ភ្នំពេញ៖ ដើម្បីអបអរសាទរពិធីបុណ្យចូលឆ្នាំខ្មែរខាងមុខនេះ បណ្តាខេត្តទាំង១២ នៅកម្ពុជា រៀបចំ ព្រឹត្តិការណ៍«សង្ក្រាន្ត» ជាលក្ខណៈទ្រង់ទ្រាយធំ។ បណ្តាខេត្តដែលចូលរួមរៀបចំព្រឹត្តិការណ៍សង្រា្កន្តឆ្នាំនេះ រួមមានតាកែវ, កំពង់ស្ពឺ, ព្រះសីហនុ, កែប, កោះកុង, ស្វាយរៀង, ព្រៃវែង, ព្រះវិហារ, បាត់ដំបង, កំពង់ធំ, សៀមរាប, និងបន្ទាយមានជ័យ។
ព្រឹត្តិការណ៍ «សង្រា្កន្តបាទី» នៅខេត្តតាកែវ មានសិល្បៈករជាច្រើនរួមគ្នាសម្តែងចាប៉ីដងវែង ដែលជាមរតករបស់លោកតាប្រាជ្ញឈួន ដើម្បីរំលឹកកូនខ្មែរឲ្យចងចាំទុក និងថែរក្សាវប្បធម៌ខ្មែរ និងប្រពៃណីខ្មែរ។ «សង្រា្កន្តបាទី» ប្រារព្ធឡើងនៅថ្ងៃទី១៤-១៦ ខែមេសា ដែលរៀបចំនៅទីតាំង៤កន្លែងដូចជា រមណីយដ្ឋានទន្លេបាទី,ប្រាសាទតាព្រហ្ម,ប្រាសាទស្នោរ និងប្រាសាទភ្នំដា។
«កំពង់ស្ពឺសង្រា្កន្ត» ដែលប្រារព្ធនៅថ្ងៃទី១៤-១៦ ខែមេសា ខាងមុខនេះ មានការតាំងបង្ហាញ «ផ្លែស្ពឺយក្ស» ដែលតំណាងឲ្យឈ្មោះខេត្តកំពង់ស្ពឺ រួមទាំងមានការតាំងពិព័រណ៍រូបគំនូរដោយគូរផ្ទាល់ដៃដែលទាក់ទងនឹងទេសភាព និងសមិទ្ធផលរបស់ខេត្តកំពង់ស្ពឺ។ ព្រឹត្តិការណ៍នេះ រៀបចំនៅទីតាំង៦កន្លែង រួមមាននៅមុខសាលាខេត្ត សួនច្បារសម្តេចព្រះសង្ឃរាជ ជួន ណាត,វេទិកា អ៊ុំទូកខេត្ត,វត្តម្រុំខាងជើង,គណៈបក្សខេត្ត និងនៅជិតវត្តម្រុំ។
សម្រាប់ខេត្តព្រះសីហនុ ក៏មានព្រឹត្តិការណ៍ «សង្ក្រាន្តសមុទ្រ» ដែលរៀបចំជាលក្ខណៈទ្រង់ទ្រាយធំនៅឯឆ្នេរសមុទ្រឯករាជ្យ នៅថ្ងៃទី១៤-១៦ ខែមេសា។ កម្មវិធីសំខាន់ៗដែលមាននៅក្នុងសង្រា្កន្តសមុទ្រគឺមានដូចជា ការសម្តែងល្ខោនយីកេ ដែលរៀបរាប់ពីប្រវត្តិរបស់លោកយាយម៉ៅ ដែលជាបរមីអ្នកការពារ និងថែរក្សាទឹកដីខេត្តព្រះសីហនុ។ ក្នុងរយៈពេល៣ថ្ងៃនៃពិធីបុណ្យចូលឆ្នាំខ្មែរ ខេត្តកែប និងកោះកុង ក៏ប្រារព្ធពិធីសង្ក្រាន្តដើម្បីឲ្យពលរដ្ឋបានជួបជុំគ្នាលេងល្បែងប្រជាប្រិយខ្មែរ និងរាំកម្សាន្តជាមួយតន្ត្រីបែបប្រពៃណីខ្មែរផងដែរ។
នៅខេត្តកំពង់ធំឯណោះវិញក៏មានសង្រា្កន្តប្រាសាទសំបូរព្រៃគុកដែរ ដែលរៀបចំនៅបរិវេណប្រាសាទសំបូរព្រៃគុក ប្រាសាទយាយព័ន្ធ តំបន់សារមន្ទីរ, ប្រាសាទជ្រៃ និងប្រាសាទសង់ព្រះ។ ការរៀបចំ «សង្រា្កន្តប្រាសាទសំបូរព្រៃគុក» ដើម្បីបង្ហាញពីកន្លែងប្រវតិ្តសាស្ត្រ ដែលជាសម្បត្តិបេតិកភណ្ឌពិភពលោករបស់ប្រទេសកម្ពុជា។ ព្រឹត្តិការណ៍នេះ ប្រារព្ធឡើងនៅថ្ងៃទី១៤-១៦ ខែមេសា។
