ជាតិ
សង្គមជាតិ
រដ្ឋមន្ត្រីពាណិជ្ជកម្ម មិនគាំទ្រការផ្សាយពាណិជ្ជកម្មគ្រឿងស្រវឹងជាសាធារណៈឡើយ
× ភ្នំពេញ៖ ក្រសួងពាណិជ្ជកម្ម កំពុងត្រៀមវិធានការចំនួនពីរ ដើម្បីកាត់បន្ថយផលប៉ះពាល់អវិជ្ជមាន ដែលកើតចេញពីការផ្សាយពាណិជ្ជកម្មគ្រឿងស្រវឹងមកលើសង្គមកម្ពុជា ជាពិសេសប៉ះពាល់ដល់យុវជន ដែលជាសសរទ្រូងនៃប្រទេសជាតិ។
លោក ប៉ាន សូរស័ក្តិ ប្រកាសមិនគាំទ្រ ចំពោះការផ្សាយពាណិជ្ជកម្មស្រាបៀរ ឬគ្រឿងស្រវឹងជាសាធារណៈឡើយ ហើយក្រសួងក៏មិនទទួលយកការឧបត្ថម្ភពីក្រុមហ៊ុនស្រាបៀរ សម្រាប់ព្រឹត្តិការណ៍ពិព័រណ៍ផលិតផលខ្មែរដែរ។
ដើម្បីកាត់បន្ថយផលប៉ះពាល់នៃការផ្សាយពាណិជ្ជកម្មគ្រឿងស្រវឹងនេះ រដ្ឋមន្ត្រីក្រសួងពាណិជ្ជកម្ម ក៏ត្រៀមវិធានការចំនួនពីរ សម្រាប់ដាក់ឲ្យអនុវត្តផងដែរ។ វិធានការដែលក្រសួងត្រៀមអនុវត្តរួមមាន ទី១ រៀបចំសេចក្តីព្រាងអនុក្រឹត្យ ស្តីពីការគ្រប់គ្រងការផ្សាយពាណិជ្ជកម្ម លើផលិតផលគ្រឿងស្រវឹង ដើម្បីដាក់ជូនសម្តេចនាយករដ្ឋមន្ត្រី ហ៊ុន សែន ពិនិត្យ និងសម្រេច និងទី២ រៀបចំប្រកាសអន្តរក្រសួង ស្តីពីការគ្រប់គ្រងការផ្សាយពាណិជ្ជកម្ម ដោយអនុលោមតាមច្បាប់ស្តីពីការគ្រប់គ្រងគុណភាព និងសុវត្ថិភាពផលិតផលទំនិញ និងសេវា។
ថ្លែងក្នុងកិច្ចប្រជុំជាមួយសមាជិក-សមាជិកានៃឧត្តមក្រុមប្រឹក្សាពិគ្រោះ និងផ្តល់យោបល់ កាលពីថ្ងៃទី១១ មេសា រដ្ឋមន្ត្រីក្រសួងពាណិជ្ជកម្មរូបនេះ បាននិយាយដូច្នេះថា៖«ខ្ញុំស្នើសុំឯកឧត្តម លោកជំទាវ មេត្តាជួយគាំទ្រកិច្ចការរបស់ក្រសួងពាណិជ្ជកម្ម និងអគ្គនាយកដ្ឋានកាំកុងត្រូល ក្នុងការអនុវត្តតួនាទី និងកាតព្វកិច្ចថ្មី ដោយអនុលោមតាមច្បាប់ស្តីពីសុវត្ថិភាពម្ហូបអាហារ ច្បាប់ស្តីពីកិច្ចការពារអ្នកប្រើប្រាស់ និងច្បាប់ស្តីពីការប្រកួតប្រជែង នៅពេលច្បាប់ទាំងបីនេះ ត្រូវបានអនុម័តចប់សព្វគ្រប់ ដើម្បីកាត់បន្ថយផលប៉ះពាល់នៃការប្រើប្រាស់គ្រឿងស្រវឹង នៅក្នុងប្រទេសជាតិរបស់យើង»។
អមជាមួយការលើកឡើងនេះ លោក ប៉ាន សូរស័ក្តិ ក៏បាននិយាយពីការខិតខំប្រឹងប្រែងរបស់ក្រសួងក្នុងការចុះអប់រំច្បាប់ និងផ្សព្វផ្សាយជូនប្រជាពលរដ្ឋ អំពីការផ្សាយពាណិជ្ជកម្មដែលមានលក្ខណភូតកុហក ឬឆបោក ព្រមទាំងផលប៉ះពាល់នៃការសេពគ្រឿងស្រវឹងទៀតផង។ ជាពិសេសដំណើរការចងក្រងច្បាប់ និងលិខិតបទដ្ឋានគតិយុត្តិសំខាន់ៗ សម្រាប់បម្រើការអភិវឌ្ឍវិស័យពាណិជ្ជកម្ម និងការពារអត្ថប្រយោជន៍ប្រជាពលរដ្ឋ ដែលជាអ្នកប្រើប្រាស់ទំនិញ និងវិស័យឯកជន នៅក្នុងប្រទេសកម្ពុជា៕
Tag:
ប៉ាន សូរស័ក្តិ
ពាណិជ្ជកម្ម
គ្រឿងស្រវឹង
© រក្សាសិទ្ធិដោយ thmeythmey.com