កីឡាជាតិ
ជាតិ
លីគកំពូលសម្រាកមួយសប្តាហ៍ ដើម្បីទុកពេលឲ្យកីឡាករចូលរួមបុណ្យចូលឆ្នាំខ្មែរ
× ការប្រកួតបាល់ទាត់ដណ្តើមពានរង្វាន់ក្របខណ្ឌមិត្តហ្វូនខេមបូឌានលីគ ត្រូវផ្អាកការប្រកួតមួយសប្តាហ៍ ដើម្បីទុកពេលឲ្យកីឡាករតាមក្លិបនីមួយចូលរួមពិធីបុណ្យចូលឆ្នាំថ្មីប្រពៃណីខ្មែរ។ ដោយឡែក ការប្រកួតពានរង្វាន់សម្តេច ហ៊ុន សែន ថ្នាក់ខេត្តនៅបន្តការប្រកួតធម្មតា។
ពិធីបុណ្យចូលឆ្នាំថ្មីប្រពៃណីខ្មែរនឹងប្រព្រឹត្តទៅចាប់ពីថ្ងៃទី១៤-១៦ ខែមេសា ឆ្នាំ២០១៩។ ដូច្នេះដើម្បីទុកពេលឲ្យកីឡាករ គ្រូបង្វឹក ថ្នាក់ដឹកនាំតាមក្លិបនីមួយៗបានជួបជុំគ្រួសារ និងញាតិមិត្តជិតឆ្ងាយក្នុងឱកាសនេះ គណៈកម្មាធិការប្រកួតបាល់ទាត់ជាតិកម្ពុជាសម្រេចផ្អាកការប្រកួតលីគកំពូលចំនួនមួយសប្តាហ៍។
ការផ្អាកនេះ ក៏ដោយសារតែការប្រកួតសប្តាហ៍ទី៤ ដែលរៀបចំនៅថ្ងៃទី១៣ និងទី១៤ មេសា ជាន់ថ្ងៃបុណ្យចូលឆ្នាំថ្មីប្រពៃណីខ្មែរ។ ការប្រកួតនឹងចាប់ផ្តើមឡើងវិញនៅសប្តាហ៍បន្ទាប់ ពោលគឺនៅថ្ងៃទី២៧ និងទី២៨ ខែមេសា ឆ្នាំ២០១៩។ នេះបើតាមការបញ្ជាក់របស់លោក ឆាំង ពិសិដ្ឋ លេខាធិការប្រតិបត្តិនៃគណៈកម្មាធិការប្រកួតបាល់ទាត់ជាតិកម្ពុជា។
ដោយឡែក ការប្រកួតបាល់ទាត់ដណ្តើមពានរង្វាន់សម្តេច ហ៊ុន សែន ថ្នាក់ខេត្តនៅបន្តការប្រកួតធម្មតា ដោយសារការប្រកួតមិនជាន់ថ្ងៃជាមួយពិធីបុណ្យចូលឆ្នាំថ្មីប្រពៃណីខ្មែរ៕
Tag:
បាល់ទាត់
ឆាំង ពិសិដ្ឋ
Cambodian League 2019
© រក្សាសិទ្ធិដោយ thmeythmey.com