ចំពោះខេត្តព្រៃវែងវិញ ក៏មានកម្មវិធី ជ្រើសរើសបវរវ័យចំណាស់ដែលមានអាយុចន្លោះ៦០ឆ្នាំ បវរកញ្ញាស្រីស្អាត និង ប្រុសស្អាត ការតាំងបង្ហាញវត្ថុយក្សដូចជា កណ្តៀវច្រូតស្រូវយក្ស អង្រុតច្រូតត្រីយក្ស ទូកដែលមានប្រវែងវែងជាងគេប្រចាំខេត្តព្រៃវែង និងការតាំងពិព័រណ៍រូបជ្រូកយក្ស ព្រមទាំងរូបសត្វតំណាងឆ្នាំទាំង១២ សម្រាប់ទុកឲ្យពលរដ្ឋខ្មែរបានថតរូបផងដែរ។ កម្មវិធីនេះ ប្រារព្ធឡើងនៅថ្ងៃទី១៣-១៦ ខែមេសា។
សម្រាប់ពលរដ្ឋដែលរស់នៅខេត្តស្វាយរៀងនោះវិញ ក៏អាចចូលរួម ការសម្តែងសិល្បៈបែបទសវត្សទី៦០ និងមានការតាំងពិព័រណ៍ផលិតផលក្នុងស្រុក ប្រគុំតន្ត្រី ការបណ្តែតគោម ការលេងល្បែងប្រជាប្រិយខ្មែរ តាំងពិព័រណ៍រូបភាពនៃសហគ្រាស រោងចក្រ ដែលបានធ្វើការវិនិយោគនៅខេត្តស្វាយរៀង និងការតាំងពិព័រណ៍ម្ហូបអាហារខ្មែរផងដែរ។
ក្នុងរយៈពេល៥ថ្ងៃចាប់ពីថ្ងៃទី១២-១៦ ខែមេសា ខេត្តបន្ទាយមានជ័យ ក៏មានការតាំងបង្ហាញ មួក អង្រុត និងកញ្ច្រែង ខ្នាតធំ នៅបរិវេណប្រាសាទបន្ទាយឆ្មារ រួមទាំងមានការលេងល្បែងប្រជាប្រិយនៅទីតាំងទាំង៣នេះផងដែរ។
ការលេងល្បែងប្រជាប្រិយខ្មែរគ្រប់ប្រភេទ,ការរាំកម្សាន្ត,កម្មវិធីប្រគុំតន្ត្រី, ល្បែងវៃខែល និងទម្រង់សិល្បៈបែបបុរាណដែលសម្តែងដោយជនជាតិភាគតិច និងមានបទចម្រៀងដែលសម្តែងដោយសិល្បៈករខ្មែរ ដែលជាចម្រៀងទាក់ទងនឹងខេត្តព្រះវិហារ ក៏មាននៅព្រឹត្តិការណ៍ «ព្រះវិហារសង្ក្រាន្តកោះកែរ» នៅថ្ងៃទី១៤-១៦ ខែមេសា។
»ម្នាស់យក្ស» និង «ក្រូចយក្ស» បង្ហាញខ្លួននៅក្នុងព្រឹត្តិការណ៍ «សង្ក្រាន្តបាត់ដំបង» នាថ្ងៃទី១២-១៦ ខែមេសា នៅបរិវេណវិទ្យាល័យនេតយ៉ង់ ក្បែររង្វង់មូលរូបសំណាកលោកតាដំបងក្រញូង ខេត្តបាត់ដំបង។ ព្រឹត្តិការណ៍នេះជាការរៀបចំឡើងដោយ សហភាពសហព័ន្ធយុវជនកម្ពុជាខេត្តបាត់ដំបង និងរដ្ឋបាលខេត្តបាត់ដំបង។
ចំណែកឯសៀមរាបវិញ សហភាពសហព័ន្ធយុវជនកម្ពុជា មិនបានរៀបចំព្រឹត្តិការណ៍ អង្គរសង្រា្កន្ត ដូចនឹងឆ្នាំមុនៗឡើយ ប៉ុន្តែអភិបាលខេត្តសៀមរាប រៀបចំ «សង្រា្កន្តសៀមរាប» ជំនួសវិញដោយមិនខុសប្លែកពីគ្នាប៉ុន្មានទេ។ សម្រាប់ទីតាំងនៃការរៀបចំពិធីវិញ តាមការបញ្ជាក់របស់លោក ទៀ សីហា ប្រព្រឹត្តិទៅនៅបរិវេណសួនច្បារមហាសណ្ឋាគារអង្គរ មុខព្រះរាជដំណាក់។ «សង្ក្រាន្តសៀមរាប» ធ្វើឡើងរយៈពេល៣ថ្ងៃ គឺចាប់ពីថ្ងៃទី១៤ ដល់ទី១៦ ខែមេសា។
សម្រាប់តំបន់ផ្សេងទៀត ដូចជានៅក្នុងភូមិ ស្រុក នៅរាជធានី-ខេត្ត ទូទាំងប្រទេសកម្ពុជា ក៏មានកម្មវិធីដែលបង្កើតភាពសប្បាយរីករាយដែលជាលក្ខណៈតូចល្មមសម្រាប់ឲ្យពលរដ្ឋបានជួបជុំគ្នាលេង និងអបអរសាទរពិធីបុណ្យចូលឆ្នាំខ្មែរផងដែរ៕