កាដូនាឡិកាថ្លៃបង្ខំឲ្យលោក Reinhard ប្រកាសចុះពីតំណែងជាបន្តបន្ទាប់ក្នុងបាល់ទាត់

កីឡាអន្តរជាតិ

អន្តរជាតិ

កាដូនាឡិកាថ្លៃបង្ខំឲ្យលោក Reinhard ប្រកាសចុះពីតំណែងជាបន្តបន្ទាប់ក្នុងបាល់ទាត់

11, Apr 2019 , 3:49 pm

រូបភាព

លោក Reinhard Grindel

ដោយ: ទេព ពិទូរ្យ

អនុប្រធានសហព័ន្ធកីឡាបាល់ទាត់ទ្វីបអឺរ៉ុប (UEFA) លោក Reinhard Grindel បានប្រកាសលាលែងពីតំណែងជាគណៈគ្រប់គ្រងកីឡាបាល់ទាត់ប្រចាំតំបន់អឺរ៉ុបនេះ និងលាឈប់ពីតំណែងគណៈកម្មាធិការប្រតិបត្តិរបស់សហព័ន្ធកីឡាបាល់ទាត់អន្តរជាតិ FIFA។ ការលាលែងដ៏ភ្ញាក់ផ្អើលនេះ បន្ទាប់ពីលោក Reinhard ទទួលកាដូដែលមានតម្លៃពីមិត្តរួមការងារ។

លោក Reinhard វ័យ ៥៧ ឆ្នាំរូបនេះក៏ទើបលាឈប់ពីតំណែងជាប្រធានសហព័ន្ធកីឡាបាល់ទាត់អាល្លឺម៉ង់ (GFA) ផងដែរកាលពីសប្តាហ៍មុនបន្ទាប់ពីមានការចោទប្រកាន់ថាលោកបានទទួលកាដូនាឡិកាដែលមានតម្លៃថ្លៃពីមិត្តរួមការងារម្នាក់។

បុរសសញ្ជាតិអាល្លឺម៉ង់រូបនេះបដិសេធថាមិនបានប្រព្រឹត្តកំហុសអ្វីទេមុនពេលប្រកាសចុះចេញពីតួនាទីសំខាន់ៗទាំង៣របស់លោក នៅថ្ងៃទី១០ ខែមេសា ឆ្នាំ២០១៩នេះ។

Reinhard បាននិយាយក្នុងសេចក្តីថ្លែងការណ៍មួយថា លោកត្រូវការការពារកេរ្តិ៍ឈ្មោះរបស់ UEFA ហើយលោកក៏មិនចង់ដាក់បន្ទុកដល់ FIFA ដែលកំពុងដើរឆ្ពោះទៅរកតម្លាភាពនិងអភិបាលកិច្ចល្អនោះទេ។

មុនការចុះចេញពីតំណែងដែលទទួលបានប្រាក់ឈ្នួល១,៨លានដុល្លារក្នុងមួយខែដ៏គួរឲ្យភ្ញាក់ផ្អើលនេះលោក Reinhard បានទទួលរងការរិះគន់ផងដែរកាលពីឆ្នាំមុន ជុំវិញការចូលនិវត្តន៍របស់ Mesut Ozil ពីក្រុមជម្រើសជាតិអាល្លឺម៉ង់។

ខ្សែបម្រើ Arsenal រូបនេះបានប្រកាសចែកផ្លូវពីក្រុមជម្រើសជាតិបន្ទាប់ពីអាល្លឺម៉ង់ធ្លាក់ចេញពី World Cup នៅរុស្សីត្រឹមវគ្គចែកពូល និងបញ្ហាចម្រូងចម្រាសក្រោយរូបគេជួបប្រធានាធិបតីតួកគីលោក Recep Tayyip Erdogan នៅមុនព្រឹត្តិការណ៍បាល់ទាត់ពិភពលោកនោះ៕