អន្តរជាតិ
លោក ត្រាំ នឹងក្លាយជាមេដឹកនាំបរទេសដំបូងគេដែលជួបអធិរាជជប៉ុនថ្មី
× ប្រធានាធិបតីអាមេរិកលោក ដូណាល់ ត្រាំ នឹងបំពេញទស្សនកិច្ចនៅប្រទេសជប៉ុនចុងខែឧសភា ហើយលោកក៏នឹងក្លាយជាមេដឹកនាំបរទេសដំបូងគេដែលនឹងជួបជាមួយអធិរាជជប៉ុនថ្មីដែរ។ នេះបើតាមការបញ្ជាក់របស់សេតវិមានអាមេរិកនៅថ្ងៃទី ១៨ ខែមេសា។
ដំណើរទស្សនកិច្ចទៅកាន់ប្រទេសជប៉ុនរបស់ប្រធានាធិបតីអាមេរិកនឹងធ្វើឡើងនៅថ្ងៃ ២៥ ខែឧសភា និងបញ្ចប់វិញថ្ងៃ ២៨ ខែឧសភា ដោយមានស្ត្រីទីមួយ Melania អមដំណើរជាមួយដែរ។
បើតាមទីភ្នាក់ងារព័ត៌មាន AFP អ្នកនាំពាក្យរបស់ប្រធានាធិបតី លោកស្រី Sarah Sander បានបញ្ជាក់ថា លោក ត្រាំ នឹងក្លាយជាភ្ញៀវបរទេសដែលជួបជាមួយអធិរាជថ្មីរបស់ជប៉ុន ណារ៉ូហ៊ីតុ ដែលនឹងឡើងគ្រងរាជ្យជាផ្លូវការនៅថ្ងៃទី ១ ខែឧសភាខាងមុខ។
តាមពិតទៅ ព្រះចៅអធិរាជអាគីហ៊ីតុ នឹងដាក់រាជ្យផ្លូវការនៅថ្ងៃទី៣០ ខែមេសា។ មួយថ្ងៃបន្ទាប់ ពោលគឺថ្ងៃទី១ ខែឧសភា រជ្ជទាយាទណារ៉ូហ៊ីតុ នឹងឡើងគ្រងរាជ្យជាអធិរាជជប៉ុនជាផ្លូវការដែរ។
ក្រៅពីចូលជួបអធិរាជជប៉ុនថ្មី លោក ត្រាំ ក៏នឹងជួបពិភាក្សាជាមួយនាយករដ្ឋមន្ត្រីជប៉ុនលោក ស៊ីនហ្សូអាបេ ដោយក្នុងកិច្ចពិភាក្សានេះ គេរំពឹងថា មេដឹកនាំទាំងពីរនឹងពិភាក្សាពីបញ្ហាទំនាក់ទំនងទ្វេភាគី ជាពិសេសការទូត និងពាណិជ្ជកម្ម រួមជាមួយបញ្ហាសន្តិសុខតំបន់ផង។
មេដឹកនាំទាំងពីរក៏នឹងបង្ហាញការប្តេជ្ញាចិត្តជាថ្មីពីការលើកស្ទួយសម្ព័ន្ធភាពទ្វេភាគី និងការថែរក្សាសន្តិភាព ស្ថិរភាព និងវិបុសភាពក្នុងតំបន់ឥណ្ឌូប៉ាស៊ីហ្វិក និងពិភពលោកទាំងមូលដែរ។
ដោយឡែក នាយករដ្ឋមន្ត្រីជប៉ុនលោក អាបេ ក៏គ្រងនឹងទៅបំពេញទស្សនកិច្ចនៅអាមេរិកចាប់ពីថ្ងៃ ២៦ ដល់ ២៧ ខែមេសាខាងមុខនេះដែរ។
ចំណែកលោក ត្រាំ នឹងត្រឡប់ទៅកាន់ជប៉ុនម្តងទៀតនៅខែខែមិថុនា នៅពេលដែលលោក ត្រូវទៅចូលរួមក្នុងកិច្ចប្រជុំកំពូលប្រទេសម្ភៃ ដែលនឹងត្រូវរៀបចំឡើងនៅក្នុងទីក្រុង Osaka ផងដែរ៕
Tag:
ជប៉ុន
អាមេរិក
ដូណាល់ ត្រាំ
ណារ៉ូហ៊ីតុ
© រក្សាសិទ្ធិដោយ thmeythmey.com