នាង យិន ម៉ាណា សុំនៅក្រៅឃុំ តែត្រូវបដិសេធ

ជាតិ

សង្គមជាតិ

នាង យិន ម៉ាណា សុំនៅក្រៅឃុំ តែត្រូវបដិសេធ

11, Apr 2019 , 9:19 pm

រូបភាព

ដោយ: ថ្មីៗ

នាង យិន ឃុនម៉ី ហៅ យិន ម៉ាណា បានឲ្យមេធាវីដាក់សំណើសុំនៅក្រៅឃុំបណ្តោះអាសន្ន ប៉ុន្តែ ចៅក្រមស៊ើបសួរ មិនយល់ព្រម។ លោក ឌី បូរីម៉ា មេធាវីរបស់នាង យិន ម៉ាណា ប្រាប់សារព័ត៌មានថ្មីៗថាតាមទូរសព្ទថា ការសម្រេចនេះ គឺជាសិទ្ធិនិងឆន្ទានុសិទ្ធិរបស់ចៅក្រមស៊ើបសួរ។

លោកមេធាវី មិនបានបញ្ជាក់ឡើយ ពីហេតុផល ដែលចៅក្រមស៊ើបសួរ បដិសេធសំណើរបស់កូនក្តីលោក។ លោក បកស្រាយថា សំណុំរឿងនេះ កំពុងស្ថិតក្នុងដំណាក់កាលនៃការស៊ើបសួរ ដូច្នេះ លោក មិនអាចនិយាយអ្វីច្រើនទេ។

នាង យិន ម៉ាណា បានទៅសម្រាកនៅមន្ទីរពេទ្យរុស្សី ក្រោមហេតុផលថាថប់ដង្ហើម។ សារព័ត៌មានមួយចំនួន ផ្សាយថា នាងត្រូវបានបញ្ជូនទៅពន្ធនាគារភ្នំពេញវិញហើយ ក្រោយបានធូរស្បើយ។

នាង យិន ម៉ាណា ដែលគេដឹងថាជាកូនអ្នកមានម្នាក់ បានរងពីបទបើកបរធ្វេសប្រហែល ក្រោយនាង បានបើករថយន្តបុកកញ្ញា ឌុំ រីដា និស្សិតឆ្នាំទី៤ ឲ្យស្លាប់ កាលពីពេលថ្មីៗនេះ។ គ្រួសាររបស់នាង យិន ម៉ាណា បានបង់ប្រាក់៧ម៉ឺនដុល្លារ ជូនទៅគ្រួសាររបស់កញ្ញា ឌុំ រីដា៕