ក្មេងប្រុស​ថៃ​ម្នាក់​ទទួលបាន​រង្វាន់​លើកទឹកចិត្ត​ក្រោយ​ចេញមុខ​សម្អាត​ប្រឡាយ​ទឹកស្អុយ​
អន្តរជាតិ
ក្មេងប្រុស​ថៃ​ម្នាក់​ទទួលបាន​រង្វាន់​លើកទឹកចិត្ត​ក្រោយ​ចេញមុខ​សម្អាត​ប្រឡាយ​ទឹកស្អុយ​
19, Apr 2019 , 9:59 am        
រូបភាព
រូបភាព៖ The Thaiger
រូបភាព៖ The Thaiger
​ក្មេងប្រុស​ថៃ​ម្នាក់ ទទួល​រង្វាន់​លើកទឹកចិត្ត ក្រោយ​បង្កើតជា​គំរូ​ដ៏​ល្អ​សម្រាប់​សហគមន៍​ខ្លួន ដោយ​ស្ម័គ្រចិត្ត​ប្រមូល​សំរាម​ក្នុង​ប្រឡាយ​ទឹកស្អុយ​។ រង្វាន់​លើកទឹកចិត្ត​នោះ គឺមាន​ដូចជា សញ្ញាបត្រ និង​អាហារូបករណ៍​។

 
​ក្មេងប្រុស​អាយុ​៨​ឆ្នាំ​រូបនេះ ឈ្មោះថា Kosin Ta-ngam រស់នៅក្នុង​ក្រុង Patong នៃ​ខេត្ត ភូ​កេ​ត (Phuket) ដែលមាន​ចម្ងាយ​៨៦០​គីឡូម៉ែត្រ​ពី​រាជធានី បាងកក ។ ក្មេងប្រុស​នេះ ចាប់ផ្តើម​ប្រមូល​សំរាម​ពី​ប្រឡាយ​ទឹកស្អុយ Pak Bang និង​តាម​បណ្តោយ​ឆ្នេរ Patong ចាប់តាំងពី​ដើមឆ្នាំ​២០១៩​មកម្ល៉េះ​។ បច្ចុប្បន្ននេះ ក្មេងប្រុស Kosin រស់នៅ​ជាមួយ​ជីដូន​ដែល​មើលថែ​រូបគេ​តាំងពី​វ័យ​កុមារ និង​សាច់ញាតិ​ដទៃទៀត​។​
 
​យោងតាម​ការចុះផ្សាយរ​បស់​សារព័ត៌មាន​ក្នុង​ស្រុកថៃ Thethaiger.com ស្នងការ​ប៉ូលិស​ក្រុង Patong លោក Anothai Jindamanee បានប្រគល់​សញ្ញាបត្រ អាហារូបករណ៍ និង​អាវ​ការពារ​ជីវិត ជា​រង្វាន់​លើកទឹកចិត្ត​ចំពោះ​ក្មេងប្រុស Kosin កាលពី​ថ្ងៃ​អង្គារ​ទី ១៦ មេសា​។ គោលបំណង​នៃ​ការផ្តល់​រង្វាន់​នេះ គឺ​ដើម្បី​បង្ហាញ​ពី​គំរូ​ដ៏​ប្រសើរ​សម្រាប់​សហគមន៍​នេះ​ទាំងមូល ដោយសារ​ក្មេងប្រុស​រូបនេះ មាន​ភាព​សកម្ម​ក្នុងការ​សម្អាត​ទីក្រុង​។ 
 
​សូមបញ្ជាក់ថា ប្រ​ឡាញ​ទឹក Pak Bang ដែល​ហូរ​កាត់​ពី​ទីក្រុង Patong ចូលទៅក្នុង​ឆ្នេរ​នោះ ត្រូវ​មើលឃើញថា ទឹក​មាន​លក្ខណៈ​ខ្មៅ​ខ្លាំង និង​ពោរពេញ​ដោយ​សំរាម​ក្នុង​រយៈពេល​ជាច្រើន​ឆ្នាំ​មកហើយ​។ មនុស្ស​ជាច្រើន​នៅ​តំបន់​នេះ បាន​សន្យា​សម្អាត​ប្រឡាយទឹក​ស្អុយ​នេះ​ឲ្យ​ស្អាត ប៉ុន្តែ​មកទល់​ពេល នេះ ប្រឡាយ​នេះ​នៅតែ​ជា​ផ្លូវទឹក​ដ៏​កខ្វក់​បំផុត​មួយ ដែល​ហូរ​ឆ្លងកាត់​ទីក្រុង​ទេសចរណ៍​ដ៏​សំខាន់​របស់​ថៃ ភូ​កេ​ត​ដដែល​៕

Tag:
 ថៃ​
  បរិស្ថាន
© រក្សាសិទ្ធិដោយ thmeythmey.com