អន្តរជាតិ
តួកគី ថា អាចទិញយុទ្ធោបករណ៍ពីរុស្ស៊ីថែមទៀត បើអាមេរិកមិនលក់ឲ្យទេ
× តួកគី នឹងដកថយឡើយពីគម្រោងទិញប្រព័ន្ធការពារអាកាស S-400 របស់រុស្ស៊ី ទោះជាអាមេរិកបានគំរាមផង អង្វរផងឲ្យផ្អាកគម្រោងនេះក្ដី។ សម្រាប់អាមេរិក អាវុធរបស់រុស្ស៊ី និងអាមេរិកមិនស្ថិតនៅក្នុងឃ្លាំងជាមួយគ្នាបានឡើយ ហើយតួកគីត្រូវតែសម្រេចចិត្តជ្រើសរើសមួយ។ ទោះត្រូវអាមេរិកបង្ខំយ៉ាងណា តួកគីមិនប្ដូរជំហរឡើយ ហើយបន្តទិញ S-400 ដដែល ហើយអាចទទួលបានមុនកំណត់ផង។ ចំណែកក្នុងករណីអាមេរិកលែងលក់យន្តហោះឲ្យ F-35 នោះ តួកគីនឹងសម្លឹងមើលទីផ្សារផ្សេង។
សុខចិត្តអត់ទិញ F-35 ឲ្យតែបាន S-400 ។ ប្រធានាធិបតីតួកគី តៃយីប អ៊ែរដូហ្កាន់ ទម្លាយថា អាមេរិកតែងតែសួរនាំពីគម្រោងទិញប្រព័ន្ធការពារមីស៊ីល S-400 និងបង្ខំឲ្យបោះបង់គម្រោងនេះចោល ប្រសិនបើនៅមានចិត្តចង់បានយន្តហោះស៊េរីទំនើប F-35 របស់អាមេរិក។ ប៉ុន្តែលោក អ៊ែរដូហ្កាន់ ប្រាប់អាមេរិកថា អ្វីៗចប់សព្វគ្រប់អស់ហើយ ឯតួកគីចាំតែទទួល S-400 ពីរុស្ស៊ីក្នុងខែកក្កដាខាងមុខប៉ុណ្ណោះ។ លោកបង្ហើបថា តួកគីអាចទទួល S-400 មុនពេលទៀតផង។
ជាច្រើនលើកច្រើនសារ ក្រុងវ៉ាស៊ីនតោនបានប្រាប់ឲ្យក្រុងអង់ការ៉ាឈប់ទិញប្រព័ន្ធការពាររបស់រុស្ស៊ី ព្រោះវាមិនសមស្របជាមួយប្រព័ន្ធការពាររបស់សម្ព័ន្ធយោធាណាតូឡើយ។ ក្រុងវ៉ាស៊ីនតោនបញ្ជាក់ថា អាវុធរបស់រុស្ស៊ី អាចប៉ះពាល់ដល់សន្តិសុខរបស់ F-35 ដែលជាផលិតផលរបស់ក្រុមហ៊ុនអាមេរិក Lockheed Martins ។ ដោយសាររឿងនេះ សមាជិកព្រឹទ្ធសភាអាមេរិកគំរាមដាក់ទណ្ឌកម្មសម្ព័ន្ធមិត្តណាតូមួយនេះទៀតផង។
ដើម្បីបញ្ចុះបញ្ចូលតួកគី រដ្ឋមន្ត្រីស្តីទីក្រសួងការពារជាតិអាមេរិក ផាទ្រីក សាណាហាន់ បង្ហាញក្ដីរំពឹងថា តួកគីអាចទិញប្រព័ន្ធការពារជាតិ Patriot ជំនួស S-400 របស់តួកគី ព្រោះអាចរក្សាគម្រោងទិញលក់ F-35 បានទៀតផង។ យ៉ាងណាមិញ បើតួកគីនៅជម្នះទិញ S-400 ទៀតនោះ អាមេរិកនឹងមិនលក់ទាំងខែលការពារ Patriot ទាំងF-35 តែម្ដង។
បើអាមេរិកមិនលក់ Patriot ឲ្យទេ តួកគីអាចទិញប្រព័ន្ធការពារពីរុស្ស៊ីថែមទៀត។ នេះជាការលើកឡើងរបស់រដ្ឋមន្ត្រីការបរទេសតួកគី Mevlut Cavusoglu នៅថ្ងៃទី១០ ខែមេសា។ បើតាមទីភ្នាក់ងារព័ត៌មាន Reuters ប្រមុខការទូតតួកគីមិនភ័យបារម្ភអ្វីឡើយ បើអាមេរិកលុបចោលគម្រោងលក់ F-35 នោះ ដោយលោកអះអាងថា ប្រទេសរបស់លោក នឹងស្វែងរកយន្តហោះប្រទេសផ្សេងក៏បានដើម្បីជំនួសយន្តហោះអាមេរិក។
តាមពិតទៅ មិនមែនតួកគីមិនចង់បានសព្វាវុធអាមេរិកទេ។ លោក Mevlut Cavusoglu លើកឡើងថា តួកគីបានដាក់សំណើទៅកាន់អាមេរិកក្នុងការបង្កើតក្រុមការងាររួមមួយដើម្បីត្រួតពិនិត្យគម្រោងខែលការពារ S-400 របស់រុស្ស៊ី ប៉ុន្តែអាមេរិកមិនបានឆ្លើយតបដោយវិជ្ជមានឡើយ។ ក្រុងអង់ការ៉ាទំនងចង់បញ្ជាក់ទៅក្រុងវ៉ាស៊ីនតោនថា គម្រោងទិញ S-400 ជាមួយក្រុងមូស្គូ នឹងមិនប៉ះពាល់ដល់គម្រោងរួមគ្នាជាមួយលើការផលិត F-35 ឡើយ៕
Tag:
តួកគី
អាមេរិក
រុស្ស៊ី
Mevlut Cavusoglu
© រក្សាសិទ្ធិដោយ thmeythmey.com