អន្តរជាតិ
នយោបាយអន្តរជាតិ
×![]()
ដោយ: តន ចាន់រិទ្ធារ៉ា
ការបោះឆ្នោតដ៏ធំបំផុតរបស់ពិភពលោកដែលធ្វើឡើងតែមួយថ្ងៃ បានចាប់ផ្ដើមហើយនៅឥណ្ឌូណេស៊ី។ ប្រជាជនឥណ្ឌូណេស៊ីជាង១៩០លាននាក់ បាននាំគ្នាឈរតម្រង់នៅការិយាល័យដើម្បីបោះឆ្នោតជ្រើសរើសមេដឹកនាំរបស់ខ្លួន។ ប្រធានាធិបតីបច្ចុប្បន្ន ចូកូ វីដូដូ ត្រូវការពារកៅអីរបស់ខ្លួនទល់នឹងគូប្រជែងចាស់ ប្រាបូវ៉ូ សូប៊ីយ៉ាន់តូ ដែលជាអតីតឧត្តមសេនីយ៍។ មិនមែនចប់ត្រឹមរើសប្រធានាធិបតីឡើយ ការបោះឆ្នោតជ្រើសតាំងសមាជិកសភាថ្នាក់ជាតិ និងតំបន់ ក៏ធ្វើស្របគ្នានេះដែរ។
ជាអតីតអ្នកជំនួញគ្រឿងសង្ហារិម ដែលគ្មានប្រវត្តិពាក់ព័ន្ធនយោបាយអ្វីសោះ លោក ចូកូ វីដូដូ កំពុងតែសង្ឃឹមក្នុងការបន្តតំណែងប្រធានាធិបតីរយៈពេល៥ឆ្នាំទៀត។ គូប្រកួតរបស់លោក វីដូដូ សម្រាប់ការបោះឆ្នោតថ្ងៃទី១៧ ខែមេសានេះ គឺអតីតមេទ័ព ប្រាបូវ៉ូ សូប៊ីយ៉ាន់តូ ដែលធ្លាប់រងបរាជ័យម្ដងហើយកាលពីឆ្នាំ២០១៤ ។
ការិយាល័យបោះឆ្នោត បានបើកដំណើរការតាំងពីព្រឹកព្រលឹម ដោយដំណើរការបោះឆ្នោតធ្វើឡើងរយៈពេល៨ម៉ោងប៉ុណ្ណោះ។ ក្រៅពីការជ្រើសរើសប្រធានាធិបតី អ្នកបោះឆ្នោតឥណ្ឌូណេស៊ី ក៏ត្រូវជ្រើសរើសសមាជិកសភាជាតិចំនួន៥៧៥នាក់។ ជាផ្នែកមួយនៃការបោះឆ្នោតជាកញ្ចប់នោះ អ្នកបោះឆ្នោតប្រមាណ១៩៣លាននាក់ ក៏ត្រូវជ្រើសរើសសមាជិកសភា និងមន្ត្រីថ្នាក់តំបន់ និងខេត្តដែលមានចំនួនជាងពីរម៉ឺនកន្លែង ខណៈបេក្ខជនមានដល់ទៅជាង២៥០ពាន់នាក់ឯណោះ។
បើតាមទីភ្នាក់ងារព័ត៌មាន AFP ការិយាល័យបោះឆ្នោតសរុបមានចំនួន៨០៩៥០០ទីតាំង ហើយបុគ្គលិកបម្រើការមានជាង៦លាននាក់។ អ្វីគួរឲ្យចាប់អារម្មណ៍ យោធា និងប៉ូលិស មិនត្រូវបានអនុញ្ញាតឲ្យចូលរួមក្នុងការបោះឆ្នោតដ៏ធំនេះឡើយ។
ការរាប់សន្លឹកឆ្នោត នឹងធ្វើភ្លាមៗតែម្ដង ហើយលទ្ធផលមិនផ្លូវការអាចនឹងនៅយប់ថ្ងៃទី១៧ ខែមេសានេះ។ ក្នុងការស្ទង់មតិមុនការបោះឆ្នោត លោក វីដូដូ មានភាគរយច្រើនក្នុងការបន្តអង្គុយកៅអីប្រធានាធិបតីទៀត ប៉ុន្តែគូប្រជែងរបស់លោក គឺលោក សូប៊ីយ៉ាន់តូ ក៏បង្ហាញក្ដីរំពឹងដូចគ្នាដែរ ដោយសង្ឃឹមថាទទួលបានការគាំទ្រចំនួនយ៉ាងតិច៦០ភាគរយ។ លទ្ធផលផ្លូវការ នឹងត្រូវប្រកាសនៅខែឧសភាខាងមុខ។
កាលពីឆ្នាំ២០១៤ លោក វីដូដូ បានផ្ដួលលោក សូប៊ីយ៉ាន់តូ ក្នុងសំឡេងប្រកៀកប្រកិតបំផុត។ ដ្បិតសំឡេងគាំទ្រក្បែរគ្នាពេក លោក សូប៊ីយ៉ាន់តូ ក៏តវ៉ា តែមិនបានផល។ គេរំពឹងថា លទ្ធផលដូចគ្នានេះ អាចកើតឡើងម្ដងទៀតក្នុងឆ្នាំ២០១៩ នេះ ព្រោះអ្នកនយោបាយទាំងពីរសុទ្ធតែត្រៀមខ្លួនបានល្អដូចគ្នាអស់រយៈពេល៦ខែនៃយុទ្ធនាការស្វែងរកសំឡេងឆ្នោត៕
Tag:
ឥណ្ឌូណេស៊ី
ចូកូ វីដូដូ
© រក្សាសិទ្ធិដោយ thmeythmey.com
