ជាតិ
សម្ដេច ស ខេង៖ អភិបាលខេត្តកណ្ដាល ជាដើមចមដែលធ្វើឲ្យរដ្ឋាភិបាលលុបចោលគម្រោងបំបែកខេត្ត
× ភ្នំពេញ៖ បញ្ហារត់ការកាន់កាប់តំណែងនៅខេត្តថ្មី គឺជាដើមចមដែលធ្វើឲ្យរដ្ឋាភិបាល សម្រេចចិត្តលុបចោលគម្រោងបំបែកខេត្ត កាលពីចុងឆ្នាំ២០១៨កន្លងមក។ លោក ម៉ៅ ភិរុណ អភិបាលខេត្តកណ្ដាល ក៏ជាប់ពាក់ព័ន្ធនឹងការអន្តរាគមន៍លើមុខតំណែងនៅក្នុងខេត្តថ្មីនោះដែរ។
ក្នុងកិច្ចប្រជុំត្រួតពិនិត្យលទ្ធផលការងារសុវត្ថិភាពចរាចរណ៍ផ្លូវគោក ប្រចាំត្រីមាសទី១ ឆ្នាំ២០១៩ សម្ដេច ស ខេង រដ្ឋមន្ត្រីក្រសួងមហាផ្ទៃ បាននិយាយថា រដ្ឋាភិបាលពិតជាចង់បំបែកខេត្តថ្មីចំនួនពីរ ដើម្បីជួយសម្រួលដល់រដ្ឋបាលខេត្តកណ្ដាល ដែលមានភូមិសាស្ត្រក្រវ៉ាត់រាជធានីភ្នំពេញ។ ប៉ុន្តែគម្រោងនេះ បានខកខានទៅវិញ ដោយសារតែអភិបាលខេត្តកណ្ដាល លោក ម៉ៅ ភិរុណ លូកដៃចូលលើកិច្ចការនេះ។
និយាយដោយបើកចំហរ រដ្ឋមន្ត្រីក្រសួងមហាផ្ទៃ បាននិយាយថា លោក ម៉ៅ ភិរុណ បានស្នើទៅរដ្ឋាភិបាល សុំតែងតាំងមុខងារមន្ត្រីនៅក្នុងខេត្តថ្មីនោះ ទើបធ្វើឲ្យសម្ដេចនាយករដ្ឋមន្ត្រី មិនពេញចិត្ត ហើយសម្រេចលុបចោលគម្រោងនេះតែម្ដង។
សូមស្ដាប់ប្រសាសន៍សម្ដេច ស ខេង៖
សម្ដេចនាយករដ្ឋមន្ត្រី ហ៊ុន សែន បានប្រកាសលុបគម្រោងបង្កើតខេត្តចំនួនពីរចោលវិញ កាលពីខែតុលា ឆ្នាំ២០១៨ ដោយសារការបែកធ្លាយគម្រោងបង្កើតខេត្តថ្មីនេះ។ លើសពីនេះ សម្តេច ហ៊ុន សែន ក៏ខឹងនឹងមន្ត្រីខ្លះទៀត ដែលឆ្លៀតសុំ និងសួរពីតំណែងផ្សេងៗ នៅក្នុងការបង្កើតខេត្តថ្មីនេះដែរ។
គួរបញ្ជាក់ថា មុននឹងនាយករដ្ឋមន្ត្រី ហ៊ុន សែន សម្រេចលុបចោលនោះ ក្រសួងមហាផ្ទៃ បានដាក់គម្រោងសិក្សាបំបែកខេត្តពីរ ដោយកំណត់គោលដៅសិក្សាលើភូមិសាស្ត្រខេត្តកណ្ដាល ខេត្តមណ្ឌលគីរី និងរតនគីរី។ បើតាមក្រសួងមហាផ្ទៃ ខេត្តមណ្ឌលគីរី គឺត្រូវពិនិត្យលើកត្តាភូមិសាស្ត្រ និងប្រជាពលរដ្ឋរបស់ស្រុកកោះញែក និងទីតាំងក្នុងស្រុកលំផាត់ នៃខេត្តរតនគីរី។ ចំណែកខេត្តថ្មីមួយទៀត នឹងត្រូវបំបែកចេញពីខេត្តកណ្ដាល៕
Tag:
ស ខេង
ម៉ៅ ភិរុណ
ចរាចរណ៍
© រក្សាសិទ្ធិដោយ thmeythmey.com