទាំងនេះ ត្រូវបានសមត្ថកិច្ចរឹបអូស កាលពីថ្ងៃទី២៧មីនា ឆ្នាំ២០១៩។ សមត្ថកិច្ចនឹងដុតបំផ្លាញចោល បន្ទាប់ពីតុលាការចេញដីកា។ នេះជាការបញ្ជាក់របស់ប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ៕