ជាតិ
ចូលឆ្នាំ៖ លោក កឹម សុខា ចង់ឃើញខ្មែរវិលរកដំណោះស្រាយជាវិជ្ជមាន
× ភ្នំពេញ៖ នៅថ្ងៃទី១៣ ខែមេសានេះ លោក កឹម សុខា ប្រធានអតីតគណបក្សសង្គ្រោះជាតិ បានបង្ហោះសារនៅលើបណ្ដាញហ្វេសប៊ុករបស់ខ្លួន ដោយប្រាថ្នាឃើញឆ្នាំថ្មី ជាឆ្នាំដែល
ខ្មែរវិលមករកដំណោះស្រាយជាវិជ្ជមានវិញ។ នៅក្នុងសំណេរដដែល ប្រធានអតីតគណបក្សសង្គ្រោះជាតិ រូបនេះ ក៏បានបួងសួងឲ្យប្រទេសកម្ពុជាមានសុខសន្តិភាព ការរីកចម្រើន ស្ថិតស្ថេរគង់វង្សផងដែរ។ លោកបានសរសេរដូច្នេះ៖«ខ្ញុំ កឹម សុខា សូមឧទ្ទិសបួងសួងដល់ទេវតាឆ្នាំថ្មី ព្រះនាម ទុង្សាទេវី សូមព្រះមេត្តាប្រោសប្រទានពរជ័យឲ្យប្រទេសកម្ពុជា មានសុខសន្តិភាព ការរីកចម្រើន ស្ថិតស្ថេរគង់វង្ស សម្រាប់ប្រជាពលរដ្ឋខ្មែរគ្រប់រូប ដែលជាម្ចាស់ទឹកដី និងសូមឲ្យកម្ពុជាចាកផុតគ្រោះថ្នាក់ទាំងឡាយ ដែលបង្កដោយធម្មជាតិ ឬដោយមហិច្ឆតាអគតិរបស់មនុស្ស»។
លោក កឹម សុខា ក៏បន្តបួងសួងសូមឲ្យប្រជាពលរដ្ឋខ្មែររួមរស់ជាមួយគ្នា ដោយសុខដុមរមនា ប្រកបដោយព្រហ្មវិហារធម៌ផងដែរ។
សូមឲ្យ ប្រជាពលរដ្ឋខ្មែរ រួមរស់ជាមួយគ្នា ដោយសុខដុមរមនា ប្រកបដោយព្រហ្មវិហារធម៌ និងសូមឲ្យកំចាត់ចេញពីកាយ វាចា ចឹត្តរបស់មនុស្ស ជាពិសេសអ្នកនយោបាយខ្មែរ នូវអកុសលធម៌ទាំងឡាយ(លោភៈ ទោសៈ មោហៈ)ដូចជា ការលោភលន់គ្មានព្រំដែន ការរំលោភបំពាន ការគំរាមកំហែង អំពើហិង្សា ការមួលបង្កាច់ចោទប្រកាន់ ការលាបពណ៌ ការជេរប្រមាថ ការគំគួនសងសឹកគ្នា ដែលជាមូលហេតុនាំឲ្យមានការឈឺចាប់ ការបែកបាក់ក្នុងសង្គមជាតិ និងនាំឲ្យអាប់ឱននូវតម្លៃពូជសាសន៍ តម្លៃនៃអ្នកដឹកនាំ ជាពិសេសកិត្យានុភាពជាតិ។
សូមបញ្ជាក់ថា លោក កឹម សុខា បានជាប់ឃុំអស់រយៈពេល១៩ខែហើយ គិតពីថ្ងៃចាប់ខ្លួន រហូតដល់ខែមេសាឆ្នាំ២០១៩នេះ៕
© រក្សាសិទ្ធិដោយ thmeythmey.com