កីឡាអន្តរជាតិ
អន្តរជាតិ
Chelsea រារាំងអ្នកគាំទ្រ៣នាក់ដែលប្រមាថ Salah មិនឲ្យចូលកីឡដ្ឋានពេលប៉ះ Slavia Prague
× Chelsea បានរារាំងអ្នកគាំទ្រខ្លួន ៣នាក់មិនឲ្យចូលកីឡដ្ឋានក្នុងជំនួបទល់នឹង Slavia Prague ក្នុងការប្រកួត Europa League ជើងទី១ វគ្គ៨ក្រុមចុងក្រោយ បន្ទាប់ពីខ្សែវីដេអូមួយបានបង្ហាញថាពួកគេច្រៀងបទចម្រៀងប្រកាន់ពូជសាសន៍លើ Mohamed Salah ខ្សែប្រយុទ្ធ Liverpool។
នៅក្នុងវីដេអូនោះ គេឃើញអ្នកគាំទ្រមួយក្រុមបានស្រែកច្រៀងដាក់អតីតខ្សែប្រយុទ្ធ Chelsea ថា «Salah គឺជាអ្នកបំផ្ទុះគ្រាប់បែក» ម្តងហើយម្តងទៀត។ ហើយមនុស្សបីនាក់ក្នុងចំណោមនោះ ត្រូវបានកំណត់និងរារាំងមិនឲ្យចូលទស្សនាក្នុងការប្រកួតឡើយ។
ជុំវិញឥរិយាបទរើសអើងពូជសាសន៍បែបនេះ ក្លិបហង្សក្រហម Liverpool បានហៅទង្វើនេះថាជា «អំពើថោកទាបមិនដឹងខ្យល់អ្វី និងជាការរំខាន និងគ្រោះថ្នាក់បំផុត»។
ក្រៅពីអ្នកទាំង៣ខាងលើ ក្រុមតោខៀវ Chelsea ក៏កំពុងតាមដាននិងស្វែងរកអត្តសញ្ញាណអ្នកគាំទ្រ៣រូបផ្សេងទៀតដែលស្ថិតក្នុងចំណោមអ្នកដែលច្រៀងបែបរើសអើងពូជសាសន៍នោះផងដែរ។
ក្លិប Chelsea រួមជាមួយ Liverpool ដែលកំពុងធ្វើការជាមួយប៉ូលិស អះអាងថាអ្នកដែលពាក់ព័ន្ធករណីនេះអាចនឹងត្រូវហាមឃាត់មិនឲ្យចូលរួមគាំទ្រក្នុងទីលានរបស់ពួកគេតទៅទៀតឡើយ។
វីដេអូដែលបង្ហាញពីការប្រមាទដល់ខ្សែប្រយុទ្ធសញ្ជាតិអេហ្ស៊ីប Salah នេះត្រូវបានផ្សព្វផ្សាយនៅលើបណ្តាញសង្គមនៅថ្ងៃទី១១ ខែមេសា ពោលគឺនៅមុនការប្រកួតរបស់ Chelsea ដែលយកឈ្នះ Slavia Prague ១-០ នៅឯកីឡដ្ឋាន Sinobo ក្នុងក្របខណ្ឌ UEFA Europa League វគ្គ៨ក្រុមចុងក្រោយជើងទី១៕
Tag:
បាល់ទាត់
រើសអើងពូជសាសន៍
Mohamed Salah
© រក្សាសិទ្ធិដោយ thmeythmey.com