ជាតិ
សង្គមជាតិ
សមត្ថកិច្ច ចាប់បានមេខ្យល់ ដែលទារប្រាក់ពីពលករ នៅច្រកប៉ោយប៉ែត បុរសពាក់អាវស ដែលសមត្ថកិច្ច អះអាងថា ជាមេខ្យល់ទារប្រាក់ពីពលករមកពីថៃ។ រូបភាពបានពីទំព័រហ្វេសប៊ុករបស់ប៉ុស្ដិ៍នគរបាលច្រកទ្វារអន្តរជាតិប៉ោយប៉ែត
× ភ្នំពេញ៖ មន្ត្រីប្រចាំច្រកទ្វារព្រំដែនអន្តរជាតិប៉ោយប៉ែត បានឃាត់បុរសម្នាក់ពីបទជំរិតទារប្រាក់ពីពលករខ្មែរមកពីប្រទេសថៃ ដើម្បីចូលរួមក្នុងពិធីបុណ្យចូលឆ្នាំថ្មី។ ការឃាត់ខ្លួននេះ បានធ្វើឡើងស្របពេលមានការចោទប្រកាន់ថា មន្ត្រីប៉ូលិសព្រំដែនខ្មែរនៅប៉ោយប៉ែត បានឆក់ឱកាសឱ្យមានសេវាក្រៅផ្លូវការវីអាយភី (VIP) ដើម្បីយកប្រាក់ពីពលករឆ្លងដែនពីថៃចូលមកខ្មែរ។
យោងតាមទំព័រហ្វេសប៊ុករបស់ប៉ុស្ដិ៍នគរបាលច្រកទ្វារអន្តរជាតិប៉ោយប៉ែត កាលពីថ្ងៃទី១១មេសា ឆ្នាំ២០១៩ បានបង្ហាញមុខបុរសម្នាក់ និងរៀបរាប់យ៉ាងខ្លីថា «ការឃាត់ខ្លួនមេខ្យល់ជំរិតទារប្រាក់ពីបងប្អូនពលករ នៅតែបន្តដូចភ្លៀងរលឹម។ សូមបងប្អូនមកទាក់ទងមន្ត្រីដោយផ្ទាល់ ចៀសវាងការចាញ់បោក និងខាតបង់ប្រាក់កាស»។
សារព័ត៌មានថ្មីៗ មិនអាចសុំការបកស្រាយបន្ថែមពីលោក ខឹម ចិត្រា ប្រធានប៉ុស្ដិ៍នគរបាលច្រកទ្វារនេះបានឡើយ ដោយលោកពុំទទួលទូរសព្ទ។ ចំណែក លោក គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍ មិនអាចទាក់ទងបាន។
ជិតបុណ្យចូលឆ្នាំខ្មែរ ពលករដែលធ្វើការនៅប្រទេសថៃជាច្រើន បាននាំគ្នាសម្រុកមកស្រុកកំណើតវិញ ដែលបណ្តាលឱ្យមានភាពកកស្ទះពេញតាមច្រកព្រំដែន និងមានអ្នកខ្យល់គរផងដែរ ពេលកំពុងតម្រង់ជួរប្រថាប់ត្រា ដោយសារតែក្តៅនិងហប់ពេក។ ជាមួយគ្នានេះ ក៏មានការលេចលឺថា មន្ត្រីអន្តោប្រវេសន៍ច្រកទ្វារអន្តរជាតិប៉ោយប៉ែតបានទារប្រាក់ពីពលករមកពីប្រទេសថៃពី១០០ទៅ២០០បាតផងដែរ។
លោក ខៀវ សុភ័គ អ្នកនាំពាក្យក្រសួងមហាផ្ទៃ បានបញ្ជាក់ថាសារព័ត៌មានថ្មីៗកាលពីម្សិលមិញថា ប្រសិនបើរកឃើញមន្ត្រីអន្តោប្រវេសន៍នៅតាមព្រំដែនណាមួយ បានទារឬគំរាមយកប្រាក់ពីពលករ នឹងទទួលទោសតាមច្បាប់៕
Tag:
ពលករ
ចូលឆ្នាំខ្មែរ
© រក្សាសិទ្ធិដោយ thmeythmey.com