អន្តរជាតិ
×![]()
ដោយ: គី ចំណា
បង្គន់ និងប្រព័ន្ធលូគឺជាកន្លែងដែលមិនអាចខ្វះបានសម្រាប់ប្រជាជនរស់នៅតាមតំបន់នានា។ វាមាននាទីការពារ និងសម្អាតការរស់នៅរបស់មនុស្សពីជំងឺផ្សេងៗដែលអាចកើតមាន។ ប៉ុន្តែឧបករណ៍ប្រើប្រាស់មួយនេះមានប្រវត្តិ រួមទាំងដើមកំណើតអស់ជាច្រើនរយឆ្នាំមកហើយ។
គេហទំព័រអង់គ្លេស thoughtco.com ក្រោមចំណងជើងថា «Who Invented the Toilet» ពន្យល់ថា បង្គន់ និងប្រព័ន្ធត្រូវបានគេរកឃើញថាមានវត្តមានតាំងពី ២៨០០ ឆ្នាំមុនគ្រឹស្តសករាជឯណោះ។
បង្គន់ភាគច្រើនត្រូវបានសាងសង់ឡើងសម្រាប់តែអ្នកមានទ្រព្យតែប៉ុណ្ណោះ នៅក្នុងតំបន់សំណង់ទីក្រុងបុរាណ Mohenjo-Daro សព្វថ្ងៃប្រទេសប៉ាគីស្ថាន។ កាលពីសម័យនោះ គេសង់បង្គន់ឡើងពីថ្ម និងមានឈើសម្រាប់ទ្រាប់អង្គុយពីលើ។
កាកសំណល់ដែលចាក់ចេញទៅ ត្រូវបាននាំទៅតាមបំពង់ នៅតាមប្រព័ន្ធលូធំៗទៀត។ បង្គន់ដែលប្រើប្រាស់ប្រព័នុ្ធបង្ហូរទឹកក៏ត្រូវបានគេរកឃើញនៅប្រទេស ស្កុតឡែន ប្រទេសអេហ្ស៊ីប អាណាចក្រពែក្យ រួមទាំងអាណាចក្ររ៉ូមាំងផងដែរ។
ក្រោមឆ្នាំ៥០០ នៃគ្រឹស្តសករាជមក ប្រជាជនទូទៅនៅបណ្តាប្រទេសក្នុងទ្វីបអ៊ឺរ៉ុប ក៏បានប្រើប្រាស់បង្គន់នៅតាមផ្ទះដែរ។ វាគ្រាន់តែជាកន្លែងអង្គុយដែលមានប្រហោងមួយនៅពីក្រោមសម្រាប់បន្ទោរបង់។
នៅពេលយប់ មានអ្នកធ្វើការដើរប្រមូលកាកសំណល់ទាំងនោះយកទៅធ្វើជីធម្មជាតិសម្រាប់ដំណាំ។ ក្នុងឆ្នាំ ១៥៩៦ បង្គន់ដំបូងគេដែលមានលក្ខណៈស្រដៀងគ្នានឹងបង្គន់បច្ចុប្បន្នត្រូវបានផលិតឡើងដោយលោក Sir John Harington ជនជាតិអង់គ្លេស។
វាមានកន្លែងអង្គុយត្រឹមត្រូវ មានឧបករណ៍ទាញទឹកបង្ហូរលាងសម្អាតជាដើម។ បន្ទាប់មក ក្នុងឆ្នាំ១៧៧៥ លោក Alexander Cummming បានផលិតបង្គន់ដែលមានបំពង់រាងអក្សរ “S” នៅខាងក្នុងដើម្បីទប់ទឹក ហាមមិនឲ្យមានក្លិនមិនល្អចេញមកខាងក្រៅ។
នៅក្នុងអំឡុងសតវត្សន៍ទី១៩ បន្ទប់ទឹក ត្រូវបានទាក់ទាញប្រជាប្រិយភាពពីសំណាក់ប្រជាជនចំណូលមធ្យមជាច្រើន។ ចាប់តាំងពីឆ្នាំ១៨០០មក បង្គន់ និងបន្ទប់ទឹកបានក្លាយជាផ្នែកមួយក្នុងផ្ទះដែលមនុស្សគ្រប់គ្នាមិនអាចខ្វះបាន៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
