ជាតិ
រដ្ឋមន្ត្រីទេសចរណ៍៖ភ្នំគូលែននឹងក្លាយទៅជាតំបន់«ទេសចរណ៍ផ្សងព្រេង»សម្រាប់ភ្ញៀវជាតិ-អន្តរជាតិ
លោក ថោង ខុន រដ្ឋមន្តី្រក្រសួងទេសចរណ៍ (ប្រភពរូបភាពបានពីទំព័រហ្វេសប៊ុកក្រសួង)
×![]()
ភ្នំពេញ៖ ភ្នំគូលែនក្នុងខេត្តសៀមរាបជាតំបន់ទេសចរណ៍ដែលមានសក្ដានុពលផ្នែកវប្បធម៌ ប្រវត្តិសាស្ត្រ និងធម្មជាតិសម្រាប់ភ្ញៀវទេសចរមកទស្សនាកម្សាន្ត។ ក្រសួងទេសចរណ៍នឹងអភិវឌ្ឍ-រៀបចំតំបន់នេះបន្ថែមឱ្យមានលក្ខណៈស្តង់ដារ និងប្រែក្លាយឱ្យទៅជាតំបន់ «ទេសចរណ៍ផ្សងព្រេង» ដ៏ទាក់ទាញថ្មីមួយ ដើម្បីបំពេញតម្រូវការជូនភ្ញៀវទេសចរជាតិនិងអន្តរជាតិ។
យោងតាមទំព័រហ្វេសប៊ុករបស់ក្រសួងទេសចរណ៍ តំបន់ទេសចរណ៍ភ្នំគូលែន គឺសម្បូរទៅដោយព្រៃភ្នំក្រំថ្មបែបធម្មជាតិ មានប្រាង្គប្រាសាទ ចម្លាក់សិលា និងបុរាណដ្ឋានដ៏ច្រើន។ ក្រៅពីនេះ នៅមានស្ទឹងប្រវត្តិសាស្ត្រ មានពយភ្នំដែលកើតឡើងពីធម្មជាតិ ទេសភាពនៅលើភ្នំរឹតតែស្រស់ត្រកាល ហើយថែមទាំងមិនឆ្ងាយពីតំបន់អង្គរ និងទីប្រជុំជនសៀមរាបទៀតផង។ គុណសម្បត្តិទាំងនោះហើយ បានជាលោក ថោង ខុន រដ្ឋមន្ត្រីក្រសួងទេសចរណ៍ មានបំណងចង់ប្រែក្លាយតំបន់ប្រវត្តិសាស្ត្រមួយនេះ ឱ្យទៅជាផលិតផលទេសចរណ៍ថ្មីមួយទៀត ពិសេសគឺចង់រៀបចំបន្ថែមឱ្យមានប្រភេទទេសចរណ៍បែបផ្សងព្រេង ដូចនៅតំបន់ភ្នំឱរ៉ាល់ សហគមន៍ទេសចរណ៍អារ៉ែង ភ្នំបូកគោជាដើម។
គណៈកម្មការអន្តរក្រសួងទេសចរណ៍បានឯកភាពគ្នារៀបចំផែនការមេអភិវឌ្ឍគោលដៅទេសចរណ៍ ធំៗ សម្រាប់ឆ្នាំ២០២០-២០៤០ ក្នុងនោះមានគម្រោងអភិវឌ្ឍរយៈពេល៥ឆ្នាំ(២០១៨-២០២៣) ផែនការជំរុញការរៀបចំកសាងហេដ្ឋរចនាសម្ព័ន្ធរឹងនៅទីក្រុងសៀមរាប ដូចជា៖ ការជួសជុលផ្លូវក្នុងខេត្ត ផ្លូវក្រវាត់ជុំវិញក្រុង ការផ្គត់ផ្គង់ទឹកស្អាត អគ្គិសនី ការគ្រប់គ្រងសំណល់រឹង-រាវ សណ្តាប់ធ្នាប់អនាម័យក្នុងទីក្រុងជាដើម។ រដ្ឋមន្ត្រីទេសចរណ៍រូបនេះ បានបន្តណែនាំឱ្យកាត់បន្ថយការធ្លុះធ្លាយនៃវិស័យទេសចរណ៍ (Tourism Leakage) ដែលកើតចេញពីការនាំចូលបន្លែ ផ្លែឈើ និងសាច់ពីបរទេស ដោយត្រូវជំរុញការអភិវឌ្ឍខ្សែក្រវាត់បៃតង ជុំវិញក្រុងសៀមរាប និងជំរុញសកម្មភាពដាំបន្លែ ផ្លែឈើ និងចិញ្ចឹមសត្វជាលក្ខណៈធម្មជាតិ ដើម្បីផ្គត់ផ្គង់តម្រូវការភ្ញៀវទេសចរ៕
Tag:
ទេសចរណ៍
សៀមរាប
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
