ជាតិ
លោក ស៊ុន ចាន់ថុល ចាត់វិធានការពិនិត្យបណ្ណបើកបររថយន្តដឹកទំនិញនៅតាមកំពង់ផែ ដើម្បីបញ្ចៀសបញ្ហាចរាចរណ៍
× ភ្នំពេញ៖ យ៉ាងយូរដើមខែឧសភា ក្រសួងសាធារណការ និងដឹកជញ្ជូន នឹងចាត់វិធានការក្តៅ ចំពោះអ្នកបើកបររថយន្តធុនធំគ្រប់ប្រភេទ ដើម្បីបញ្ចៀសបញ្ហាចរាចរណ៍។ វិធានការជំហានដំបូងនោះ គឺក្រសួងនឹងចុះត្រួតពិនិត្យទៅលើអ្នកបើកបររថយន្តទំនិញនៅតាមកំពង់ផែ។
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បាននិយាយថា ក្រសួងបានរៀបចំក្រុមការងាររួចហើយ ដើម្បីត្រួតពិនិត្យប័ណ្ណបើកបរ របស់តៃកុងរថយន្តដឹកទំនិញធុនធំនៅកម្ពុជា។ ការត្រួតពិនិត្យ គឺក្រុមការងារនឹងចុះទៅទីតាំងកំពង់ផែស្វយ័តភ្នំពេញ និងកំពង់ផែស្វយ័តព្រះសីហនុ។ ត្រង់ចំណុចនេះ លោក ស៊ុន ចាន់ថុល បានបញ្ជាក់ថា បើសិនជាក្រុមការងារឆែកឃើញអ្នកបើកបររថយន្ត គ្មានប័ណ្ណបើកបរ ឬរថយន្តគ្មានការឆៀកត្រឹមត្រូវទេនោះ គឺក្រសួងមិនអនុញ្ញាតឲ្យរថយន្តក្រុមហ៊ុននោះ ដឹកទំនិញចេញពីកំពង់ផែឡើយ ។ សម្រាប់លោក ស៊ុន ចាន់ថុល ការអនុវត្តនីតិវិធីបែបនេះ គឺវានឹងជួយសម្រួលដល់ការបញ្ហាចរាចរណ៍ រួមទាំងកាត់បន្ថយគ្រោះថ្នាក់បានមួយកម្រិតផងដែរ។
ថ្លែងក្នុងកិច្ចប្រជុំត្រួតពិនិត្យលទ្ធផលការងារសុវត្ថិភាពចរាចរណ៍ផ្លូវគោក ប្រចាំត្រីមាសទី១ ឆ្នាំ២០១៩ រដ្ឋមន្ត្រីក្រសួងសាធារណការរូបនេះ បានបញ្ជាក់ដូច្នេះថា៖«មុនចូលកំពង់ផែ យើងខ្ញុំនឹងសុំមើលប័ណ្ណបើកបរអ្នកបើកបរឡានសិន បើអ្នកបើកបរគ្មានប័ណ្ណបើកបរត្រឹមត្រូវ មិនអនុញ្ញាតឲ្យឡាននោះចូលដាក់ទំនិញកំពង់ផែទេ។ ទី២ ត្រូវមើលថាឡាននោះ មានឆៀកត្រឹមត្រូវឬមិនត្រឹមត្រូវ បើអត់មានក៏យើងខ្ញុំមិនឲ្យឡាននោះចូលកំពង់ផែដែរ»។
ក្រៅពីដាក់វិធានការត្រួតពិនិត្យនៅតាមកំពង់ផែនេះ ក្រសួងសាធារណការ ក៏គ្រោងត្រួតពិនិត្យនៅតាមស្ថានីយរថយន្តក្រុងដឹកអ្នកដំណើរផងដែរ ព្រោះរថយន្តដឹកអ្នកដំណើរខ្លះ ក៏មិនទាន់បានអនុវត្តត្រឹមត្រូវនៅឡើយទេ។ នេះជាការលើកឡើងរបស់លោក ស៊ុន ចាន់ថុល។
បើតាមរដ្ឋមន្ត្រីក្រសួងសាធារណការរូបនេះ កម្ពុជាខាតបង់ប្រាក់៣៥០លានដុល្លារក្នុងមួយឆ្នាំ ដោយសារបញ្ហាគ្រោះថ្នាក់ចរាចរណ៍៕
Tag:
ស៊ុន ចាន់ថុល
ចរាចរណ៍
© រក្សាសិទ្ធិដោយ thmeythmey.com