ពិធីបុណ្យចូលឆ្នាំថ្មីប្រពៃណីខ្មែរបានចូលមកដល់ ប្រជាពលរដ្ឋត្រៀមរួចរាល់ដើម្បីរាំកម្សាន្តនៅស្រុកកំណើត និងទីវត្តអារាមនានា។ ពិធីបុណ្យចូលឆ្នាំថ្មី ឆ្នាំកុរ ឯកស័ក ព.ស ២៥៦២ ដែលប្រព្រឹត្តទៅថ្ងៃទី១៤ ដល់ថ្ងៃ១៦ ខែមេសា ។
បទចម្រៀងប្រពៃណី បទRemix និងបទមរតកដើមជាច្រើនបទត្រូវបានផលិតឡើងដើម្បីកំដរបរិយាកាសដ៏រីករាយនាបុណ្យចូលឆ្នាំថ្មីនេះ។
សារព័ត៌មានថ្មីៗ សូមលើកយកបទចំនួន៥បទដែលកំពុងលេចធ្លោក្នុងពិធីបុណ្យចូលឆ្នាំនេះ បទទាំងនោះរួមមាន៖
«រលឹមប្រុយៗ» ច្រៀងដោយ មាស សុខសោភា និង BOB-Tempo
ផលិតកម្មថោន បានបញ្ចេញបទចម្រៀងដែលជាស្នាដៃកូនខ្មែរ ជាចង្វាក់រាំវង់ Remix ដែលទទួលបានការគាំទ្រយ៉ាងខ្លាំងពីសំណាក់យុវជន។ តារាចម្រៀងផ្អែម មាស សុខសោភា បានបញ្ចេញបទនេះឲ្យរាំសប្បាយរីករាយក្នុងពិធីបុណ្យចូលឆ្នាំថ្មីនេះ។
«រលឹមប្រុយៗ»និពន្ធទំនុកច្រៀងនិងមេឡូឌីដោយ លោក សោម ដូរ៉េ និងនិពន្ធបទភ្លេងដោយ លោក Tempo Tris
«អាចក់អាចែម» ច្រៀងដោយ ព្រាប សុវត្ថិ
បទចម្រៀងដែលច្រៀងដោយកំពូលតារាប្រចាំផលិតកម្មរស្មីហង្សមាសនេះកំពុងទទួលការពេញនិយមយ៉ាងខ្លាំងលើបណ្តាញសង្គម។
អាចក់អាចែម ពីតារាកំពូលចម្រៀងព្រាប សុវត្ថិ គឺចង់បានរៀបរាប់ពីការនឹកស្រណោះពេលដែលបែកគ្នានិងសត្វ គោ ក្របីរបស់លោក ដែលបានបែកគ្នាជាច្រើនឆ្នាំ។
«អាចក់អាចែម» និពន្ធទំនុកច្រៀងនិងមេឡូឌីដោយ Vid Cooler រួមទាំងការនិពន្ធបទភ្លេងដោយ Chhit Tengrith ។
«ម៉ាប់ៗ» ច្រៀងដោយ ឱក សុគន្ធកញ្ញា
ជាប្រភេទបទ Remix របស់ផលិតកម្មរស្មីហង្សមាសចង់រៀបរាប់ពីមនុស្សប្រុសដែលមានមាឌម៉ាប់
ភ្នែកតឹង ប៉ុន្តែគួរអោយស្រឡាញ់។បទម៉ាប់ៗនេះបានកំពុងតែពេញនិយមខ្លាំងលើគ្រប់បណ្តាញសង្គម។
«ម៉ាប់ៗ» និពន្ធទំនុកច្រៀងដោយ លោក ជុំ លំអង និងនិពន្ធបទភ្លេង ដោយ មាស សុគន្ធ ។
«ចូលឆ្នាំទៅលេងបាត់ដំបង» ច្រៀងដោយ ឆាយ វីរយុទ្ធ និង សុខ ពិសី
បទចង្វាក់រាំវង់នេះ ជាបទដើមរបស់អធិរាជសំនៀងមាស ស៊ីន ស៊ីសាមុត និង រាជនីសំនៀងមាស រស់ សេរីសុទ្ធា ហើយត្រូវបានផលិតកម្ម Sunday រៀបចំផលិតសារជាថ្មី។
«ខ្យល់បក់រំភើយ» ច្រៀងដោយ និរ័ត្នន៍
បទចង្វាក់រាំវង់នេះ ជាបទដើមរបស់ សុង សេងហ៊ន ហើយត្រូវបានផលិតកម្ម Town រៀបចំផលិតសារជាថ្មី។