ONE Championship
កីឡាជាតិ
ជាតិ
×![]()
ដោយ៖ ស៊ីធី
អ្នកលេងគុនចម្រុះ ចាន់ រតនា គឺជាម្ចាស់ក្លិបប្រដាល់សិល្បៈដែលមានទីតាំងស្ថិតនៅក្បែរសារមន្ទីរឧក្រិដ្ឋកម្មប្រល័យពូជសាសន៍ទួលស្លែង។ រតនាថាទីតាំងបច្ចុប្បន្នដែលនឹងផុតកិច្ចសន្យានាខែកញ្ញា ឆ្នាំ ២០១៩ ក្រោយជួលសម្រាប់បង្វឹកសិស្សរយៈពេល៣ឆ្នាំ ដែលធ្វើឲ្យរូបគេជួបផលលំបាកមួយចំនួនក្នុងការប្ដូរទីតាំងក្លិបថ្មី។
អ្នកលេងគុនខ្មែរវ័យ ៣៣ ឆ្នាំរូបនេះបានបញ្ជាក់ថា ៖«ទីតាំងក្បែរគុកទួលស្លែង បច្ចុប្បន្ន នេះខ្ញុំជួលគេ ហើយត្រូវផុតកុងត្រាត្រឹមខែ កញ្ញានេះ ព្រោះម្ចាស់គាត់ប្រាប់ថាត្រូវលក់ឲ្យអ្នកផ្សេង។ ខ្ញុំមិនទាន់រកបានទីតាំងថ្មីនៅឡើយ។ ទីតាំងនេះល្អណាស់ ហើយ តម្លៃសមរម្យ ដែលខ្ញុំអាចរស់បានទោះមិនចំណេញ។ ទីតាំងនេះអំណោយផល ខ្ញុំអាចចូលរួមបង្ហាត់គុនខ្មែរដល់កីឡាករវ័យក្មេងដែលចង់ឡើងសង្វៀនប្រកួត និង ជនបរទេសដែលគាត់ចង់ចេះ និង ហាត់សម្រាប់សុខភាពផង»។
គ្រូបង្វឹកក្លិបប្រដាល់សិល្បៈរៀបរាប់អំពីផលលំបាកខ្លះៗថា បើសិនប្ដូរទាំងតាំង នោះអាចបាត់បង់កីឡាករមួយចំនួនដែលហាត់ដើម្បីសុខភាព បើសិនរកកន្លែងជួលកន្លែងផ្សេងឆ្ងាយពីទីលំនៅរបស់ពួកគេ។ បច្ចុប្បន្ននេះមានជនបរទេស ចូលរួមហ្វឹកហាត់ប្រមាណ ៣០ នាក់ដើម្បីចង់ចេះគុនខ្មែរ និង ដើម្បីសុខភាព ដែលក្នុងនោះមានបរទេស ២ នាក់ហ្វឹកហាត់ក្នុងគោលបំណងចង់ឡើងរេញប្រកួត។ ចំណែកកូនសិស្សជាជនជាតិខ្មែរវិញ មានប្រមាណ ៣០ នាក់ដែរ ដែលត្រូវបង្ហាត់ ៣ វេន ពោលម៉ោងព្រឹក រសៀល និង ល្ងាច។
អ្នកប្រយុទ្ធក្បាច់គុនយុទ្ធក្រមខម បានបញ្ជាក់ទៀតថា៖«ខ្ញុំកំពុងស្វែងរកទីតាំង ប៉ុន្តែប្រហែលមិនអាចរកទីតាំងធំដូចកន្លែងបច្ចុប្បន្ននេះទេ បើខ្ញុំរ៉ាប់រងតែឯងជាមួយគ្រួសារខ្ញុំ ព្រោះនៅក្នុងក្រុងជួលថ្លៃៗណាស់។ ឥឡូវខ្ញុំមានមិត្តភ័ក្ដិគេចង់បបួលចូលហ៊ុនគ្នាដើម្បីរកទីតាំងថ្មីដែរ ប៉ុន្តែខ្ញុំកំពុងពិចារណាសិន... មិនទាន់សម្រេចចិត្តនោះទេ។ ទីតាំងថ្មី ខ្ញុំចង់ជួលម្ដុំ ទួលទំពូង ព្រោះ ខ្ញុំគិតថាល្អអាចទាក់ទាញជនបរទេសបានច្រើនដូចកន្លែងរាល់ថ្ងៃអីចឹង មិនឆ្ងាយពីក្រុង»។
សូមបញ្ជាក់ថា ចាន់ រតនា ជាកីឡាករតំណាងឲ្យកម្ពុជា ១ រូបដែលតែងតែឡើងសង្វៀន ប្រកួតគុនចម្រុះ ឬ MMA ជាប្រចាំនៅសង្វៀន One Championship ។ រតនា ឡើងប្រកួតលើកដំបូងជាអន្តរជាតិ នៅសង្វៀន One Championship ពេលរៀបចំនៅព្រះរាជាណាចក្រកម្ពុជាកាលឆ្នាំ ២០១៤។ ទោះបីវ័យរាងជ្រេចូល ៣៣ ឆ្នាំ ប៉ុន្តែ ចាន់ រតនា នៅតែធ្វើបានល្អនៅលើសង្វៀនកម្រិតពិភពលោកមួយនេះក្រោយវ៉ៃកីឡាករគុនចម្រុះ ABRO Fernandez របស់ឥណ្ឌូណេស៊ី ឲ្យចុះចាញ់ត្រឹមទឹកទី២ កាលចុងឆ្នាំ ២០១៨ កន្លងទៅនៅប្រទេសម៉ាឡេស៊ី៕
Tag:
ចាន់ រតនា
© រក្សាសិទ្ធិដោយ thmeythmey.com
