សុវត្តិភាព ចរាចរណ៍
អន្តរជាតិ
មហាក្សត្រថៃ ព្រួយព្រះទ័យព្រោះអ្នកស្លាប់ក្នុងគ្រោះថ្នាក់ចរាចរណ៍អំឡុងថ្ងៃសង្ក្រាន្តកើនឡើង
× មហាក្សត្រថៃ មហាវជិរាលង្ករណ៍ សម្តែងព្រះទ័យព្រួយបារម្ភ ក្រោយពីតួលេខអ្នកស្លាប់ដោយសារគ្រោះថ្នាក់ចរាចរណ៍ ៣ថ្ងៃដំបូងរបស់អាទិត្យជើងកបនៃថ្ងៃសង្ក្រាន្ត (Seven Dangerous Days) កើនឡើងដល់ជិត២០០នាក់។
ក្នុងព្រះរាជឱង្ការរបស់មហាក្សត្រថៃ ផ្ញើទៅកាន់លោកនាយករដ្ឋមន្ត្រីថៃ ឧត្តមសេនីយ៍ ប្រាយុទ្ធ ចាន់អូចា ទ្រង់ បានលើកទឹកចិត្តឲ្យមន្ត្រីប៉ូលីស យោធា ភ្នាក់ងាររដ្ឋ និងអ្នកស្ម័គ្រចិត្តនានា ខិតខំប្រឹងប្រែងកាត់បន្ថយគ្រោះថ្នាក់ និងសម្របសម្រួលការធ្វើដំណើរតាមដងផ្លូវដោយមានសុវត្ថិភាពនៅទូទាំងប្រទេស។ នេះបើតាមការបញ្ជាក់របស់អ្នកនាំពាក្យរដ្ឋាភិបាលថៃ លោក Werachon Sukondhapatipak កាលពីថ្ងៃ១៤ មេសា។
ដើម្បីកាត់បន្ថយគ្រោះថ្នាក់ចរាចរណ៍ អាជ្ញាធរថៃ កំណត់យករយៈពេល៧ថ្ងៃ ដែលចាប់ផ្តើមពីថ្ងៃ១១ មេសា ដល់ថ្ងៃ ១៧ មេសា សម្រាប់អនុវត្តច្បាប់តឹងរ៉ឹង រួមមាន ចោទប្រកាន់បទមនុស្សឃាតលើអ្នកបើកបរដោយមានផ្ទុកជាតិស្រវឹងជាដើម។ ការកំណត់ថ្ងៃបែបនេះ ធ្វើឡើងដោយសាររបាយការណ៍គ្រោះថ្នាក់ចរចារណ៍ជារៀងរាល់ឆ្នាំ បង្ហាញថា អ្នកស្លាប់ និងរបួសលើដងផ្លូវ ហក់ឡើងខ្ពស់ អំឡុងពេលពិធីបុណ្យចូលឆ្នាំថ្មី។
យោងតាមការចុះផ្សាយរបស់កាសែតបាងកកប៉ុស្តិ៍ មហាក្សត្រថៃ ទ្រង់ត្រាស់បង្គាប់ឲ្យរដ្ឋាភិបាលលោកប្រាយុទ្ធ ធានាឲ្យបានថា អាជ្ញាធរ និងអ្នកស្ម័គ្រចិត្តទទួលបានជំនួយ និងការផ្គត់ផ្គង់គ្រប់គ្រាន់ តាមអ្វីដែលពួកគេត្រូវការ។
ដើម្បីជាការឆ្លើយតប លោកនាយករដ្ឋមន្ត្រី ប្រាយុទ្ធ គូសបញ្ជាក់ថា ខណៈរដ្ឋាភិបាល និងមន្ត្រីពាក់ព័ន្ធទាំងអស់ កំពុងដុតដៃដុតជើងកាត់បន្ថយគ្រោះថ្នាក់ អ្វីដែលពួកគេត្រូវការបំផុតនោះ គឺជាកិច្ចសហការពេញលេញពីបណ្តាអ្នកបើកបរយានជំនិះទាំងអស់។ ត្រង់ចំណុចនេះ មេដឹកនាំរូបនេះ បន្ថែមថា៖«សុវត្ថិភាព ផ្តើមចេញពីអ្នកបើកបរខ្លួនឯង។ ពួកគេត្រូវគិតពីជីវិតខ្លួនឯង និងគ្រួសាររបស់ពួកគេ។ ក្រុមគ្រួសារ ក៏អាចដាស់តឿនអ្នកបើកបរទាំងនោះ ដោយប្រាប់កុំឲ្យល្មើសច្បាប់ចរាចរណ៍ជាដើម»។
សូមបញ្ជាក់ថា សម្រាប់៣ថ្ងៃដំបូងនៃអាទិត្យជើងកប គ្រោះថ្នាក់ចរាចរណ៍នៅទូទាំងប្រទេសថៃ មានចំនួន ១៦៦៥ករណី ដោយមនុស្ស១៧៤នាក់បាត់បង់ជីវិត និង១៧២៨នាក់ផ្សេងទៀងរងរបួស។ នេះបើតាមរបាយការណ៍របស់មជ្ឈមណ្ឌលគ្របគ្រង់សុវត្ថិភាពដងផ្លូវរបស់រដ្ឋាភិបាលថៃ ដែលគ្របដណ្តប់ពីថ្ងៃ១១ ដល់ ១៣ ខែមេសា។
លើសពីនេះ អាជ្ញាធរថៃ ក៏បានចោទប្រកាន់មនុស្សសរុប៧១ ៣០៧នាក់ពីបទបើកបរដោយមានជាតិស្រវឹង និងដកហូតយានជំនិះចំនួន ២២៩៤គ្រឿង ចន្លោះពីថ្ងៃ ១១ ដល់ ១៣ ខែមេសា។ ក្នុងចំណោមមនុស្សទាំងអស់នោះ អ្នកបើកបរម៉ូតូមានចំនួន ៤៤ ០២៤នាក់ និងអ្នកបើកបររថយន្តទាំងឯកជន និងរដ្ឋ មានចំនួន ២៧ ២៨៣នាក់៕
Tag:
ថៃ
គ្រោះថ្នាក់ចរាចរណ៍
© រក្សាសិទ្ធិដោយ thmeythmey.com