អន្តរជាតិ
មេដឹកនាំកូរ៉េខាងជើង គីម ជុងអ៊ុន ជជែកជាមួយលោក Choe Ryong-hae ប្រធានសភាថ្មី និងជាប្រមុខរដ្ឋកូរ៉េខាងជើង។ (រូបភាព AFP)
×![]()
ដោយ: តន ចាន់រិទ្ធារ៉ា
នៅកូរ៉េខាងជើង ក្បាលម៉ាស៊ីនដឹកនាំរដ្ឋសំខាន់ៗ ត្រូវបានផ្លាស់ប្ដូរ លើកលែងតែមេដឹកនាំកំពូល គីម ជុងអ៊ុន ដែលរក្សាតំណែងចាស់ដដែល។ តំណែងនាយករដ្ឋមន្ត្រី និងប្រធានសភា ដែលមានភារកិច្ចលើកមុខមាត់ប្រទេសនៅលើឆាកអន្តរជាតិ ត្រូវបានដាក់មន្ត្រីថ្មីវ័យក្មេង ហើយស្និទ្ធលោក គីម ជុងអ៊ុន ។ សភាកូរ៉េខាងជើង នាកិច្ចប្រជុំនៅថ្ងៃទី១១ ខែមេសា បានអនុម័តសំណើដោះដូរនេះ ដែលស្នើដោយបក្សពលករកូរ៉េ។ 
សភាជាន់ខ្ពស់កូរ៉េខាងជើង បានបើកកិច្ចប្រជុំលើកដំបូងនៃអាណត្តិទី១៤ របស់ខ្លួន ក្រោយការបោះឆ្នោតកាលពីថ្ងៃទី១០ ខែមីនាកន្លងមក។ ការរុះរើក្បាលម៉ាស៊ីនដឹកនាំប្រទេស ជារបៀបវារៈសំខាន់នៃកិច្ចប្រជុំលើកដំបូងនេះ។ នេះបើតាមការផ្សាយរបស់ទីភ្នាក់ងារព័ត៌មានរដ្ឋកូរ៉េខាងជើង KCNA នៅថ្ងៃទី១២ ខែមេសា។
លោក គីម ជុងអ៊ុន ត្រូវបានបោះឆ្នោតឲ្យបន្តកាន់តំណែងប្រធានគណៈកម្មការកិច្ចការរដ្ឋរបស់កូរ៉េខាងជើងមួយអាណត្តិទៀត។ លោក គីម កាន់តំណែងប្រធានតាំងពីគណៈកម្មការនេះត្រូវបានបង្កើតក្នុងឆ្នាំ២០១៦ មក។ គណៈកម្មការមួយនេះ ជាស្ថាប័នសម្រេចចិត្តខ្ពស់ជាងគេបំផុតរបស់កូរ៉េខាងជើង ហើយលោក គីម ប្រើប្រាស់តំណែងប្រធានគណៈកម្មការនេះ ជាងារផ្លូវការរបស់ខ្លួន។ KCNA ផ្សាយថា ការជាប់ឆ្នោតរបស់លោក គីម ជាព្រឹត្តការណ៍សំខាន់ក្នុងប្រវត្តិសាស្ត្រ។
លើសពីនោះ លោក គីម ក៏ទទួលបានងារថ្មីមួយទៀតដែរ។ ជាលើកដំបូង ប្រព័ន្ធផ្សព្វផ្សាយកូរ៉េខាងជើងហៅលោក គីម ថា តំណាងកំពូលនៃប្រជាជនកូរ៉េទាំងអស់។ បើទីភ្នាក់ងារព័ត៌មាន AP ងារនេះត្រូវបង្កើតក្នុងក្រិត្យពិសេសមួយចេញកាលពីខែកុម្ភៈ ប៉ុន្តែត្រូវបានប្រើលើកទីមួយនៅថ្ងៃទី១២ ខែមេសាប៉ុណ្ណោះ។
អ្វីគួរកត់សម្គាល់នោះ តំណែងប្រធានសភា ដែលលោក Kim Yong-nam កាន់កាប់តាំងពីឆ្នាំ១៩៩៨ មក ត្រូវបានផ្លាស់ប្ដូរ។ លោក Choe Ryong-hae មន្ត្រីមានឥទ្ធិពលខ្លាំងនៅកូរ៉េខាងជើង និងជាអនុប្រធានគណៈកម្មការកិច្ចការរដ្ឋដែរ ក្លាយជាប្រធានសភាថ្មី។ តាមរដ្ឋធម្មនុញ្ញ ជាប្រធានសភា លោក Choe ក៏ក្លាយជាប្រមុខរដ្ឋកូរ៉េខាងជើងផងដែរ ដែលមានតួនាទីតំណាងកូរ៉េខាងជើងក្នុងកិច្ចការការទូត និងលើឆាកអន្តរជាតិ។
តំណែងសំខាន់មួយទៀតដែលត្រូវដោះដូរ គឺនាយករដ្ឋមន្ត្រី។ លោក Kim Jae-ryong សមាជិកជាន់ខ្ពស់បក្សកាន់អំណាច បានក្លាយជានាយករដ្ឋមន្ត្រីថ្មីជំនួសលោក Pak Pong-ju ។ លោក Pak កាន់តំណែងនេះតាំងពីឆ្នាំ២០១៣ មក ហើយជាមន្ត្រីសំខាន់ក្នុងការដឹកនាំការងារសេដ្ឋកិច្ចដែលដាក់ចេញដោយលោក គីម ។ លោក Pak ក៏បានត្រួតពិនិត្យការធ្វើកំណែទម្រង់ទ្រង់ទ្រាយធំក្នុងវិស័យសេដ្ឋកិច្ចរបស់កូរ៉េខាងជើង ដើម្បីជម្នះទណ្ឌកម្មអន្តរជាតិផងដែរ។
ការផ្លាស់ប្ដូរក្បាលម៉ាស៊ីនពេលនេះ ធ្វើឡើងស្របពេលដែលកូរ៉េខាងជើងប្រឈមមុខបញ្ហាថ្មីៗជាច្រើន ស្របពេលដែលការយកចិត្តទុកលើវិស័យសេដ្ឋកិច្ចក្នុងស្រុកក្លាយជាអាទិភាពសំខាន់។ ការផ្លាស់ប្ដូរមន្ត្រីដែលមានវ័យចំណាស់ដោយមន្ត្រីវ័យក្មេងជាងនេះ ក៏អាចជួយដល់ការប្រឹងប្រែងរបស់មេដឹកនាំកូរ៉េខាងជើងលោក គីម ជុងអ៊ុន ក្នុងការផ្លាស់ប្ដូរមុខមាត់រដ្ឋកុម្មុយនីស្តដែលកំពុងធ្វើខ្លួនឲ្យរដ្ឋផ្សេងលើពិភពលោក៕
Tag:
កូរ៉េខាងជើង
គីម ជុងអ៊ុន
© រក្សាសិទ្ធិដោយ thmeythmey.com
