កីឡាអន្តរជាតិ
ជាតិ
គ្រូ Man Utd ថា Barca នឹងលើកពាន UCL រដូវកាលនេះ ក្រោយទម្លាក់ក្រុមខ្លួនត្រឹមវគ្គ៨ក្រុម
× លោក Ole Gunnar Solskjaer អ្នកចាត់ការទូទៅ Manchester United ជឿជាក់ថាគ្មានក្រុមណាក្រៅពី Barcelona ឡើយដែលអាចឈ្នះជើងឯកពានរង្វាន់ UEFA Champions League រដូវកាលនេះ។
ក្រុមបិសាចក្រហម Man Utd ក្រោមការដឹកនាំរបស់ Solskjaer បានធ្លាក់ចេញពីក្របខណ្ឌកំពូលអឺរ៉ុបត្រឹមវគ្គ៨ក្រុមចុងក្រោយបន្ទាប់ពីចាញ់ Barcelona ៣-០ ក្នុងជំនួបជើងទី២ ដែលធ្វើបានដោយ Lionel Messi ២គ្រាប់ម្នាក់ឯង។ សរុបលទ្ធផលការប្រកួតទាំងពីរជើង Barca ឈ្នះ Man Utd ៤-០។
២គ្រាប់របស់ខ្សែបម្រើឆ្នើម Messi និងមួយគ្រាប់របស់ Philippe Coutinho នៅកីឡដ្ឋាន Nou Camp បានបញ្ចប់ក្តីសង្ឃឹម លោក Solskjaer ក្នុងការនាំក្រុមឈានទៅកាន់វគ្គពាក់កណ្តាលផ្តាច់ព្រ័ត្រ។ ត្រឹមរយៈពេល៤នាទី ពោលគឺនាទី១៦ និង២០ ខ្សែបម្រើសញ្ជាតិអាហ្សង់ទីនរូបនេះអាចបំប៉ោងសំណាញ់ទីក្រុម Man Utd ដល់ទៅ២គ្រាប់ មុនពេល Coutinho ខ្សែបម្រើប្រេស៊ីលសម្រេចគ្រាប់ទី៣នៅនាទី ៦១។
ជ័យជម្នះរបស់ក្រុមរហស្សនាមអ្នកមានបុណ្យនេះ ត្រូវបានអ្នកចាត់ការសញ្ជាតិន័រវែសទទួលស្គាល់ផងដែរពីកម្រិតលេង និងការគ្រប់គ្រងបាល់ដ៏អស្ចារ្យរបស់ពួកគេ ព្រមជាមួយកីឡាករដ៏មានឥទ្ធិពលបំផុតលើទីលានគឺ Messi នោះ។
នៅពេលសួរអំពីឱកាសរបស់ Barca នៅ Champions League មុនឈានទៅប៉ះ Liverpool ឬ Porto លោក Solskjaer បានប្រាប់អ្នកយកព័ត៌មានថាថាក្រុមយក្សអេស្ប៉ាញនេះប្រាកដជាឈ្នះ។
«ជាមួយនឹងគុណភាពកីឡាករ ជាពិសេសនៅតំបន់ប្រយុទ្ធ៣រូបដូចជា Ousmane Dembele Malcom និង Messi គឺពិតជាខ្លាំង។ ខ្ញុំមិនភ្នាល់ជាមួយពួកគេទេ។ តែទោះបីខ្ញុំមិនភ្នាល់ក៏ដោយ សម្រាប់ខ្ញុំពួកគេនឹងឈ្នះការប្រកួតដែលនៅសល់ដើម្បីក្លាយជាម្ចាស់ពានកំពូលអឺរ៉ុបរដូវកាលនេះ»។ Solskjaer បង្ហាការជឿជាក់បែបនេះលើកូនក្រុមលោក Ernesto Valverde ដែលដឹកនាំ Barca លេងបានល្អបំផុតទាំងលីគក្នុងស្រុក និងក្រៅស្រុកនៅឆ្នាំនេះ។
បន្ទាប់ពីអស់សិទ្ធិនៅត្រឹមវគ្គ១/៤ផ្តាច់ព្រ័ត្រ Man Utd នៅសល់ភារកិច្ចសំខាន់មួយទៀតគឺត្រូវដណ្តើមយកតំណែង Top 4 នៅ Premier League ឲ្យបានដាច់ខាតដើម្បីបានកៅអីលេងនៅ Champions League រដូវកាលក្រោយ។
ម្ចាស់ជើងឯកលីគកំពូលអង់គ្លេស២០សម័យកាលស្ថិតនៅចំណាត់ថ្នាក់ទី៦ មាន៦៣ពិន្ទុ ក្នុងការប្រកួត៣៣លើក តាមពីក្រោយក្រុមលេខ៥ Chelsea ដែលប្រកួត៣៤លើក ២ពិន្ទុ និង Arsenal ២ពិន្ទុ ដែលប្រកួត៣៣លើកដូចគ្នា។ Man Utd, Chelsea និង Arsenal ត្រូវប្រជែងគ្នាខ្លាំងសម្រាប់ប្រកួតដែលនៅសេសសល់ ខណៈ Tottenham Hotspur ដែលមាន៦៧ពិន្ទុឈរនៅចំណាត់ថ្នាក់ទី៣ក៏មិនទាន់ផុតបារម្មណ៍ដែរ៕
Tag:
បាល់ទាត់
រង្វាន់ UEFA Champions League
Ole Gunnar Solskjaer
© រក្សាសិទ្ធិដោយ thmeythmey.com