អន្តរជាតិ
លោក ម៉ៃ ប៉ុមប៉េអូ ចាប់ដៃលោក គីម ជុងអ៊ុន នាជំនួបកន្លងមក។ រូបភាព KCNA
×![]()
ដោយ: តន ចាន់រិទ្ធារ៉ា
កូរ៉េខាងជើង នៅថ្ងៃទី១៨ ខែមេសា បានទាមទារឲ្យអាមេរិកដករដ្ឋមន្ត្រីការបរទេស ម៉ៃ ប៉ុមប៉េអូ ចេញពីតុចរចានុយក្លេអ៊ែរ។ កូរ៉េខាងជើងចោទប្រមុខការទូតអាមេរិករូបនេះថា ធ្វើសកម្មភាពដែលប៉ះពាល់ដល់ការជជែកគ្នា ហើយវត្តមានរបស់លោកក្នុងពេលចរចា នឹងធ្វើឲ្យការចរចាកាន់តែយ៉ាប់យ៉ឺន។ លោក ប៉ុមប៉េអូ ជាតួអង្គសំខាន់មួយរបស់រដ្ឋបាលលោក ដូណាល់ ត្រាំ ដែលធ្វើការជាមួយកូរ៉េខាងជើងលើការរំសាយនុយក្លេអ៊ែរ។
កូរ៉េខាងជើង បានបង្ហាញការខឹងសម្បាររបស់ខ្លួនដាក់រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ និងស្នើឲ្យដករូបលោកចេញពីការចរចា។ ដោយចោទលោក ប៉ុមប៉េអូ ជាមនុស្សព្រហើន និងគ្មានគំនិតចាស់ទុំ មន្ត្រីក្រសួងការបរទេសកូរ៉េខាងជើងម្នាក់និយាយថា កូរ៉េខាងជើងចង់បានមន្ត្រីផ្សេងដើម្បីជជែកគ្នារឿងរំសាយនុយក្លេអ៊ែរក្នុងករណីដែលការចរចាចាប់ផ្ដើមឡើងវិញ។ នេះមិនមែនជាលើកទីមួយដែលកូរ៉េខាងជើ វាយប្រហារលោក ប៉ុមប៉េអូ ចំៗបែបនេះ។
បើតាមទីភ្នាក់ងារព័ត៌មានរដ្ឋកូរ៉េខាងជើង KCNA លោក Kwon Jong Gun អគ្គនាយកកិច្ចការអាមេរិកនៃក្រសួងការបរទេសកូរ៉េខាងជើង អះអាងថា បើលោក ប៉ុមប៉េអូ បន្តស្ថិតក្នុងការចរចាទៀតនោះ តុចរចានឹងជួបបញ្ហាជាដដែល និងចោទរដ្ឋមន្ត្រីការបរទេសអាមេរិកថា ឈរពាំងផ្លូវការចាប់ផ្ដើមការចរចាឡើងវិញតាមរយៈគំនិតលាក់បាំងរបស់ខ្លួន។ ជំនួសលោក ប៉ុមប៉េអូ មន្ត្រីកូរ៉េខាងជើងរូបនេះចង់បានមន្ត្រីដែលមានជំហរប្រយ័ត្នប្រយែង និងមានគំនិតចាស់ទុំក្នុងទំនាក់ទំនងជាមួយក្រុងព្យុងយ៉ាង។
សូមរំឭកថា លោក ប៉ុមប៉េអូ ជាមេក្រុមចរចារបស់អាមេរិកដើម្បីដោះស្រាយបញ្ហានុយក្លេអ៊ែរ ហើយដៃគូនៅទីក្រុងព្យុងយ៉ាង គឺលោក គីម យ៉ុងឈុល មន្ត្រីជំនិតលោក គីម ។ ប្រមុខការទូតអាមេរិករូបនេះបានទៅកាន់កូរ៉េខាងជើងបីបួនលើកដើម្បីស្វែងរកច្រកចេញនៃសំណុំរឿងរ៉ាំរ៉ៃនេះ ហើយបានបើកផ្លូវដល់ជំនួបមេដឹកនាំចំនួនពីរលើកផង។ ប៉ុន្តែសម្ដីប៉ុន្មានម៉ាត់ទាក់ទងលោក គីម ធ្វើឲ្យកូរ៉េខាងជើងមិនសប្បាយចិត្ត និងទាមទារឲ្យដកលោកចេញពីការចរចាតែម្ដង។
កាលពីសប្ដាហ៍មុន លោក ប៉ុមប៉េអូ ទទួលស្គាល់ចំពោះមុខសមាជិកសភាអាមេរិកថា លោក គីម ជាមេដឹកនាំផ្ដាច់ការ។ សម្ដីនេះហើយដែលលោក Kwon អះអាងថា ជាការមើលងាយ និងធ្វើឲ្យប៉ះពាល់សេចក្ដីថ្លៃថ្នូររបស់មេដឹកនាំកូរ៉េខាងជើងដែលចំណាយពេលជួបលោក ប៉ុមប៉េអូ នាពេលកន្លងទៅ។ ការនិយាយរិះគន់ដោយផ្ទាល់លើលោក គីម បែបនេះ ជារឿងមិនអាចទទួលយកបានឡើយសម្រាប់កូរ៉េខាងជើង ដែលត្រកូល គីម ត្រូវបានគោរពខ្លាំងបំផុតនោះ។
ការទាមទាររបស់កូរ៉េខាងជើងនេះ ទំនងលទ្ធភាពចាប់ផ្ដើមការចរចាឡើងវិញមានភាគរយតិច ប៉ុន្តែការទាមទារនេះអាចជាការសម្រេចចិត្តបែបយុទ្ធសាស្ត្រមួយផង។ តាមពិតទៅ កូរ៉េខាងជើង រីករាយនឹងការជជែកដោយផ្ទាល់ជាមួយលោក ត្រាំ ដើម្បីសម្រេចគោលដៅរបស់ខ្លួនជាជាងការឆ្លងកាត់មន្ត្រីបច្ចេកទេសច្រើន។ នេះ ក៏ព្រោះតែក្រុងព្យុងយ៉ាងយល់ថា លោក ត្រាំ ងាយស្រួលបញ្ចុះបញ្ចូលដោយសារមិនសូវមានបទពិសោធការទូតផង៕
Tag:
កូរ៉េខាងជើង
អាមេរិក
ប៉ុមប៉េអូ
© រក្សាសិទ្ធិដោយ thmeythmey.com
