វិទ្យាសាស្រ្ត និង បច្ចេកវិទ្យា
អន្តរជាតិ
ហេតុអ្វីបានជាសេកអាចនិយាយបាន?
× វាមិនមែនជារឿងមួយថ្មីនោះទេដែលថាសត្វសេកជាបក្សីមួយដែលអាចរៀននិយាយ និងធ្វើត្រាប់តាមសំឡេងមនុស្សនោះ។ មនុស្សភាគច្រើនក៏បានឃើញផ្ទាល់អំពីរឿងមួយនេះដែរ។ ប៉ុន្តែអ្នកភាគច្រើនមិនបានដឹងថាមូលហេតុអ្វីបានជាសេកអាចនិយាយ និងត្រាប់តាមសំឡេងមនុស្សនោះទេ? មូលហេតុអ្វីបានជាថនិកសត្វដែលមានដូចជា គោ ឆ្មា ឬ ឆ្កែមិនអាចធ្វើដូចសត្វសេកបាន?
ដោយដកស្រងចេញពីគេហទំព័រ thenest.com និង nature.com គេបានពន្យល់ថា បក្សីជាក្រុមសត្វដែលមានលក្ខណៈពិសេសជាងគេក្នុងការប្រើសំឡេងទំនាក់ទំនង។ បក្សីជាច្រើន ជាពិសេសបក្សីសេកគឺជាសត្វដែលត្រូវការទំនាក់ទំនងខ្លាំងណាស់ ជាពិសេសនៅក្នុងហ្វូងសត្វរបស់ពួកវា។
ដូចនេះ វិធីសាស្ត្រនានា ក្នុងការទាក់ទងគឺជាផ្នែកមួយសំខាន់ក្នុងការការពារខ្លួន ការពារដែនដី និងការរកចំណី។ នេះបានន័យថា នៅពេលដែលមនុស្សយកសត្វសេកមកចិញ្ចឹមក្នុងផ្ទះ សត្វសេកនោះក៏បានទំនោរក្នុងការធ្វើត្រាប់សំឡេងតាមមនុស្សដែរ ដោយសារតែសត្វសេកជាសត្វដែលចូលចិត្តប្រាស្រ័យទាក់ទង។
ប៉ុន្តែទម្រង់មាត់របស់សត្វសេក និងមនុស្សមិនសូវជាមានលក្ខណៈដូចគ្នាប៉ុន្មាននោះទេ។ មនុស្សមានបបូរមាត់ ថ្គាម ធ្មេញ និងអណ្តាត ដោយខុសពីសេក។ ពួកវាមានតែចំពុះ និងគ្មានធ្មេញ ឬថ្គាមដូចមនុស្សនោះទេ។
តាមពិតទៅ អណ្តាតរបស់សេកគ្រាន់តែជាផ្នែកមួយតែប៉ុណ្ណោះ។ សេកមានប្រព័ន្ធសំឡេងម្យ៉ាងដែលមានទីតាំងនៅតាមបំពង់ខ្យល់របស់សួត ដែលគេហៅថា «Syrinx» ។ Syrinx មានមុខងារស្រដៀងទៅនឹង Larynx ដែរ។ Larynx គឺជាប្រអប់សំឡេងរបស់មនុស្សមានទីតាំងនៅដើមបំពង់ក។
បើអ្នកពិនិត្យមើលឲ្យកាន់តែច្បាស់ អ្នកឃើញថាបក្សីបញ្ចេញសំឡេងរបស់វាភាគច្រើនចេញពីដើមទ្រូង គឺកន្លែងដែល Syrinx ស្ថិតនៅ។ រឿងមួយទៀតគឺថា សត្វសេកមួយចំនួនបានទទួលការវិវត្តទៅកាន់ខួរក្បាលរបស់វាជាមួយនឹងការចងចាំ និងត្រាប់តាមសំឡេងនានាបានល្អជាងសត្វដទៃ។
តើសួរថាសេកអាចយល់ពីភាសាមនុស្សនៅពេលដែលវានិយាយទេ? ប្រហែលជាមិនអាចទេ។ សកម្មភាពនេះគឺគ្រាន់តែជាការធ្វើត្រាប់តាមមនុស្សជាច្រើនដងប៉ុណ្ណោះ៕
© រក្សាសិទ្ធិដោយ thmeythmey.com